ଲୋକଙ୍କ ଧନଜୀବନର ସୁରକ୍ଷା ଓ ଆଇନଶୃଙ୍ଖଳା ରକ୍ଷା ହେଉଛି ପୋଲିସର ପ୍ରଥମ କାମ। ଏଥିପାଇଁ ଖାକିକୁ ଆବଶ୍ୟକ ଆଇନଗତ କ୍ଷମତା ଦିଆଯାଇଛି। ଜଣେ ସଚ୍ଚୋଟ, ଦକ୍ଷ ତଥା ନିଷ୍ଠାପର ପୋଲିସକୁ ସମାଜ ସବୁବେଳେ ସମ୍ମାନ କରୁଛି। ଏବେ କରୋନା ଭଳି ସଂକଟଜନକ ସ୍ଥିତିରେ ଆଗଧାଡ଼ିର ଯୋଦ୍ଧା ସାଜିଥିବା ବହୁ ପୋଲିସ ଭଲ କାମ କରି ମୁଖ୍ୟମନ୍ତ୍ରୀଙ୍କ ପ୍ରଶଂସା ସାଉଣ୍ଟିଛନ୍ତି। ସମାଜକୁ ବିପଦ ମୁହଁରୁ ରକ୍ଷା କରିବା ପାଇଁ ନିଜ ଜୀବନକୁ ବାଜି ଲଗାଇ ଖାକିର ମର୍ଯ୍ୟାଦାକୁ ଢେର୍ ଉଚ୍ଚକୁ ନେଇଛନ୍ତି। ଏହି ପୋଲିସ ଅଧିକାରୀ ଓ କର୍ମଚାରୀଙ୍କୁ ଆଜି ବି ଓଡ଼ିଶାବାସୀ ସାଲ୍ୟୁଟ୍ କରୁଛନ୍ତି। ହେଲେ ଏପରି ସମୟରେ ଆଉ କେତେଜଣ ପୋଲିସ କ୍ଷମତାର ଦୁରୁପଯୋଗ କରି ଖାକିରେ କଳଙ୍କ ଲଗାଇଛନ୍ତି। କେତେଜଣ ଧରାପଡ଼ିଥିବାବେଳେ ଆଉ କେତେଜଣ ଚତୁରତାର ସହ ନିଜ କଳା କ୍ଷମତାକୁ ଘୋଡାଇ ପାରିଛନ୍ତି। ବଡ଼କଥା ହେଲା ଲକ୍ଡାଉନ୍ ସମୟରେ ହିଁ ଆଇନର ରକ୍ଷକମାନେ ଆଇନକୁ ଅଧିକ ଉଲ୍ଲଂଘନ କରି ନିଲମ୍ବିତ ହୋଇଛନ୍ତି। ପୋଲିସ ପ୍ରଶାସନ ପାଇଁ ବଦନାମ ଆଣିଥିବା ଏହି ପୋଲିସ ଅଫିସରଙ୍କ ସମ୍ପର୍କରେ ଆମର ସ୍ବତନ୍ତ୍ର ଉପସ୍ଥାପନା।
ଚୋରା ଗାଡ଼ିରେ ନାଲିବତି ଥାନାଧିକାରୀଙ୍କୁ ମହଙ୍ଗା ପଡ଼ିଲା
ଲକ୍ଡାଉନ୍ରେ ଘରେ ରହିବା ସହ ବହୁ କଟକଣା ଲଗାଇଥିଲା ପୋଲିସ। ହେଲେ ଯାଜପୁର ଜିଲା ବଡ଼ଚଣା ଥାନାର ତତ୍କାଳୀନ ଆଇଆଇସି ଦୀପକ ଜେନା ନିୟମ ଭାଙ୍ଗି ପରିବାର ସହ ଏପ୍ରିଲ ୨୦ରେ ଜଗନ୍ନାଥ ଦର୍ଶନ କରିବାକୁ ପୁରୀ ଯାଇଥିଲେ। ଏପରି କି ଏକ ଚୋରା ଗାଡ଼ିରେ ନାଲିବତି ଲଗାଇ ଶ୍ରୀକ୍ଷେତ୍ରରେ ପହଞ୍ଚତ୍ ଜଣେ ସେବାୟତଙ୍କୁ ଧରି ଶ୍ରୀମନ୍ଦିର ଭିତରକୁ ପଶିବାକୁ ଉଦ୍ୟମ କରିବା ସମୟରେ ଧରାପଡିଥିଲେ। ଶ୍ରୀମନ୍ଦିର ବନ୍ଦ ଥିବାରୁ ଡ୍ୟୁଟିରେ ଥିବା ଜଣେ କନ୍ଷ୍ଟେବଳ ସେମାନଙ୍କୁ ଅଟକାଇଥିଲେ। ହେଲେ ଦୀପକ ଧମକ ଦେଇ ପରିବାର ଲୋକଙ୍କ ସହ ଭିତରକୁ ପଶିଥିଲେ। ଏନେଇ ପୁରୀ ଟାଉନ ଥାନାରେ ମାମଲା ହେବା ପରେ ଡିଜିପି ଅଭୟ ତାଙ୍କୁ ନିଲମ୍ବିତ କରିଥିଲେ।
ହାଇ ସିକ୍ୟୁରିଟି ଜୋନ୍ରେ ମଦ ପିଇ ନିଲମ୍ବିତ
ମେ ୧ରେ ରାଜଧାନୀ ଲକ୍ଡାଉନ୍ ଥିଲା। ରାତିରେ କର୍ଫୁ ଲାଗୁ ହୋଇଥିଲା। ହେଲେ ଲୋକସେବା ଭବନ ନିକଟ ତଥା ଜୟଦେବ ଭବନ ସମ୍ମୁଖ ହାଇ ସିକ୍ୟୁରିଟି ଜୋନ୍ରେ ସାଙ୍ଗମାନଙ୍କ ସହ ମଦ ପିଇ ମଉଜମସ୍ତି କରୁଥିଲେ ହାବିଲଦାର ଏବଂ କନ୍ଷ୍ଟେବଳ ସଂଘର ତତ୍କାଳୀନ ସମ୍ପାଦକ ପ୍ରସନ୍ନ ବେହେରା। କ୍ୟାପିଟାଲ ଥାନା ଅଧିକାରୀ ସେମାନଙ୍କୁ ଧରି ଥାନାକୁ ନେବା ପରେ ଜରିମାନା କରି ଛାଡ଼ି ଦେଇଥିଲେ। ପରେ ଡିସିପି ତାଙ୍କୁ ମେ ୩ରେ ନିଲମ୍ବିତ କରିଥିଲେ।
ବଳାତ୍କାର, ଠକେଇରେ ପୋଲିସ
ଜଣେ ଯୁବତୀଙ୍କୁ ବିବାହର ପ୍ରଲୋଭନ ଦେଖାଇ ବଳାତ୍କାର ସହ ୫ଲକ୍ଷ ଠକି ନେଇଥିଲେ କ୍ୟାପିଟାଲ ଥାନାର ତତ୍କାଳୀନ ଏସ୍ଆଇ ରାକେଶ ସାମଲ। ଏନେଇ ଯୁବତୀଜଣକ ମହିଳା ଥାନାରେ ମେ ୧୨ରେ ଅଭିଯୋଗ କରିବା ପରେ ପୋଲିସ ତାଙ୍କ ନାମରେ ଏକ ମାମଲା ରୁଜୁ କରିଥିଲା। ତଦନ୍ତରୁ ତାଙ୍କର ଆପରାଧିକ କାର୍ଯ୍ୟକଳାପ ପଦାକୁ ଆସିବା ପରେ ଡିସିପି ତାଙ୍କୁ ନିଲମ୍ବିତ କରିଥିଲେ। ଏବେ ସେ ଗିରଫଦାରିକୁ ନେଇ ହାଇକୋର୍ଟରୁ ଅନ୍ତରୀଣ ରହିତାଦେଶ ଆଣି ଖୁଲମ୍ଖୁଲା ବୁଲୁଛନ୍ତି।
ଥାନାରେ ପଶୁଭଳି ପିଟିଥିଲେ ମହିଳା ଆଇଆଇସି
