ରଣପୁର,୨ା୯(ସ୍ବ.ପ୍ର.): ନୟାଗଡ ଜିଲାର ରଣପୁର ତହସିଲରେ ୬ବର୍ଷ ହେଲା ନିଲାମ ବନ୍ଦ ହୋଇଥିବାବେଳେ ଚଢ଼ାଉ ଓ ଧରପଗଡ ନ ଥିବାରୁ ଖଣି ଚୋରଙ୍କ ପ୍ରାଦୁର୍ଭାବ ବଢ଼ିଚାଲିଛି। ମୃତ ଖଣିରୁ ପଥର ଓ ମୋରମ ଖନନ ଚାଲିଛି। ବାଲି ପୋତା ଯାଉ ନ ଥିବାରୁ ଅସୁରକ୍ଷିତ ଖଣି ୩ବର୍ଷ ମଧ୍ୟରେ ୧୫ ମୁଣ୍ଡ ନେଇ ସାରିଲାଣି । ପୁଣି ରଣପୁରବାସୀଙ୍କୁ ଭୂମିକମ୍ପର ଭୟ ଘାରୁଛି । ଅନ୍ୟପକ୍ଷେ ପୋଲିସ ଓ ତହସିଲ କର୍ତ୍ତୃପକ୍ଷଙ୍କ ବେଆଇନ ଖଣି ଓ ପଥର ଚାଲାଣ ଉପରେ ଲଗାମ ରହୁନି । ଏପରିସ୍ଥଳେ ବଜ୍ରକୋଟର ସାମାଜିକ କର୍ମୀ ଦିଲୀପ କୁମାର ସାମନ୍ତରାୟ ରାଜ୍ୟ ଓ କେନ୍ଦ୍ର ପ୍ରଦୂଷଣ ବୋର୍ଡ ସଚିବ, ବିଭାଗୀୟ ମନ୍ତ୍ରୀ, ଜିଲାପାଳ, ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି।
ଅଭିଯୋଗ ଅନୁସାରେ ୨୦୧୩ରୁ ରଣପୁର ତହସିଲରେ ଖଣି ନିଲାମ ବନ୍ଦ ରହିଛି। ଏଥିଯୋଗୁ ସରକାର ଲକ୍ଷାଧିକ ଟଙ୍କାର ରାଜସ୍ବ ହରାଇଲେ। ଅନ୍ୟପଟେ ଖଣି ଚୋର, କିଛି ସରକାରୀ ଅଧିକାରୀ, କର୍ମଚାରୀ, ରାଜନେତା ଉପକୃତ ହେଉଛନ୍ତି। ତହସିଲର ଏକତାଳ, କଟକ ସହର, କନ୍ଧ ନୟାଗଡ଼, ବେଣ୍ଟ, ଚମ୍ପାଗଡ଼, ରାଇପଡା, କେରେଣ୍ଡାଟାଙ୍ଗୀ, ଚାନ୍ଦପୁର, ଗୋପାଳପୁଳ, ଓସ୍ତପଡା, ଜଙ୍କିଆ, ମୟୂରଝାଲିଆ, ନରସିଂହପୁର, ଚମ୍ପାପେଡି ଅଞ୍ଚଳରେ ୧୩୦ରୁ ଊର୍ଦ୍ଧ୍ୱ ବେଆଇନ ଖଣି ଖନନ ଚାଲିଛି। ପ୍ରାୟ ୨୦୦ରୁ ଊର୍ଦ୍ଧ୍ୱ ସ୍ଥାନରେ ଖଣି ପୋଖରୀ ତିଆରି ହୋଇସାରିଲାଣି। ଏଥିରେ ପଡି ୩ବର୍ଷ ମଧ୍ୟରେ ୧୫ଜଣ ବ୍ୟକ୍ତି ମୃତ୍ୟୁ ଘଟିଛି। ୨୦ରୁ ଊର୍ଦ୍ଧ୍ୱ ଗୃହପାଳିତ ପ୍ରାଣୀ ମଧ୍ୟ ପ୍ରାଣ ହରାଇ ସାରିଲେଣି। ବେଆଇନ ଖଣି ଖନନ ନେଇ ମୁହଁ ଖୋଲିଲେ ମାରପିଟ୍ ଓ ହତ୍ୟା ଧମକ ଦେଇ ମୁହଁ ବନ୍ଦ କରି ଦିଆଯାଉଛି। ଏପରି କି ଟଙ୍କା ଦିଆଯାଇ ମଧ୍ୟ ଚୁପ କରାଯାଉଥିବା ଅଭିଯୋଗ ରହିଛି। ଜଣେ ଖଣି ଚୋରଙ୍କ ସୂଚନା ଅନୁସାରେ ଦୋଷ ଛଡେଇବା ପାଇଁ ଲୋକଦେଖାଣିଆ ଚଢ଼ାଉ କରାଯାଏ। ହେଲେ ଚଢ଼ାଉ ପୂର୍ବରୁ ବେଆଇନ ଖଣି ଖନନ ବନ୍ଦ ରୁହେ। ମାସିକିଆ କୋଟା ଯୋଗୁ ଚଢ଼ାଉ ଭୟ ନ ଥାଏ। ଯେଉଁମାନେ ଧରା ପଡନ୍ତି ସେମାନେ କାରବାର ଚାଲୁ ରଖିବାକୁ ମାସିକିଆ କୋଟା ଦେବା ପାଇଁ ଫିକ୍ସିଂ କରିବାକୁ ବାଧ୍ୟ ହୋଇଥାନ୍ତି। ଖଣି ନିଲାମ ହେଲେ ଉପୁରି ମିଳିବା କଷ୍ଟ ହେବ । ଏଣୁ ବେଆଇନ ଖଣି ଖନନ ଚାଲୁ ରହିବାକୁ ଲାଭବାନ ଗୋଷ୍ଠୀ ଯେପରି ଲିଜ୍ ନ ହୁଏ ସେଥିପ୍ରତି ଚେଷ୍ଟା କରିଥାନ୍ତି। ଏସ୍ଟିଏଫର ନଜର ମାଙ୍କଡା ଓ ମୋରମ ଖଣି ଉପରେ ନ ଥିବାରୁ ଭୟର ସମ୍ଭାବନା ନାହିଁ ବୋଲି ସେ କହିଛନ୍ତି। ରଣପୁର ତହସିଲଦାର ସୁଶାନ୍ତ କୁମାର ପତି କୁହନ୍ତି, ଖଣି ଚଢ଼ାଉ କରିବା ପାଇଁ ପୋଲିସ ଫୋର୍ସ ଆବଶ୍ୟକତା ରହିଛି । ହେଲେ ଏସ୍ପି ଫୋର୍ସ ଦେଉ ନ ଥିବାରୁ ଚଢ଼ାଉ କରିବା କଷ୍ଟକର ହେଉଛି । ରାସ୍ତାରେ ଯାଉଥିବା ମାଙ୍କଡା ପଥର ଯାନବାହନ ଧରପଗଡ କରାଯାଉଛି । ଫୋର୍ସ ମିଳିଲେ ଚଢ଼ାଉକୁ ତ୍ୱରାନ୍ବିତ କରାଯିବ ବୋଲି ସେ ସୂଚନା ଦେଇଛନ୍ତି।