ରଣପୁର,୧୪ା୭ (ସ୍ବ.ପ୍ର.): ଦ୍ୱିତୀୟ ଶ୍ରୀକ୍ଷେତ୍ର ଭାବେ ପରିଚିତ ରଣପୁର ଘୋଷ ଯାତ୍ରାର ନବଦିନାମତ୍କ ଯାତ୍ରା ଶେଷକରି ଶୁକ୍ରବାର ଜନ୍ମବେଦୀରୁ ରତ୍ନବେଦୀ ଅଭିମୁଖେ ବାହାରିଥିବା ମହାପ୍ରଭୁଙ୍କ ବାହୁଡା ଯାତ୍ରାରେ ସମସ୍ତ କାର୍ଯ୍ୟ ଡେରି ହୋଇ ରାତ୍ର ହୋଇ ଯିବାରୁ ଠାକୁରଙ୍କ ରଥଟଣା ବନ୍ଦ ହୋଇଥିଲା। ଶନିବାର ସେବାୟତ ଓ ଦେବୋତ୍ତର ବିଭାଗର ସମନ୍ବୟ ଅଭାବରୁ ଅପ୍ରୀତିକର ପରିସ୍ଥିତି ଦେଖିବାକୁ ମିଳିଥିଲା। ରଥ ଉପରୁ ଚାରମାଳ ଖୋଲାକୁ ନେଇ ସେବାୟତ ଓ ପୂଜାପଣ୍ଡାମାନେ ଠାକୁରଙ୍କୁ ରଥ ଉପରେ ଛାଡି ପଳାଇ ଆସିଥିଲେ।
ସ୍ଥାନୀୟ ପ୍ରଶାସନ ଓ ଦେବୋତ୍ତର ବିଭାଗ ତରଫରୁ ସମସ୍ତ ନୀତିକାନ୍ତି କରାଯାଇ ରଥ ଉପରେ ତିନି ଠାକୁରଙ୍କୁ ରୁପା ବେଶ କରାଯାଇ ସକାଳ ୧୦ଟାରେ ରଥଟଣା କାର୍ଯ୍ୟ ଆରମ୍ଭ କରାଯାଇଥିଲା। ବଳଭଦ୍ରଙ୍କ ତାଳଧ୍ୱଜ ରଥକୁ ଭକ୍ତମାନେ ଟାଣିନେଇ ସିଂହଦ୍ୱାରରେ ପହଞ୍ଚାଇଥିଲେ । ସେହିପରି ସୁଭଦ୍ରାଙ୍କ ଦେବଦଳନ ରଥକୁ ମହିଳାମାନେ ଟାଣିଥିଲେ। ପରେ ଜଗନ୍ନାଥଙ୍କ ନନ୍ଦିଘୋଷ ଟାଣିବା ପାଇଁ ରଥରେ ଘୋଡା ଯୋଚାଯାଇ ଦଉଡି ସଂଯୋଗ କରାଯାଇଥିଲା। ରଥରେ କୌଣସି ପୂଜାପଣ୍ଡା ସେବାୟତ ନ ଥିବାରୁ ରଥଟଣା କାର୍ଯ୍ୟ ଦେବୋତ୍ତର ବିଭାଗ କରିପାରି ନ ଥିଲେ। ଏହାକୁ ନେଇ ଅପ୍ରୀତିକର ପରିସ୍ଥିତି ଦେଖିବାକୁ ମିଳିଥିଲା।
ସୂଚନାଯୋଗ୍ୟ ପ୍ରତିବର୍ଷ ବାହୁଡା ଯାତ୍ରାରେ ଦୁଇଟି ରଥ ଟଣାଯାଇ ସିଂହଦ୍ୱାର ନିକଟକୁ ନିଆଯାଉଥିଲା ବେଳେ ନନ୍ଦିଘୋଷ ରଥକୁ ସେହିଦିନ ଟଣାଯାଏ ନାହିଁ। ରଥ ଉପରକୁ ଯିବାକୁ ଚାରମାଳ ମଧ୍ୟ ଖୋଲାଯାଏ ନାହିଁ। ଫଳରେ ଭକ୍ତମାନେ ପବିତ୍ର ଏକାଦଶୀରେ କାଳିଆ ଠାକୁରଙ୍କୁ ରୁପା ବେଶରେ ରଥ ଉପରକୁ ଯାଇ ଦର୍ଶନ କରନ୍ତି। ପୂଜା ପଣ୍ଡାମାନେ ଭକ୍ତମାନଙ୍କ ଦାନ ଦକ୍ଷିଣାରୁ କିଛି ରୋଜଗାର ମଧ୍ୟ କରନ୍ତି। କିନ୍ତୁ ଚଳିତବର୍ଷ ଏକାଦଶୀ ତିଥିରେ ଦେବୋତ୍ତର ବିଭାଗ ତରଫରୁ ସକାଳ ୧୦ଟାରୁ ଚାରମାଳ ରଥରୁ ଖୋଲା ଯିବାରୁ ରଥ ଉପରକୁ ଭକ୍ତମାନେ ଚଢିପାରି ନ ଥିଲେ। ଫଳରେ ସେବାୟତ ଓ ପୂଜାପଣ୍ଡାମାନେ ଭକ୍ତମାନଙ୍କ ଦାନ ଦକ୍ଷିଣାରୁ ବଞ୍ଚିତ ହୋଇଥିଲେ। ଏହାକୁ ବିରୋଧ କରି ନନ୍ଦିଘୋଷ ରଥର ସମସ୍ତ ପୂଜାପଣ୍ଡା ଓ ସେବାୟତ ଠାକୁରଙ୍କ ସେବାକାର୍ଯ୍ୟ ଛାଡି ରଥ ଉପରୁ ପଳାଇ ଆସିଥିଲେ । ରଥ ଉପରେ ଏକୁଟିଆ କାଳିଆ ଠାକୁର ବସି ରହିଥିଲେ। ଏଭଳି ଘଟଣା ଭକ୍ତ ଓ ଶ୍ରଦ୍ଧାଳୁଙ୍କ ମନରେ ଗଭୀର ଆଘାତ ଦେଇଛି । ଘଟଣାକୁ ନେଇ ଥାନା ପରିସରରେ ଦେବୋତ୍ତର ବିଭାଗ, ସେବାୟତ ଓ ସାଧାରଣ ଲୋକଙ୍କୁ ନେଇ ଆଲୋଚନା କରାଯାଇଥିଲେ ମଧ୍ୟ ସମାଧାନର ବାଟ ବାହାରିପାରି ନ ଥିଲା। ଏ ସମ୍ପର୍କରେ ରଣପୁର ତହସିଲଦାର ଓ ଦେବୋତ୍ତର ବିଭାଗ ଅଧିକାରୀ ସୁଶାନ୍ତ କୁମାର ପତି କୁହନ୍ତି, ଦୁଇଟି ରଥ ସିଂହ ଦ୍ୱାରରେ ଲାଗିଲା ପରେ ନନ୍ଦିଘୋଷ ରଥକୁ ଭକ୍ତମାନେ ଟାଣିବା ପାଇଁ ପ୍ରସ୍ତୁତି ହେଉଥିଲେ। ହେଲେ ରଥ ଉପରେ କୌଣସି ପୂଜାପଣ୍ଡା ଓ ସେବାୟତ ନ ଥିବାରୁ ରଥଟଣା କାର୍ଯ୍ୟ ହୋଇପାରି ନ ଥିଲା। ସେବାୟତ ପୂର୍ଣ୍ଣଚନ୍ଦ୍ର ମହାପାତ୍ର, ପ୍ରଫୁଲ୍ଲ ଚନ୍ଦ୍ର ମହାପାତ୍ର କୁହନ୍ତି, ଦେବୋତ୍ତର ବିଭାଗ ମନଇଚ୍ଛା ରଥରୁ ଚାରମାଳ ଖୋଲିଦେବାରୁ ଭକ୍ତମାନେ ବର୍ଷକେ ଥରେ ରଥ ଉପରକୁ ଆସି ଠାକୁରଙ୍କୁ ଦର୍ଶନ କରିବାରୁ ବଞ୍ଚିତ ହୋଇଛନ୍ତି। ଏହାକୁ ବିରୋଧ କରି ଆମେ ରଥ ଛାଡି ତଳେ ବସି ରହିଛୁ।