ହିଞ୍ଜିଳିକାଟୁ,୨୫।୧(ଡି.ଏନ୍.ଏ.) : ଗଞ୍ଜାମ ଜିଲା ହିଞ୍ଜିଳି ଥାନା କୋଳିଦାସପୁର ଗ୍ରାମରେ ଶୁକ୍ରବାର ସନ୍ଧ୍ୟାରେ ଯୌତୁକ ପାଇଁ ଜଣେ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ମହିଳା ଜଣକ ହେଲେ ହିଞ୍ଜିଳି ଥାନା ଚାନ୍ଦୁଲି ଗ୍ରାମର ଲିଲି ଦାସ (୨୬) । ଏ ନେଇ କେସ ନଂ. ୨୭/୨୦ରେ ଏକ ମାମଲା ରୁଜୁ କରି ପୋଲିସ ମୃତଦେହ ଜବତ କରିବା ସହ ଶନିବାର ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ଡାକ୍ତରଖାନା ପଠାଇଛି। ମୃତ ଲିଲିଙ୍କ ସ୍ବାମୀଙ୍କୁ ପୋଲିସ ଥାନାରେ ଅଟକ ରଖି ପଚରାଉଚରା କରୁଥିବା ଆଇଆଇସି ଅଭିମନ୍ୟୁ ଦାସ କହିଛନ୍ତି।
ସୂଚନାଯୋଗ୍ୟ, ହିଞ୍ଜିଳି ଥାନା କୋଳିଦାସପୁର ଗ୍ରାମର କୁମର ଦାସ (୩୦)ଙ୍କ ସହ ସ୍ଥାନୀୟ ଥାନା ଚାନ୍ଦୁଲି ଗ୍ରାମର ଲିଲିଙ୍କର ଗତ ଏପ୍ରିଲ ୨୦୧୭ରେ ବିବାହ ହୋଇଥିଲା। ଏହି ସମୟରେ ଶାଶୁଘର ଦାବି ମୁତାବକ ୨୨ ହଜାର ଟଙ୍କା, ଏକ ଭରି ଓଜନର ସୁନା ଚେନ୍ ସହ ଅନ୍ୟାନ୍ୟ ଆସବାବପତ୍ର ବାପଘର ପକ୍ଷରୁ ପ୍ରଦାନ କରାଯାଇଥିଲା। ମାତ୍ର ବାହାଘରର ଗୋଟିଏ ବର୍ଷ ପରେ ଅଧିକ ଯୌତୁକ ଦାବି କରି ଶାଶୁଘର ପକ୍ଷରୁ ଲିଲିଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଉଥିବା ନେଇ ଲିଲିଙ୍କ ମା’ ବନିତା ଅଭିଯୋଗରେ ଦର୍ଶାଇଛନ୍ତି। ଶୁକ୍ରବାର ସନ୍ଧ୍ୟାରେ ଲିଲିଙ୍କ ମୃତ୍ୟୁ ହୋଇଥିବା ଶାଶୁଘର ଲୋକେ ତାଙ୍କ ବାପାଙ୍କୁ ଫୋନ୍ କରି କହିଥିଲେ। ଖବର ପାଇ ପରିବାର ଲୋକେ କୋଳିଦାସପୁର ଗ୍ରାମରେ ପହଞ୍ଚି ଝିଅର ମୃତଦେହ ଦେଖିବାକୁ ପାଇଥିଲେ। ଅଧିକ ଯୌତୁକ ଦାବି କରି ଶାଶୁଘର ଲୋକେ ଝିଅଙ୍କୁ ହତ୍ୟା କରିଥିବା ତାଙ୍କ ମା’ ବନିତା ହିଞ୍ଜିଳି ଥାନାରେ ଅଭିଯୋଗ କରିଛନ୍ତି।
