ରଜ ମହୋତ୍ସବ ଉଦ୍‌ଯାପିତ

ବରୀ/ରତ୍ନଗିରି,୧୬।୬(ସ୍ବ.ପ୍ର./ଡି.ଏନ୍‌.ଏ.)- ଆଧୁନିକ ଚାକଚକ୍ୟରେ ଐତିହ୍ୟ, ସଂସ୍କୃତି, ପରମ୍ପରା, ସାହିତ୍ୟକଳା, ଲୋକଗୀତ ଓ ଭାଇଚାରା ହଜିଯାଉଛି। ଏସବୁ ଫେରିଲେ ବରୀ ହସିବା ସହ ରାଜ୍ୟ ହସିଉଠିବ ବୋଲି ଗଣପର୍ବ ରଜର ଶେଷ ଦିନରେ ବରୀ ବିଧାୟିକା ସୁନନ୍ଦା ଦାସ ସ୍ବାଇଁଖଣ୍ଡ ପଞ୍ଚାୟତ ଖରି ପଡ଼ିଆରେ ଆୟୋଜିତ ରଜ ମହୋତ୍ସବରେ ଯୋଗଦେଇ ଏକଥା କହିଛନ୍ତି। ବରୀ ଅଞ୍ଚଳରେ ୩ ଦିନ ଧରି ଧୁମ୍‌ଧାମ୍‌ରେ ରଜ ପାଳନ ହେବା ସହ ବିଧାୟିକା ଦାସ ବିଭିନ୍ନ ଅନୁଷ୍ଠାନରେ ଯୋଗଦେଇ ଭାଇଚାରାକୁ ଉଜ୍ଜୀବିତ ରଖିବା ପାଇଁ ଆହ୍ବାନ ଦେଇଛନ୍ତି। ପ୍ରତ୍ୟେକ ଓଡ଼ିଆ ୧୨ ମାସର ୧୩ ପର୍ବକୁ ପୂର୍ବଭଳି ପାଳନ କରିବା ପାଇଁ କହିଥିଲେ। ଉଦ୍‌ଯାପନୀ ଦିବସରେ ରୁଦ୍ରପୁର ପଞ୍ଚାୟତର ରଜ ଦୋଳିରେ କୁମାରୀଙ୍କ ସହ ରଜ ପାଳନ କରି ରଜକୁ ବିଦାୟ ଦେଇଥିଲେ। ବରୀ ବ୍ଲକ ଅଧୀନ ଧାରପୁର ପଞ୍ଚାୟତର କେନ୍ଦୁଆଠାରେ ବରୀର ବିଧାୟିକା ସୁନନ୍ଦା ଦାସଙ୍କୁ ସମ୍ବର୍ଦ୍ଧିତ କରି ରଜ ପାଳନ କରାଯାଇଥିଲା। ଏଥିସହ ବରୀ ପ୍ରଗତି କ୍ଲବ, ଅଲ୍ଲିପୁର ମଠ, ବାଲିଆପା, ରମ୍ପା, ବାଲିଆ, ସାହାସପୁର, ଭଅଁରା, କାଇପଡା ପ୍ରଭୃତି ଅଞ୍ଚଳରେ ରଜ ଦୋଳି ଲାଗାଯାଇ ଏହି ଉତ୍ସବ ପାଳନ କରାଯାଇଥିଲା। ରଜ ୩ ଦିନ ପରେ ବସୁମତୀ ସ୍ନାନରେ ଭିନ୍ନ ଏକ ପରମ୍ପରା ଦେଖିବାକୁ ମିଳିଥାଏ। ବସୁମତୀ ମା’କୁ ପୀଢ଼ା, ଶୀଳପୁଆ, ଦୂବ ଘାସ, ବରକୋଳି ପତ୍ର, ଅରୁଆ ଚାଉଳ, ହଳଦୀ, ଚନ୍ଦନ, ସିନ୍ଦୁର ଓ ଫୁଲ ଦେଇ ଘରେ ସଞ୍ଚିତ ଥିବା ଶସ୍ୟ ନେଇ ପୂଜାର୍ଚ୍ଚନା କରାଯାଇଥାଏ। ଶଙ୍ଖ ହୁଳହୁଳି ଦେଇ ପୃଥିବୀ ମା’କୁ ଆବାହନ କରି କୃଷି କାର୍ଯ୍ୟ ଭଲ ହେବା ପାଇଁ ଅପରାହ୍ନରେ ଚାଷୀଙ୍କ ଗହଣରେ ମିଶି ପ୍ରଭୁ ଜଗନ୍ନାଥଙ୍କ ନିକଟରେ ବିଧାୟିକା ଦାସ ପ୍ରାର୍ଥନା କରିଥିବା ଦେଖିବାକୁ ମିଳିଛି। ଉଦ୍‌ଯାପନୀ ଦିବସରେ ବିଧାୟିକାଙ୍କ ସମେତ ଚିତ୍ତରଞ୍ଜନ ଜେନା, ରତି ରଞ୍ଜନ ଜେନା, ପ୍ରଶାନ୍ତ ସାହୁ, ଦେବେନ୍ଦ୍ର ଦାସ, ଅଶୋକ ସାମଲ, ରଞ୍ଜନ ପଣ୍ଡା, ରଞ୍ଜନ ବେହେରା, କବିତା ପଣ୍ଡା ପ୍ରମୁଖ ଶତାଧିକ କୁମାରୀ ଓ ମହିଳାମାନେ ସାମିଲ ହୋଇଥିଲେ।