ସମ୍ବଲପୁର, ୧୬।୧୨ (ବ୍ୟୁରୋ) ଅଇଁଠାପାଲି ପିଏଚଡି ପଡିଆଠାରେ ଚାଲିଥିବା ସମ୍ବଲପୁର ମହୋତ୍ସବ-୨୦୧୯ ରବିବାର ରାତିରେ ଉଦ୍ଯାପିତ ହୋଇଯାଇଛି । ପଦ୍ମଶ୍ରୀ ଜିତେନ୍ଦ୍ର ହରିପାଲ ଓ ପ୍ରୀତିନନ୍ଦା ମିଶ୍ରଙ୍କ କଣ୍ଠରୁ ରଙ୍ଗବତୀ ଗୀତ ଝରି ପଡିଥିଲା । ସାରା ବିଶ୍ୱରେ ଖ୍ୟାତି ଅର୍ଜନ କରିଥିବା ଏହି ଲୋକଗୀତ ତାଳରେ ଦର୍ଶକ ଝୁମି ଉଠିଥିଲେ । ସେହିପରି ସମ୍ବଲପୁରୀଆ ବାବୁ ମଣ୍ଟୁ ଛୁରିଆଙ୍କ ଗୀତ ଦର୍ଶକଙ୍କ ମନ ମୋହିଥିଲା । ସମ୍ବଲପୁରୀଆ ବାବୁଙ୍କ ଗୀତ ଶୁଣିବା ପାଇଁ ସମ୍ବଲପୁର, ବୁର୍ଲା, ହୀରାକୁଦ, ରେଙ୍ଗାଲି, ମାନେଶ୍ୱର ଅଞ୍ଚଳରୁ ଶହସ୍ରାଧିକ ସ୍ରୋତାଙ୍କ ଭିଡ ଜମିଥିଲା । ଏଥିସହ ସମ୍ବଲପୁରୀ ପୋଷାକ ଫେଶନ ସୋ ମହୋତ୍ସବକୁ ସଂସ୍କୃତି ଓ ପରମ୍ପରାର ଝଲକ ଦେଇଥିଲା । ପୁଷ୍ପରାଜ ସୁନା, ପଦ୍ମିନୀ ପାଣିଗ୍ରାହୀ, ଦୁର୍ଗା ଦାଶ ଗୀତ ଗାଇ ଥିଲେ । ରଙ୍ଗଫରୁଆ ଓ କେନ୍ଦୁଝର ଅଦ୍ୟମ ଓଡିଶା ସ୍ପିଜା କଳାକାରମାନେ ସମ୍ବଲପୁରୀ ନୃତ୍ୟର ଫ୍ୟୁଜନ୍ ପରିବେଷଣ କରିଥିଲେ । ମହୋତ୍ସବ ମୁଖ୍ୟ ସଂଯୋଜକ ସପନ ମିଶ୍ରଙ୍କ ପରିଚାଳନାରେ ଉଦ୍ଯାପନୀ ଉତ୍ସବ ହୋଇଥିଲା । ରେଙ୍ଗାଲି ବିଧାୟକ ନାଉରୀ ନାୟକ ମୁଖ୍ୟଅତିଥି, ସମ୍ବଲପୁର ଜିଲା ପରିଷଦ ଅଧ୍ୟକ୍ଷ ରାଧେଶ୍ୟାମ ବାରିକ, ପ୍ରଫେସର ସାଧୁଚରଣ ପଣ୍ଡା, ସମ୍ବଲପୁର ପ୍ରେସ୍ କ୍ଲବ ସଭାପତି ତ୍ରିବିକ୍ରମ ପ୍ରଧାନ, ସୁବ୍ରତ ପାଣିଗ୍ରାହୀ, ଡା. ଶଙ୍କର ରାମଚନ୍ଦାନୀ ସମ୍ମାନୀତ ଅତିଥି ଭାବେ ଯୋଗଦେଇ ସାଂସ୍କୃତିକ ବାର୍ତ୍ତା ଦେଇଥିଲେ । ଏହି ଅବସରରେ ଗୌତମ ମିଶ୍ରଙ୍କ ସମ୍ବଲପୁର ସିନେମା ଡିଭାଇନ୍ ଡକ୍ଟର ପୋଷ୍ଟର ଓ ଟ୍ରିଜର୍ ଉନ୍ମୋଚନ ହୋଇଥିଲା ।