ସାଧାରଣତଃ ବହୁରୂପୀ ରଙ୍ଗ ବଦଳାଇଥାଏ ବୋଲି ସମସ୍ତେ ଜାଣନ୍ତି। ମାତ୍ର ଏମିତି ଏକ ମାଛ ଅଛି, ଯାହା ରଙ୍ଗ ବଦଳାଇଥାଏ। ଏହି ମାଛ ବିରଳ। ନିକଟରେ ଏହା ଭାରତରେ ଦେଖିବାକୁ ମିଳିଛି। ଜାଣି ଆଶ୍ଚର୍ଯ୍ୟ ହେବେ ଏହି ମାଛ ପ୍ରଥମ ଥର ପାଇଁ ଭାରତରେ ଦେଖିବାକୁ ମିଳିଛି। ସେଣ୍ଟ୍ରାଲ ମେରାଇନ ମତ୍ସ୍ୟ ପ୍ରତିଷ୍ଠାନର ବୈଜ୍ଞାନିକମାନେ ଏହାର ସନ୍ଧାନ ପାଇଛନ୍ତି।
ଏହି ବିରଳ ମାଛର ନାମ ହେଉଛି ସ୍କର୍ପିୟନ୍ଫିସ୍, ଯାହାର ବୈଜ୍ଞାନିକ ନାମ ହେଉଛି ସ୍କର୍ପିଓନୋପିସିସ୍ ନେଗ୍ଲେକ୍ଟା। ସେଣ୍ଟ୍ରାଲ ମେରାଇନ ମତ୍ସ୍ୟ ପ୍ରତିଷ୍ଠାନର ବୈଜ୍ଞାନିକ ଡକ୍ଟର ଜୟାଭାସ୍କରନ୍ କହିଛନ୍ତି, ଯେତେବେଳେ ଆମେ ଏହାକୁ ପ୍ରଥମଥର ପାଇଁ ଦେଖିଲୁ ସେତେବେଳେ ଏହା ଘାସରେ ଲୁଚି ରହିଥିଲା। ଏହା ଏକ ମାଛ ନା ଏକ ଛୋଟ ପଥର ଖଣ୍ଡ ତାହା ଜଣା ପଡ଼ି ନ ଥିଲା, କିନ୍ତୁ ମାତ୍ର ୪ ସେକେଣ୍ଡ ପରେ ଜଣାପଡ଼ିଥିଲା। ଏହି ମାଛ ବିଛା କିମ୍ବା ଅନ୍ୟ ଛୋଟ ଜୀଜଜନ୍ତୁ ଶିକାର କରିବା ସମୟରେ ରଙ୍ଗ ପରିବର୍ତ୍ତନ କରିଥାଏ। ଏହି ମାଛ ମଧ୍ୟ ଅତ୍ୟଧିକ ବିଷାକ୍ତ ବୋଲି ବୈଜ୍ଞାନିକମାନେ କହିଛନ୍ତି। ଏହାର ମେରୁଦଣ୍ଡ ହାଡ଼ ସମ୍ପୂର୍ଣ୍ଣ ବିଷରେ ପରିପୂର୍ଣ୍ଣ। ଏହାକୁ ଧରିବା ପାଇଁ ଅଧିକ ଯତ୍ନବାନ ହେବାକୁ ପଡ଼ିବ। ନଚେତ୍ ଏହା କ୍ଷଣକରେ ଜୀବନ ନେଇଯିବ।
ବୈଜ୍ଞାନିକଙ୍କ ଅନୁଯାୟୀ, ଏହି ବିରଳ ମାଛ ରାତିରେ ହିଁ ଶିକାର କରିଥାଏ। ଏହା ଗୋଟିଏ ସ୍ଥାନରେ ଶିକାର ପାଇଁ ଅପେକ୍ଷା କରେ। ଶିକାର ନିକଟରକୁ ଧୀରେ ଧୀରେ ଆସି ଆକ୍ରମଣ କରିଥାଏ। ଡକ୍ଟର ଜୟାଭାସ୍କରନ୍ଙ୍କ ଅନୁଯାୟୀ, ଏହି ବିରଳ ମାଛକୁ ଜାତୀୟ ସାମୁଦ୍ରିକ ଜୈବ ବିବିଧତା ସଂଗ୍ରାହାଳୟକୁ ପଠାଯାଇଛି। ଫଳରେ ଏହି ମାଛ ଉପରେ ଅଧିକ ଅଧ୍ୟୟନ କରାଯାଇପାରିବ।