କେନ୍ଦୁଝର ଜିଲା ପାଟଣା ଥାନା ଅଧିକାରୀ ସନ୍ଧ୍ୟାରାଣୀ ଜେନା ଥାନା ଭିତରେ ଜଣେ ଯୁବକଙ୍କୁ ଗୋରୁ ଭଳି ପିଟିଥିଲେ। ମେ ୨୩ରେ ଏହାର ଭିଡିଓ ଭାଇରାଲ ହୋଇଥିଲା। ଏହାକୁ ନେଇ ରାଜ୍ୟ ମାନବିକ ଅଧିକାର କମିଶନଙ୍କ ନିକଟରେ ଅଭିଯୋଗ ହୋଇଥିଲା। କମିଶନ ଘଟଣାର ତଦନ୍ତ ପାଇଁ କେଉଁଝର ଏସ୍ପିଙ୍କୁ ନିର୍ଦ୍ଦେଶ ଦେବା ସହ ଥାନା ଅଧିକାରୀଙ୍କ ଦରମାରୁ ୧୦ ହଜାର ଟଙ୍କା କାଟି ପୀଡିତଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ। ଏହାପରେ ଡିଜିପି ତାଙ୍କୁ ନିଲମ୍ବିତ କରିଥିଲେ।
ମହିଳା ଏସ୍ଆଇଙ୍କୁ ଅସଦାଚରଣ କରିଥିଲେ ଥାନାଧିକାରୀ
ନନ୍ଦନକାନନ ଥାନାର ଜଣେ ମହିଳା ଏସ୍ଆଇଙ୍କୁ ଥାନା ଅଧିକାରୀ ପରମାନନ୍ଦ ନାୟକ ନିଜ ଚାମ୍ବରରେ ଅସଦାଚରଣ କରିଥିଲେ। ଏନେଇ ପୋଲିସ କମିଶନରଙ୍କ ନିକଟରେ ଅଭିଯୋଗ ପରେ ସମ୍ପୃକ୍ତ ଥାନା ଅଧିକାରୀଙ୍କୁ ପୋଲିସ ମୁଖ୍ୟାଳୟକୁ ବଦଳି କରାଯାଇଥିଲା। ପରେ ଡିସିପିଙ୍କ ତଦନ୍ତ ରିପୋର୍ଟ ଆଧାରରେ ପୋଲିସ ଡିଜି ଅଭୟ ଥାନାଧିକାରୀ ପରମା ନନ୍ଦଙ୍କୁ ମେ ୨୮ରେ ନିଲମ୍ବିତ କରିଥିଲେ।
ଧକ୍କା ମାରି ଫାଣ୍ଡି ଅଧିକାରୀ ନିଲମ୍ବିତ
ଗୋପ ଥାନା ଅଧୀନ ନୟାହାଟ ଫାଣ୍ଡି ଅଧିକାରୀ ସନ୍ତୋଷ କୁମାର ସାହୁ ଏପ୍ରିଲ ୧୮ରେ ପୁରୀ ଯାଇଥିବାବେଳେ ଜଣେ ବ୍ୟକ୍ତିଙ୍କୁ ଧକ୍କା ମାରିଥିଲେ। ସେ ପଡି ଯିବାରୁ ତାଙ୍କ ମୁଣ୍ଡ ଫାଟିଯାଇଥିଲା। ଏନେଇ ସାକ୍ଷୀଗୋପାଳ ଥାନାରେ ଫାଣ୍ଡି ଅଧିକାରୀଙ୍କ ବିରୋଧରେ ମାମଲା ରୁଜୁ ହୋଇଥିଲା। ପରେ ପୁରୀ ଏସ୍ପି ତାଙ୍କୁ ନିଲମ୍ବିତ କରିଥିଲେ।
ରାସ୍ତା ମଝିରେ ପିଟି ମୁଣ୍ଡ ଫଟାଇଲେ
