ଯୋଡ଼ା, ୨୧ା୪(ଡି.ଏନ.ଏ.): ଚମ୍ପୁଆ ନିର୍ବାଚନମଣ୍ଡଳୀର ଯୋଡ଼ାଠାରେ ଶନିବାର ନିର୍ବାଚନ ପ୍ରଚାରକୁ କଂଗ୍ରେସ ଜୋରଦାର କରିଛି। ଦଳୀୟ ପ୍ରାର୍ଥୀ ଯଦୁମଣି ବାରିକଙ୍କ ସହିତ କେନ୍ଦୁଝର ଜିଲା କାର୍ଯ୍ୟକାରୀ ସଭାପତି ନିହାର ରଞ୍ଜନ ରାଉତ ସମର୍ଥକଙ୍କ ଗହଣରେ ଯୋଡ଼ା ମାର୍କେଟ, ମୁସଲିମ୍ ବସ୍ତି ଓ ଯୋଡା ପୌରପାଳିକାର ୪ନଂ ଓ୍ବାର୍ଡରେ ଘର ଘର ବୁଲି ପ୍ରଚାର କରିଥିଲେ। ମୁସଲିମ୍ ବସ୍ତିର ବରିଷ୍ଠ ନାଗରିକ ମହମ୍ମଦ ଆୟୁବ୍, ମହମ୍ମଦ ଆବୁଲୁ, ମହମ୍ମଦ ଗୁଲାମ, ମହମ୍ମଦ ଓ୍ବାହିଦ୍ , ମହମ୍ମଦ ଓ୍ବାସିମ, ମହମ୍ମଦ ଦାନିସଙ୍କ ସହ ଏକ ରାଲି କରି ବସ୍ତିର ଘର ଘର ବୁଲି କଂଗ୍ରେସ ପ୍ରାର୍ଥୀଙ୍କୁ ବିଜୟୀ କରିବା ପାଇଁ ପ୍ରଚାର କରିଥିଲେ। ବହୁ ସଂଖ୍ୟକ ଅସନ୍ତୁଷ୍ଟ ବିଜେଡି କର୍ମୀ ମଧ୍ୟ କଂଗ୍ରେସରେ ଯୋଗ ଦେଇଥିବା ଜିଲା କାର୍ଯ୍ୟକାରୀ ସଭାପତି ରାଉତ କହିଛନ୍ତି। ଏହି ନିର୍ବାଚନମଣ୍ଡଳୀରେ ପ୍ରଚାର କ୍ଷେତ୍ରରେ ବିଜେଡି ଓ ଭାଜପା ଆଗରେ ରହିଥିବା ବେଳେ କଂଗ୍ରେସ ମଧ୍ୟ ଭୋଟରମାନଙ୍କୁ ଆକୃଷ୍ଟ କରିବା ପାଇଁ ଉଦ୍ୟମ ଆରମ୍ଭ କରିଛି। ଶ୍ରମିକ ତଥା ଚାଷୀମାନଙ୍କ ସମସ୍ୟା ପ୍ରତି ଧ୍ୟାନ ଦେବା ଏବଂ କଂଗ୍ରେସ ଦ୍ୱାରା ଘୋଷଣା କରାଯାଇଥିବା ନ୍ୟାୟ ଯୋଜନା ସମ୍ପର୍କରେ ପ୍ରାର୍ଥୀ ବାରିକ ଭୋଟରମାନଙ୍କୁ ବୁଝାଇଥିଲେ।