ରଣପୁର,୨୦ା୯(ସ୍ବ.ପ୍ର.): ରଣପୁର ଏନ୍ଏସିରେ ପରିମଳ ଓ ଷ୍ଟ୍ରିଟ ଲାଇଟ୍ରେ ଦୁର୍ନୀତି ହୋଇଥିବା ନେଇ ନୟାଗଡ଼ ଭିଜିଲାନ୍ସ ପକ୍ଷରୁ ଖୋଳତାଡ ଆରମ୍ଭ ହୋଇଛି । ଭିଜିଲାନ୍ସ ଡିଏସ୍ପି ଶିଶିର ଭୋଇଙ୍କ ନେତୃତ୍ୱରେ ୬ ଜଣିଆ ଦଳ ଗୁରୁବାର ଏନ୍ଏସି କାର୍ଯ୍ୟାଳୟରେ ଚଢ଼ାଉ କରି ଏ ସମ୍ବନ୍ଧୀୟ କାଗଜପତ୍ର ଜବତ କରିଛନ୍ତି।
ରଣପୁର ସହରାଞ୍ଚଳକୁ ସରସସୁନ୍ଦର କରିବା ପାଇଁ ପ୍ରତି ମାସରେ ପରିମଳ ବାବଦକୁ ୪ରୁ ୫ ଲକ୍ଷ ଟଙ୍କା ଖର୍ଚ୍ଚ କରାଯାଉଛି। ୪୨ ଜଣ ସଫେଇ କର୍ମଚାରୀ ୧୫ ୱାର୍ଡକୁ ସଫା କରୁଛନ୍ତି। ପରିମଳ ବ୍ୟବସ୍ଥା ଘରୋଇକରଣ ହୋଇଥିଲେ ମଧ୍ୟ ଭଲ ସେବା ମିଳୁ ନାହିଁ। ବିଭିନ୍ନ ୱାର୍ଡରେ କୁଢ଼ କୁଢ଼ ଆବର୍ଜନା ଜମି ରହୁଛି। ବିପର୍ଯ୍ୟସ୍ତ ପରିମଳକୁ ନେଇ ବିଭିନ୍ନ ସମୟରେ ସହରବାସୀ ପ୍ରତିବାଦ କରୁଥିଲେ ମଧ୍ୟ ପ୍ରତିକାର ବ୍ୟବସ୍ଥା ହେଉ ନ ଥିଲା । କାଗଜପତ୍ରରେ ୪୨ ସଫେଇ କର୍ମଚାରୀ ଥିବାବେଳେ ବାସ୍ତବରେ ୧୨ରୁ ୧୫ଜଣଙ୍କୁ ପ୍ରତ୍ୟହ ଦେଖିବାକୁ ମିଳୁଛି । ଅନ୍ୟପକ୍ଷେ ନିମ୍ନମାନର ବିଦ୍ୟୁତ୍ ବଲ୍ବ ସମେତ ଉପକରଣ ବ୍ୟବହାର କରି ୨ଟି ପର୍ଯ୍ୟାୟରେ ପ୍ରାୟ ୮୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଷ୍ଟ୍ରିଟ ଲାଇଟ୍ରେ ଖର୍ଚ୍ଚ କରାଯାଇଛି। ହେଲେ ବଳବ୍ ଜଳୁ ନ ଥିବାରୁ ଅଧିକାଂଶ ୱାର୍ଡ ଅନ୍ଧାରରେ ରହୁଛି। ଡିଏସ୍ପି ଭୋଇ କୁହନ୍ତି, ରଣପୁର ଏନ୍ଏସିରେ ପରିମଳ ଓ ଷ୍ଟ୍ରିଟ ଲାଇଟ୍ରେ ଦୁର୍ନୀତି ହୋଇଥିବା ଅଭିଯୋଗ ଥିଲା। ଏହା ପରେ ଧରପଗଡ ଆରମ୍ଭ କରାଯାଇ ତଦନ୍ତ ତ୍ୱରାନ୍ବିତ କରାଯାଇଛି।