ଭଦ୍ରକ ଜିଲା ବନ୍ତ ବଜାରରେ ମେ ୯ରେ ଜଣେ ଯୁବକ ମାସ୍କ ପିନ୍ଧି ନ ଥିବାରୁ ତାଙ୍କୁ ରାସ୍ତା ମଝିରେ ୫ରୁ ଊର୍ଦ୍ଧ୍ୱ ପୋଲିସ ଘେରିଯାଇ ନିର୍ଘାତ ପିଟିଥିଲେ। ଲାଠି ମାଡ଼ରେ ତାଙ୍କ ମୁଣ୍ଡ ଫାଟି ଯାଇଥିଲା। ୨୫ ତାରିଖରେ ଭିଡିଓ ଭାଇରାଲ ହେବା ପରେ ଏସ୍ପି ସମ୍ପୃକ୍ତ ଜଣେ କନ୍ଷ୍ଟେବଳଙ୍କୁ ନିଲମ୍ବିତ କରିଥିଲେ। ହେଲେ ମାଡ଼ ଖାଇଥିବା ଉକ୍ତ ଯୁବକଙ୍କ ନାଁରେ ମଧ୍ୟ ମାମଲା ରୁଜୁ ହୋଇଥିଲା।
ପଚା ଆଳୁ କାଢ଼ି ଦେବା ଆବଶ୍ୟକ
କରୋନା କଟକଣା ପାଇଁ ପୋଲିସ ଅଧିକ ଚାପରେ ରହିଛି। ଆଇନଶୃଙ୍ଖଳା କାର୍ଯ୍ୟରେ ବ୍ୟସ୍ତ ରହୁଛନ୍ତି। ହେଲେ କେତେଜଣ ପୋଲିସ ନିଜ ପଦବୀକୁ ଅପବ୍ୟବହାର କରୁଛନ୍ତି। କୌଣସି ପୋଲିସ କାହାକୁ ଥାନାରେ ପିଟିବା ଠିକ୍ ନୁହେଁ। ଆଳୁ ବସ୍ତାରେ ଯେଉଁ ପଚା ଆଳୁ ଅଛି ତାହାକୁ କାଢିଦେବା ଆବଶ୍ୟକ। ପୋଲିସ ଏବେ ଅଧିକ ସମ୍ମାନ ପାଉଛି। କିନ୍ତୁ ସେଥିରେ କଳାଦାଗ ଲଗାଉଥିବା ଅଫିସରଙ୍କୁ ବାହାର କରିଦିଆଯିବା ଉଚିତ।
– ବିପିନ ବିହାରୀ ମିଶ୍ର, ପୂର୍ବତନ ପୋଲିସ ଡିଜି, ଓଡ଼ିଶା
ଅଗଣତାନ୍ତ୍ରିକ, ଆଇନର ଶାସନ ବିପନ୍ନ
ମାନବିକ ଅଧିକାର କର୍ମୀ ବିଶ୍ୱପ୍ରିୟ କାନୁନ୍ଗୋ କହିଛନ୍ତି, ଲକ୍ଡାଉନ୍ ସମୟରେ କ୍ଷମତାର ଦୁରୁପଯୋଗ କରି ନିଲମ୍ବିତ ହୋଇଥିବା ପୋଲିସ ଅଫିସରମାନେ ଖାକି ପାଇଁ ବ୍ୟତିକ୍ରମ। ନ୍ୟାୟିକ ପ୍ରକ୍ରିୟାକୁ ନିରୀକ୍ଷଣ କଲେ ସମୁଦାୟ ଘଟଣା ଅଗଣତାନ୍ତ୍ରିକ ଓ ଆଇନର ଶାସନ ବିପନ୍ନ ହୋଇଥିବା ସଙ୍କେତ ଦେଉଛି। ସେହିଭଳି ଆଇନଜୀବୀ ଦୁର୍ଗାମାଧବ ମିଶ୍ର କହିଛନ୍ତି, ପୋଲିସ ଲକ୍ଡାଉନ୍ ସମୟରେ ଯେଭଳି କାର୍ଯ୍ୟ କରିଛି ତାହା ନିଶ୍ଚିତ ଭାବେ ପ୍ରଶଂସା ଯୋଗ୍ୟ। ହେଲେ ଯେଉଁ ପୋଲିସ ଅଫିସରମାନେ ଆଇନକୁ ହାତକୁ ନେଇ ବେଆଇନ କାର୍ଯ୍ୟ କରୁଛନ୍ତି ସମାନଙ୍କ ବିରୋଧରେ ଲୋକଦେଖାଣିଆ ନୁହେଁ ଦୃଢ଼ କାର୍ଯ୍ୟାନୁଷ୍ଠାନ ଆବଶ୍ୟକ।
ରିପୋର୍ଟ: ତ୍ରିନାଥ ମହାନ୍ତି, ଭୁବନେଶ୍ୱର