ରଙ୍ଗ ମିସ୍ତ୍ରୀ କାମ କରି ସୁନାଗହଣା ନେଇ ଚମ୍ପଟ, ଯାଜପୁର ରେଳଷ୍ଟେଶନରୁ ଅଭିଯୁକ୍ତ ଗିରଫ
21 ଢେଙ୍କିକୋଟ, ୧୮ା୬(ଡି.ଏନ.ଏ.)-କେନ୍ଦୁଝର ଜିଲା ଢେଙ୍କିକୋଟ ଫାଣ୍ଡି ଅନ୍ତର୍ଗତ ତୋରାଣିପୋଖରୀ ପଞ୍ଚାୟତ ତୋରାଣିପୋଖରୀ ଗ୍ରାମର ପ୍ରଶ୍ନଜିତ୍ ମିଶ୍ରଙ୍କ ଘରେ ରଙ୍ଗ ମିସ୍ତ୍ରୀ ଭାବେ କାମ କରୁଥିବା ଜଣେ ଯୁବକ ମଙ୍ଗଳବାର ଦ୍ୱିପ୍ରହର ସମୟରେ ସୁନାଗହଣା ଧରି ଚମ୍ପଟ ମାରିଥିଲେ। ଘରମାଲିକ ପ୍ରଶ୍ନଜିତ୍ ଏହା ଜାଣିବା ପରେ ଢେଙ୍କିକୋଟ ଫାଣ୍ଡିକୁ ଖବର ଦେଇଥିଲେ। ପ୍ରଶ୍ନଜିତ୍ ମିଶ୍ର, ତାଙ୍କ ସହଯୋଗୀ ବିଶ୍ୱନାଥ ବାରିକ ଓ ଫାଣ୍ଡି ଅଧିକାରୀ ସଦଳବଳେ ସହ ରଙ୍ଗ ମିସ୍ତ୍ରୀ ଜୋବର ସେକ୍ଙ୍କୁ ଖୋଜାଖୋଜି କରି ଯାଜପୁର ରେଳଷ୍ଟେଶନ ପର୍ଯ୍ୟନ୍ତ ଯାଇଥିଲେ। ସେଠାରେ ଜୋବର ମୁର୍ଶିଦାବାଦକୁ ଟିକେଟ କାଟି ଛିଡ଼ା ହୋଇଥିବା ବେଳେ ପୋଲିସ ତାଙ୍କୁ କାବୁ କରିବାରେ ସଫଳ ହୋଇଥିଲା। ତାଙ୍କଠାରୁ ସମସ୍ତ ଚୋରି ସୁନାଗହଣା ସମେତ ନଗଦ ୨ହଜାର ଟଙ୍କା, ଆଲମାରି ଚାବି ଜବତ ହୋଇଛି। ଏନେଇ ଘଟଗଁା ଥାନାରେ ଏକ ମାମଲା ରୁଜୁ ହୋଇଛି।
ପ୍ରଶ୍ନଜିତ୍ ନିଜ ଘର ରଙ୍ଗ କରାଇବାକୁ ପଶ୍ଚିମବଙ୍ଗ ମୁର୍ଶିଦାବାଦର ଜୋବାର ସେକ(୪୦)ଙ୍କୁ ଦେଇଥିଲେ। ମାତ୍ର କେତେଦିନ ଘର ରଙ୍ଗ ମାରିବା ପରେ ସେ ତାଙ୍କ ଘରେ ବିଶ୍ୱାସ ଜନ୍ମାଇଥିଲା ଏବଂ ଘରର ଜିନିଷପତ୍ର ଆଲମାରୀ ଚାବି କେଉଁଠାରେ ରହୁଛି ସେସବୁ ଉପରେ ନଜର ରଖିଥିଲା। ମଙ୍ଗଳବାର ପୂର୍ବାହ୍ନ ୧୧ଟା ବେଳେ ଘରେ କୌଣସି ପୁରୁଷ ନ ଥିବା ବେଳେ ୨ବୋହୂ ଘର କାମରେ ବ୍ୟସ୍ତ ଥିଲେ। ଏହାର ସୁଯୋଗ ନେଇ ଜୋବାର ସେକ୍ ଆଲମାରି ଚାବି ଖୋଲି ଗୋଟିଏ ସୁନା ହାର, ଦୁଇଟି ମଙ୍ଗଳ ସୂତ୍ର, ୪ଟି ସୁନା ଲକେଟ, ସୁନା ଚେନ, ସୁନା ବାହୁଟି ଏବଂ ନଗଦ ୨ ହଜାର ଟଙ୍କା ଧରି ଚମ୍ପଟ ମାରିଥିଲେ। ବୋହୂ ଦୁଇଜଣ ନିଜ କାମ ସାରି ରଙ୍ଗ ମିସ୍ତ୍ରୀଙ୍କୁ ନ ପାଇ ନିଜ ସ୍ବାମୀମାନଙ୍କୁ ଖବର ଦେଇଥିଲେ। ଏଣେ ଆଲମାରୀ ଚାବି ମଧ୍ୟ ମିଳି ନ ଥିଲା। ଖୋଜାଖୋଜି କରି ବିଫଳ ହେବା ଫଳରେ ପ୍ରଶ୍ନଜିତ ମିଶ୍ର ଢେଙ୍କିକୋଟ ଫାଣ୍ଡି ଅଧିକାରୀ ସତ୍ୟନାରାୟଣ ପରିଡ଼ାଙ୍କୁ ଖବର ଦେଇଥିଲେ।