ଭୁବନେଶ୍ୱର,୧୨।୯(ବ୍ୟୁରୋ): ମଞ୍ଚେଶ୍ୱର ଥାନା ରଙ୍ଗମାଟିଆ ଅଞ୍ଚଳରେ ଦୀପକ ବେହେରା ଓରଫ ଲଣ୍ଡାଙ୍କୁ ମଙ୍ଗଳବାର ରାତିରେ ଦୁର୍ବୃତ୍ତମାନେ ଗୋଡ଼ାଇ ଗୋଡ଼ାଇ ଅତି ବୀଭତ୍ସ ଭାବେ ହତ୍ୟା କରିଥିଲେ। ପୁଅକୁ ଉଦ୍ଧାର କରିବାକୁ ଆସିଥିବା ବାପାଙ୍କୁ ଦୁର୍ବୃତ୍ତମାନେ କାବୁ କରି ତାଙ୍କ ଆଖି ଆଗରେ ଦୀପକଙ୍କୁ ଭୁଜାଲି ଓ ଚାପଡ଼ରେ ହାଣିଚାଲିଥିଲେ। ଏପରିକି ସେ ପେଟମାଡ଼ି ତଳେ ପଡ଼ିଥିବାବେଳେ ସେମାନେ ତାଙ୍କ ଗୋଡ଼କୁ ହାଣି ଗଡ଼ଗଡ଼ କରିପକାଇଥିଲେ। ବୁଧବାର ମୃତଦେହକୁ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯିବାବେଳେ ବାପା ଚକ୍ରଧର ଏକଥା କହି ଭୋଭୋ ହୋଇ କାନ୍ଦି ପକାଇଥିଲେ। ସେ କହିଛନ୍ତି, କୌଣସି ଏକ ମାମଲାରେ ପୋଲିସ ମୁଖ୍ୟ ଅଭିଯୁକ୍ତଙ୍କୁ ଖୋଜୁଥିଲେ। ଦୀପକ ପୋଲିସକୁ ଘର ଦେଖାଇ ଦେବାରୁ ସେବେଠାରୁ ଅଭିଯୁକ୍ତଙ୍କ ଟାର୍ଗେଟରେ ଥିଲେ। ଏହାକୁ ନେଇ ପୂର୍ବରୁ ଅଭିଯୁକ୍ତମାନେ ତାଙ୍କ ସହ ଗଣ୍ଡଗୋଳ କରିବା ସହ ଧମକ ମଧ୍ୟ ଦେଇ ଆସୁଥିଲେ। ଅଭିଯୁକ୍ତଙ୍କୁ କଡ଼ା ଶାସ୍ତି ମିଳିବା ଦରକାର। ମୋ ପରିବାର ନ୍ୟାୟ ମିଳୁ। ଅନ୍ୟପକ୍ଷରେ ଘଟଣାକୁ ୩୬ ଘଣ୍ଟା ବିତିଯାଇଥିଲେ ମଧ୍ୟ ପୋଲିସ ଅଭିଯୁକ୍ତଙ୍କୁ ଗିରଫ କରିପାରିନି।
ସୂଚନା ମୁତାବକ, ଦୀପକ ରଙ୍ଗମାଟିଆ ତଳ ସାହିରେ ପରିବାର ସହ ରହୁଥିଲେ। ଜମି କିଣାବିକାରେ ମଧ୍ୟସ୍ଥତା କରିବା ସହ ବାପାଙ୍କ ଜଳଖିଆ ଦୋକାନରେ ସାହାଯ୍ୟ କରୁଥିଲେ। ସାନଭାଇ ଲିକନ କୁହନ୍ତି, ଭାଇଙ୍କୁ ଆକ୍ରମଣ କରିଥିବା ଅଭିଯୁକ୍ତଙ୍କ ମଧ୍ୟରୁ ୪ ଜଣ ମଦ ଓ ବ୍ରାଉନସୁଗାର ନିଶାରେ ଦିନ ରାତି ବୁଡି ରୁହନ୍ତି। ଏଥିସହ ମୋବାଇଲ ଓ ସୁନା ଚେନ ଲୁଟ୍ପାଟ କରି ପୂର୍ବରୁ ଜେଲ ଯାଇଛନ୍ତି। ପୋଲିିସ ଜଣେ ଅଭିଯୁକ୍ତଙ୍କୁ ଗିରଫ କରିବା ପାଇଁ ତାଙ୍କ ଘର ଖୋଜୁଥିବା ବେଳେ ବଡ଼ ଭାଇ ଦୀପକ ପୋଲିସକୁ ଦେଖାଇଦେଇଥିଲା। ଫଳରେ ଅଭିଯୁକ୍ତମାନେ ଗିରଫ ହୋଇ ଜେଲ୍ଯାଇଥିଲେ। ଫେରିବା ପରେ ଦେଖିନେବେ ବୋଲି ଧମକ ଦେଇଥିଲେ। ତିନିମାସ ତଳେ ଜଣେ ସମ୍ପର୍କୀୟଙ୍କ ବାହାଘରବେଳେ ଗଣ୍ଡଗୋଳ କରିଥିଲେ। ଉଭୟଙ୍କ ମଧ୍ୟରେ ହଣାକଟା ହୋଇଥିଲା।
ତଦନ୍ତ କରୁଥିବା ଥାନାଧିକାରୀ ଜତୀନ୍ଦ୍ରନାଥ ସେଠୀ କହିଛନ୍ତି, ମୃତକଙ୍କ ଭାଇ ପିକନ ବେହେରାଙ୍କ ଅଭିଯୋଗକ୍ରମେ ୩୭୯/୧୯ରେ ହତ୍ୟା ମାମଲା ପୋଲିସ ରୁଜୁ କରାଯାଇଛି। ପୂର୍ବ ବିଦାଦକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଛି। ଆକ୍ରମଣର ଶିକାର ଦୀପକ ଏବଂ ଆକ୍ରମଣକାରୀଙ୍କ ନାମରେ ଥାନରେ ମାମଲା ରହିଛି। ତେଣୁ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପ୍ରାଥମିକ ତଦନ୍ତରୁ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି। ଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ସେ କହିଛନ୍ତି।