ଭୋପାଳ,୯।୭: ଭ୍ରଷ୍ଟାଚାର ଓ ଅଳସୁଆ କର୍ମଚାରୀଙ୍କ ବିରୋଧରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୃଢ଼ କାର୍ଯ୍ୟାନୁଷ୍ଠାନ ନେଇଛନ୍ତି। ଏହି କ୍ରମରେ ବାରାଣସୀରେ ୫୦ ବର୍ଷରୁ ଊର୍ଦ୍ଧ୍ୱ ବୟସର ୨୨ ପୋଲିସ କର୍ମଚାରୀଙ୍କୁ ବାଧ୍ୟତାମୂଳକ ଅବସର ଦିଆଯାଇଛି। ଏମାନଙ୍କ ନାଁରେ ଭ୍ରଷ୍ଟାଚାର, ଅସଦାଚରଣ ଓ ବିଶୃଙ୍ଖଳିତ ନେଇ ମାମଲା ରୁଜୁ ହୋଇଛି। କିଛି ଦିନ ତଳେ ଗୃହ ବିଭାଗର ସମୀକ୍ଷା ସମୟରେ ଯୋଗୀ ଆଦିତ୍ୟନାଥ ଭ୍ରଷ୍ଟାଚାର ଓ ଅଳସୁଆ ଅଫିସରଙ୍କୁ ନିଲମ୍ବିତ କରିବା ପାଇଁ ନିର୍ଦ୍ଦେଶ ଦେଇଥିଲେ। ଯେଉଁମାନେ ଆଇନ ବ୍ୟବସ୍ଥା ପ୍ରତି ନିଷ୍ଠାପର ନୁହଁନ୍ତି ସେହିପରି ଅଫିସର ଓ କର୍ମଚାରୀଙ୍କ ଆବଶ୍ୟକତା ନାହିଁ ବୋଲି ଯୋଗୀ କହିଥିଲେ। ଏହାପରେ ସରକାରୀ କର୍ମଚାରୀଙ୍କ ଭିତରେ କୋକୁଆଭୟ ଖେଳିଯାଇଥିଲା। ଅପରାଧୀଙ୍କ ସହ ଯେଉଁ ପୋଲିସ କର୍ମଚାରୀଙ୍କ ସହଭାଗିତା ରହିଛି ସେମାନଙ୍କୁ ଚିହ୍ନଟ କରିବା ପାଇଁ ନିର୍ଦ୍ଦେଶ ଦେବା ପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କାରଣ ପୋଲିସ ପୋଷାକ ନାଁରେ କଳଙ୍କ ଲଗାଇଥିବା ବ୍ୟକ୍ତିଙ୍କର ବିଭାଗରେ ସ୍ଥାନ ନାହିଁ ବୋଲି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି।