ବିଶ୍ୱରେ ଅନେକ ଝରଣା ଦେଖିଥିବେ। ସାଧାରଣତଃ ଝରଣା ପାଣି ସ୍ବଚ୍ଛ ଆଉ ନିର୍ମଳ। ମାତ୍ର ଏମିତି କିଛି ଝରଣା ରହିଛି ଯାହା ନିଜର ରଙ୍ଗ ବଦଳାଇ ଦେଇଥା’ନ୍ତି। ଆସନ୍ତୁ ଜାଣିବା ଏପରି କିଛି ଅଦ୍ଭୁତ ଝରଣା ସମ୍ପର୍କରେ …
କାର୍ଲିଫର୍ଣ୍ଣିଆର ହର୍ସଟେଲ୍ ଫଲ୍ ବା ଝରଣା। ଏହା ପ୍ରାୟ ୧୫୬୦ ଫୁଟ ଉଚ୍ଚରୁ ପଡୁଛି। ଏହି ଝରଣାର ଖାସ୍ କଥା ହେଲା ଶୀତଋତୁରେ ଏହା ପ୍ରଖର ବେଗରେ ବହିଥାଏ। ଫେବୃୟାରୀ ଶେଷ ଦୁଇ ସପ୍ତାହରେ ଏହାର ରଙ୍ଗ ମଧ୍ୟ ବଦଳି ଯାଇଥାଏ। ରାତି ହେଲେ ଏହି ଝରଣାର ରଙ୍ଗ ଲାଲ୍ ହୋଇଯାଏ। ଯେମିତି ପାଣିରେ ନିଆଁ ଲାଗିବା ପରି ଦେଖାଯାଇଥାଏ।
ସେହିପରି କାନାଡାର ଆଲ୍ବର୍ଟାରେ ଥିବା ଏକ ଝରଣା ହେଉଛି କ୍ୟାମରନ୍ ଫଲ୍। ଏହି ଝରଣା ଜୁନ୍ ମାସରେ ନିଜର ରଙ୍ଗ ବଦଳାଇ ଦେଇଥାଏ। ଅଧିକ ବର୍ଷା ହେଲେ ଝରଣା ପାଣିରେ ଏଗ୍ରିଲାଇଟ୍ ନାମକ ଏକ ପଦାର୍ଥ ମିଶିଥାଏ। ଯାହା ପରେ ଗରମରେ ଏହାର ପାଣି ଗୋଲାପୀ ହୋଇଯାଇଥାଏ।
ଆଉ ଏକ ଝରଣା ରହିଛି ତୁର୍କୀରେ। ଏଠାକାର ପାମୁକକ୍ଲେ ଓ୍ବାଟରଫଲ୍ ଦେଖିବାକୁ ଖୁବ୍ ମନଲୋଭା। ଏହି କାରଣରୁ ଏହା ବିଶ୍ୱ ହେରିଟେଜ୍ ସାଇଟ୍ରେ ବି ସାମିଲ ହୋଇଛି। ଏହି ଝରଣା ପ୍ରାୟ ୮୮୦୭ ଫୁଟ ଲମ୍ବା ଏବଂ ୧୯୭୦ ଫୁଟ ଚଉଡ଼ା। ଏହାର ଉଚ୍ଚତା ୫୨୫ ଫୁଟ। ଏହା ଏକ ଭିନ୍ନ ଧରଣର ଝରଣା। କାରଣ ଏହା ଉପରେ ପଥର ଛାତ ପରି ରହିଛି। ଖାସ୍ କରି ଏହା ବାଥିଙ୍ଗ୍ ସ୍ପଟ୍ ପାଇଁ ବେଶ୍ ପ୍ରସିଦ୍ଧ।