୨୦୧୯-୨୦ ଯାତ୍ରା ସିଜନ୍ ପାଇଁ ଯାତ୍ରାନୁଷ୍ଠାନଗୁଡ଼ିକର ପ୍ରସ୍ତୁତି ପ୍ରାୟତଃ ଶେଷ ହୋଇଛି। ଆଉ ଯାହା ହେବ ଫିଲ୍ଡରେ (ଯାତ୍ରା ହେଉଥିବା ସ୍ଥାନରେ) ହେବ। ୨୦୧୯-୨୦ ଯାତ୍ରାବର୍ଷ ପାଇଁ ଯୁବ ନିର୍ଦ୍ଦେଶକ ରଞ୍ଜନ ବିଶ୍ୱାଳ ଦୁଇଗୋଟି ନାଟକ ପ୍ରସ୍ତୁତ କରିଛନ୍ତି। ଦୁଇଟି ଯାକ ନାଟକରେ ତାଙ୍କ ସହିତ ଅଛନ୍ତି ନାଟ୍ୟକାର ସୁକାନ୍ତ ମଲ୍ଲିକ। ଏହି ଦୁଇଗୋଟି ନାଟକ ହେଉଛି ‘ବାଘାଯତୀନ ଲୋକନାଟ୍ୟ’ର ‘ତମ ସିନ୍ଦୂର କୋଉ ସ୍ବାମୀର’ ଏବଂ ‘ସ୍ବର୍ଣ୍ଣମହଲ’ର ‘ସାବତ ସ୍ବାମୀ’। ଦୁଇଗୋଟି ନାଟକ ଭିନ୍ନ ସ୍ବାଦର ନାଟକ। ‘ତମ ସିନ୍ଦୂର କୋଉ ସ୍ବାମୀର’ ନାଟକଟି ଜଣେ ଉଚ୍ଚାଭିଳାଷୀ ଅଭିଆଡ଼ି ଝିଅର କାହାଣୀକୁ ନେଇ ଗତିଶୀଳ ହୋଇଥିବା ବେଳେ ‘ସାବତ ସ୍ବାମୀ’ ନାଟକରେ ସ୍ବାମୀସ୍ତ୍ରୀଙ୍କ ସମ୍ପର୍କର ପରିଭାଷାକୁ ସ୍ପଷ୍ଟ କରାଯାଇଛି। ଏତଦ୍ବ୍ୟତୀତ, ପାର୍ବତୀ ଗଣନାଟ୍ୟ ପାଇଁ ରଞ୍ଜନ ଏକ ନାଟକ ପ୍ରସ୍ତୁତ କରିବେ। ତାହାକୁ ସେ ଫିଲ୍ଡରେ ପ୍ରସ୍ତୁତ କରିବେ ବୋଲି ସୂଚନା ଦେଇଛନ୍ତି ରଞ୍ଜନ।
ସୂଚନାଯୋଗ୍ୟ ଯେ, ଗତ ଯାତ୍ରା ଋତୁରେ ନିର୍ଦ୍ଦେଶକ ରଞ୍ଜନ ‘ଧଉଳି ଗଣନାଟ୍ୟ’ ପାଇଁ ‘କଳାକାହ୍ନୁ ମୋର କାଳିଆ ସୁନା’, ‘ତ୍ରିନାଥ ଗଣନାଟ୍ୟ’ ପାଇଁ ‘ମୋ ସ୍ତ୍ରୀର ଗପ ନ କହିଲେ ପାପ’ ଏବଂ ‘ଯାତ୍ରା ମନ୍ଦିର’ ପାଇଁ ‘ଅଗ୍ନି ପରୀକ୍ଷା’ ଆଦି ନାଟକ ପ୍ରସ୍ତୁତ କରି ବେଶ୍ ସୁନାମ ଅର୍ଜନ କରିଥିଲେ। ଗତବର୍ଷ ଭଳି ଚଳିତବର୍ଷ ମଧ୍ୟ ତାଙ୍କର ନାଟକଗୁଡ଼ିକ ଯାତ୍ରାପ୍ରେମୀଙ୍କୁ ଭରପୂର ମନୋରଞ୍ଜନ ଯୋଗାଇବ ବୋଲି ରଞ୍ଜନ ଆଶାବାଦୀ ।