ନୂଆଦିଲ୍ଲୀ, ୧୯।୬- ମହାମାରୀ କରୋନା ଭାଇରସ୍ ଯୋଗୁ ସାରା ବିଶ୍ୱରେ ସ୍ଥିତି ବିଗିଡ଼ିବାରେ ଲାଗିଛି। ଏହାର ସିଧାସଳଖ ପ୍ରଭାବ ଏବେ ରକ୍ତ ଯୋଗାଣ ଉପରେ ପଡ଼ିଛି। ପୁରା ବିଶ୍ୱରେ ବର୍ତ୍ତମାନ ରକ୍ତ ଯୋଗାଣ ଗୁରୁତର ଭାବେ ହ୍ରାସ ପାଇଛି। କରୋନା ଭାଇରସ ରକ୍ତଦାନ କ୍ୟାମ୍ପ୍କୁ ବାତିଲ କରିଦେଇଛି। ଲୋକମାନେ ରକ୍ତଦାନ ପାଇଁ କେନ୍ଦ୍ର ପରିଦର୍ଶନ କରିବାକୁ ଭୟ କରୁଛନ୍ତି। ଆମେରିକୀୟ ରେଡ୍କ୍ରସ ବାୟୋମେଟିକାଲ ସର୍ଭିସେସର ସଭାପତି କ୍ରିସ ହୋରୁଡା ଏହାକୁ ଆଶ୍ଚର୍ଯ୍ୟଜନକ ହ୍ରାସ ବୋଲି କହିଛନ୍ତି। କ୍ରିସ କହିଛନ୍ତି, ଆମର ରକ୍ତ ଭଣ୍ଡାର ଅଧା ହୋଇଯାଇଛି। ଆମେ ଏକ ଜଟିଳ ପରିସ୍ଥିତି ଆଡ଼କୁ ଗତି କରୁଛୁ।
କରୋନା ସମୟରେ ସମସ୍ତ ସୁସ୍ଥବ୍ୟକ୍ତି ରକ୍ତଦାନ କରିପାରିବେ ବୋଲି ମେଡିକାଲ ବିଶେଷଜ୍ଞ ସ୍ପଷ୍ଟ କରିଛନ୍ତି। ମିନେସୋଟା ୟୁନିଭରସିଟି ବ୍ଲଡ ବ୍ୟାଙ୍କ ଲ୍ୟାବ୍ର ନିର୍ଦ୍ଦେଶକ ତଥା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର କ୍ଲାଉଡିଆ କୋହ୍ନଙ୍କ କହିବା ଅନୁଯାୟୀ, କରୋନା ଭାଇରସ ରକ୍ତଜନିତ ରୋଗ ନୁହେଁ। ରକ୍ତଦ୍ୱାରା ଏହା ବ୍ୟାପି ନ ଥାଏ। ତେଣୁ ରକ୍ତ ସୁରକ୍ଷିତ ଅଟେ। ସେହିଭଳି ରେଡ୍କ୍ରସ କେନ୍ଦ୍ରଗୁଡ଼ିକ ସାଧାରଣ ପ୍ରକିୟା ବୃଦ୍ଧି କରିଛନ୍ତି। ସମସ୍ତ ଷ୍ଟାଫ୍ ମାସ୍କ ଓ ଗ୍ଲୋବ୍ସ ପରିଧାନ କରିବେ। ରକ୍ତଦାତାଙ୍କ ସମେତ ଷ୍ଟାଫ୍ମାନଙ୍କ ତାପମାତ୍ର ମଧ୍ୟ ମପାଯାଇଥାଏ।