ରଘୁନାଥପୁର, ୧୦।୧ (ଡି.ଏନ୍.ଏ.)-ରଘୁନାଥପୁର ପଞ୍ଚାୟତ ସମିତିର ୫ମ ବୈଠକ ଶୁକ୍ରବାର ଅନୁଷ୍ଠିତ ହୋଇଥିଲା। ଦୁଇଗୋଷ୍ଠୀ ମଧ୍ୟରେ କଟାକଟା, ହୋହଲ୍ଲା ଓ ବୈଠକ ଗୃହରେ ଚେୟାର ଫୋପଡ଼ା ଫୋପଡ଼ିରେ ବୈଠକ ଶେଷ ହୋଇଛି। ଅଧ୍ୟକ୍ଷା ସ୍ବପ୍ନାସରିତା ବଳଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ତିର୍ତ୍ତୋଲ ବିଧାୟକ ବିଷ୍ଣୁ ଦାସ ଅତିଥି ଭାବେ ମଞ୍ଚାସୀନ ଥିଲେ। ତେବେ ବୈଠକ ସମ୍ପର୍କରେ ଜନ ପ୍ରତିନିଧିଙ୍କୁ ଚିଠି କରାଯାଇ ନ ଥିବା ନେଇ ଗୃହରେ ବିବାଦ ଆରମ୍ଭ ହୋଇଥିଲା। ଜଗନ୍ନାଥପୁର ସରପଞ୍ଚ ପୁଷ୍ପଲତା ସୁତାର ଏହି ଅଭିଯୋଗ ଉଠାଇଥିବା ବେଳେ ସରପଞ୍ଚ ଶୁଭ୍ରାନ୍ତ ସ୍ବାଇଁ, ସରପଞ୍ଚ ସୂର୍ଯ୍ୟନାରାୟଣ ନାୟକ ଓ ସମିତିସଭ୍ୟ ସରାଜ ଦାଶ ପ୍ରମୁଖ ଏହାର କୈଫୟତ ରଖିବାକୁ ଦାବି କରି ହୋହଲ୍ଲା କରିଥିଲେ। ଏହା ସଙ୍ଗୀନ ସମସ୍ୟା ନୁହେଁ ବୋଲି ଜଗନ୍ନାଥପୁର ସମିତିସଭ୍ୟ ମେହେବୁବ୍ ବେଗ୍ କହିବା ପରେ ଉଭୟ ଗୋଷ୍ଠୀଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ଜଣେ ଲୋକପ୍ରତିନିଧି ଏକ ଚେୟାର ଫୋପାଡ଼ି ଦେବାରୁ ତାହା ଜଣେ କୃଷି ଅଧିକାରୀଙ୍କ ଦେହରେ ବାଜିଥିଲା। ବିବାଦ ବଢ଼ି ଚାଲିଥିବା ବେଳେ ଜିଲା ପରିଷଦ ସଭ୍ୟା ଡେଜାଲିନ ମହାପାତ୍ର ସଭାଗୃହରେ ପହଞ୍ଚତ୍ ବୈଠକ ସମ୍ପର୍କରେ ତାଙ୍କୁ କାହିଁକି ଚିଠି କରାଗଲା ନାହିଁ ବୋଲି ପ୍ରଶ୍ନ କରିଥିଲେ। ଏହାପରେ ଉଭୟ ବଚସା ବଢ଼ି ଚାଲିବାରୁ ବିଧାୟକ ଦାସ ଏହାର ସମାଧାନ କରି ଜିଲା ପରିଷଦ ସଭ୍ୟା ମହାପାତ୍ରଙ୍କୁ ମଞ୍ଚ ଉପରକୁ ଡାକିଥିଲେ। ଗୋଟିଏ ଗୋଷ୍ଠୀ ପକ୍ଷରୁ ଆଲୋଚନା ପାଇଁ ଚେଷ୍ଟା ଚାଲିଥିବା ବେଳେ ଅନ୍ୟ ଏକ ଗେଷ୍ଠୀ ବୈଠକକୁ ବନ୍ଦ ରଖିବାକୁ ଦାବି କରିଥିଲେ। ଆଗାମୀ ଦିନରେ ବିଧାୟକ ଦାସ ସମସ୍ତ ଜନ ପ୍ରତିନିଧିଙ୍କୁ ଡାକି ମିଟିଂ କରିବା ପରେ ଆଉ ଥରେ ପଞ୍ଚାୟତ ସମିତି ବୈଠକ ଅନୁଷ୍ଠିତ ହେବ ବୋଲି ଜିଦ୍ ଧରିଥିଲେ। ଏହାପରେ ଜନ ପ୍ରତିନିଧିଙ୍କୁ କାହିଁକି ଡକା ଯାଇ ନ ଥିଲା ସେ ନେଇ ବିଡିଓ ଓ ବ୍ଲକ ଅଧ୍ୟକ୍ଷାଙ୍କ ମଧ୍ୟରେ କଥା କଟାକଟି ହୋଇଥିଲା।ଯାହା ଉଭୟଙ୍କ ପାରିବା ପଣଇଆକୁ ପଦାରେ ପକାଇଥିଲା। ତେବେ ଏସ୍ଡିପଓ ଦୀପକ ରଞ୍ଜନା ଜେନା ଓ ଆଇଆଇସି ବବିତା ଦଳାଇ ଅନ୍ୟ ପୋଲିସ କର୍ମଚାରୀଙ୍କ ସହ ମିଶି ପରିସ୍ଥିତିକୁ ଆୟତ୍ତ କରିଥିଲେ।