ଭଞ୍ଜନଗର,୧୬ା୬ (ଡି.ଏନ୍.ଏ.) – ଭଞ୍ଜନଗର ଅଞ୍ଚଳରେ ସଙ୍ଗରୋଧ କେନ୍ଦ୍ର ବାହାରୁ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଲାଣି। ଏଭଳି ସ୍ଥିତିରେ ଲୋକେ କାମ ପାଇଁ ହେଉ କି ଅନ୍ୟ କାରଣରୁ ଲକଡାଉନ୍ ନିୟମ ନ ମାନିବା ଚିନ୍ତାର ବିଷୟ ହୋଇଛି। ଜିଲାରେ ୩୦ ଯାଏ ଲକ୍ଡାଉନ୍ ଲାଗୁ ହୋଇଛି। ଶନିବାର ଓ ରବିବାର ସମ୍ପୂର୍ଣ୍ଣ ଶଟ୍ଡ଼ାଉନ ରହିଥିଲା। ସୋମବାର ରଜ ସଂକ୍ରାନ୍ତି ଥିବାରୁ ଲୋକେ ଲକ୍ଡାଉନ୍ ନିୟମକୁ ଫୁ କରି ଦେଇଥିବା ଦେଖାଯାଇଥିଲା। ସକାଳ ୭ଟାରୁ ୫ ଘଣ୍ଟା ପାଇଁ କେବଳ ଅତ୍ୟାବଶ୍ୟକ ଦୋକାନ ଖୋଲିବାକୁ ନିର୍ଦ୍ଦେଶ ଥିବାବେଳେ ଭଞ୍ଜନଗର ଅଞ୍ଚଳର ଅଧିକାଂଶ ମନ୍ଦିର ବେଆଇନ ଭାବେ ଖୋଲିଥିବା ଦେଖାଯାଇଥିଲା। ଢ଼ୁଢ଼ୁଆ ଶିବ ମନ୍ଦିରରେ ପୂଜା ଚାଲିଥିବା ବେଳେ ତହସିଲଦାର ଆଲୋକ ପ୍ରଧାନ ଅଚାନକ ସେଠାରେ ପହଞ୍ଚି ପୂଜା କରିବାକୁ ଯାଇଥିବା ଲୋକଙ୍କ ଉପରେ ଜରିମାନା ପକାଇଥିଲେ। ଏଥିସହ ପୂଜାରୀଙ୍କୁ ତାଗିଦ୍ କରିଥିଲେ। ସେହିଭଳି ଉପଜିଲାପାଳ ରାଜେନ୍ଦ୍ର ମିଞ୍ଜ, ତହସିଲଦାର ପ୍ରଧାନ, ଥାନା ଅଧିକାରୀ ସୁଦିପ୍ତ ସାହୁ ଲଣ୍ଡେଇସାହିର ୨ କୋଚିଂ ସେଣ୍ଟର ଉପରେ ସକାଳେ ଚଢ଼ାଉ କରିଥିଲେ। କୋଚିଂ ସେଣ୍ଟର ମାଲିକଙ୍କ ବିରୋଧରେ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ଉପ ଜିଲାପାଳ କହିଛନ୍ତି । ଏଥିସହ ସହରର ବିଭିନ୍ନ ଛକରେ ଉପଜିଲାପାଳଙ୍କ ନେତୃତ୍ୱରେ ବାଇକ୍ ଓ କାରରେ ଯାଉଥିବା ଲୋକଙ୍କୁ ଯାଞ୍ଚ କରାଯାଇଥିଲା । ଯେଉଁମାନେ କୋଭିଡ଼୍ ନିୟମ ଉଲ୍ଲଂଘନ କରିଥିଲେ ସେମାନଙ୍କ ଠାରୁ ଜରିମାନା ଆଦାୟ କରାଯାଇଥିଲା। ସୂଚନାଯୋଗ୍ୟ, ବର୍ତ୍ତମାନ ସୁଦ୍ଧା ଭଞ୍ଜନଗର ବ୍ଲକ ଓ ଏନଏସିରେ ସଙ୍ଗରୋଧ କେନ୍ଦ୍ର ବାହାରୁ ୫ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସୋମବାର ଚିହ୍ନଟ ହୋଇଥିବା ୨ଜଣଙ୍କ ମଧ୍ୟରୁ ଜଣେ ରାଶନ ଦୋକାନ ମାଲିକ ଓ ଅନ୍ୟ ଜଣେ ସରକାରୀ କର୍ମଚାରୀ ଥିବା ଜଣାପଡ଼ିଛି। ତେବେ ପ୍ରଶାସନ ପକ୍ଷରୁ ଏନେଇ ଆନୁଷ୍ଠାନିକ ଭାବେ କିଛି କୁହାଯାଇନାହିଁ।