ଢେଙ୍କିକୋଟ, ୧୫।୬(ଡି.ଏନ.ଏ.)-କେନ୍ଦୁଝର ଜିଲାର ଗଣପର୍ବ ହେଉଛି ରଜପର୍ବ। ମାତ୍ର ଚଳିତବର୍ଷ କରୋନା ଭାଇରସ୍ ସଂକ୍ରମଣ ପାଇଁ ରଜପର୍ବ ପାଳନରେ କଟକଣା କରାଯାଇଛି। ଜିଲାରେ ଫିକା ପଡ଼ିଛି ରଜ ମଉଜ। ନା ଅଛି ଦୋଳି, ନା ସଜବାଜ। ପିଲାଠାରୁ ବୃଦ୍ଧ ପର୍ଯ୍ୟନ୍ତ ସମସ୍ତେ ଏହି ମହାମାରୀ ପାଇଁ ଭୟଭୀତ। ଜିଲାର ଘଟଗାଁ ବ୍ଲକ ମନୋହରପୁର ପଞ୍ଚାୟତ ସୀତାବିଞ୍ଜଠାରେ ଥିବା ପୌରାଣିକ ପୀଠରେ ରଜ ସଂକ୍ରାନ୍ତିଠାରୁ ୩ଦିନ ଧରି ସୀତା ନଦୀ କୂଳରେ ରଜମେଳ ବସିଥାଏ। ଜିଲା ତଥା ଜିଲା ବାହାରୁ ଲକ୍ଷାଧିକ ଭକ୍ତଙ୍କର ଏହି ସୀତା ଠାକୁରାଣୀଙ୍କ ପୀଠକୁ ସମାଗମ ହୋଇଥାଏ। ଆଖପାଖ ଗ୍ରାମର ଚଲାପଥ ଦେଇ ଯାଉଥିବା ଭକ୍ତମାନେ ଦୋଳି ଗୀତ ଗାଇ ମେଳା ବୁଲିବା ପାଇଁ ଯାଇଥାନ୍ତି। ତିନି ଦିନ ଧରି ଏହି ପୀଠରେ ଗହଳି ଲାଗି ରହିଥାଏ। କିନ୍ତୁ ଚଳିତବର୍ଷ ସବୁ ଏକପ୍ରକାର ବନ୍ଦ ହୋଇଯାଇଛି। କଥାକଥିତ ଅଛି ସୀତା ନଦୀରେ ବୁଡ଼ ପକାଇ ସେଠାରେ ଥବା ମାତା ସୀତା ଏବଂ ତାଙ୍କ ଜମଜ ପୁତ୍ର ଲବକୁଶଙ୍କ ଦର୍ଶନ କରିଲେ ପୂର୍ବ ପୁରୁଷଙ୍କ ଆତ୍ମା ସଦ୍ଗତି ହେବା ସହ ଅପୁତ୍ରିକ ନାରୀ ପୁତ୍ରବତୀ ହୋଇଥାଏ। କିନ୍ତୁ ଏସବୁକୁ ଚଳିତବର୍ଷ ନିଷଧ କରିବା ପାଇଁ ସୀତା ଠାକୁରାଣୀ ଟ୍ରଷ୍ଟିର ସମସ୍ତ ସେଦସ୍ୟ ନିଷ୍ପତ୍ତି ନେଇଛନ୍ତି। ଯେପରି ମନ୍ଦିରକୁ କେହି ନ ଆସନ୍ତି ସେଥିପ୍ରତି ସ୍ବତନ୍ତର ଟିମ୍ ଗଠନ କରାଯାଇଥିବା ଟ୍ରଷ୍ଟିର ସଭାପତି ଦୁଃଶାସନ ନାୟକ ପ୍ରକାଶ କରିଛନ୍ତି।