ପୁରୀ ଅଫିସ,୧୭।୫: ରଥଖଳାରେ ବାଡ଼ିଆପିଟା। ରଥ ଅମିନ ଲକ୍ଷ୍ମଣ ମହାପାତ୍ର ଏବଂ ତାଙ୍କ ପୁଅ ସୁଧାକରଙ୍କୁ ନିସ୍ତୁକ ମାଡ଼ ମରାଯାଇଛି। ଫଳରେ ଉଭୟେ ଆହତ ହୋଇଛନ୍ତି। ସୁଧାକରଙ୍କ ଅଣ୍ଟାରେ ଗଭୀର ଆଘାତ ଲାଗିଛି। ଏନେଇ ସିଂହଦ୍ୱାର ଥାନାରେ ସେ ଅଭିଯୋଗ କରିଛନ୍ତି। ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି। ରଥ ନିର୍ମାଣ ଲାଗି କେଉଁ କାଠ ଉପଯୋଗୀ ତାହାକୁ ଚୟନ କରି ନିର୍ମାଣକାରୀଙ୍କୁ ଯୋଗାଇଥାନ୍ତି ରଥ ଅମିନ। ତେଣୁ ଏହି ଘଟଣା ପରେ ରଥ ନିର୍ମାଣ କାର୍ଯ୍ୟରେ ବିଳମ୍ବ ହୋଇପାରେ ବୋଲି କୁହାଯାଉଛି।
ଥାନାରେ ହୋଇଥିବା ଅଭିଯୋଗ ମୁତାବକ, ଶନିବାର ଦ୍ୱିପ୍ରହରରେ ରଥ ନିର୍ମାଣକାରୀ ସେବକମାନେ ରଥଖଳା ନିକଟ ନୂଆ ଜୋତାଷ୍ଟାଣ୍ଡ ପାଖରେ ଖାଉଥିଲେ। ସେଠାରେ ରଥ ଅମିନ ଓ ତାଙ୍କ ପୁଅ ମଧ୍ୟ ଖାଉଥିଲେ। ଏହାଦେଖି ମହାରଣା ସେବକ ବାବନ ମହାରଣା ଏବଂ ନାରାୟଣ ମହାରଣା ସୁଧାକରଙ୍କୁ ଏଠି କାହିଁକି ଖାଉଛୁ ବୋଲି କହିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହେବାରୁ ବାବନ ଏବଂ ନାରାୟଣ ଉଭୟେ ସୁଧାକରଙ୍କ ପାଖକୁ ଆସି ତାଙ୍କୁ ମାଡ଼ ମାରିଥିଲେ। ପୁଅକୁ ମାଡ଼ ମରାଯାଉଥିବା ଦେଖି ଲକ୍ଷ୍ମଣ ଅଟକାଇବାରୁ ତାଙ୍କୁ ମଧ୍ୟ ମାଡ଼ ମରାଯାଇଥିଲା। ଏହାପରେ ରଥ ନିର୍ମାଣକାରୀ ଅନ୍ୟ ସେବକମାନେ ହସ୍ତକ୍ଷେପ କରି ଉଭୟ ପକ୍ଷଙ୍କୁ ବୁଝାଶୁଝା କରିଥିଲେ। ମାଡ଼ରେ ସୁଧାକରଙ୍କ ଅଣ୍ଟାରେ ଗଭୀର ଆଘାତ ଲାଗିଥିବାରୁ ତାଙ୍କୁ ଅନ୍ୟ ସେବକମାନେ ସଙ୍ଗେସଙ୍ଗେ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ଏ ସମ୍ପର୍କରେ ସିଂହଦ୍ୱାର ଆଇଆଇସି ଗେହ୍ଲି ସାହୁ କହିଛନ୍ତି, ଅଭିଯୋଗକୁ ଆଧାର କରି ମାଡ଼ ମାରିଥିବା ଅଭିଯୁକ୍ତଙ୍କ ବିରୋଧରେ ଏକ ମାମଲା (ନଂ. ୪୩/୨୦୨୦) ରୁଜୁ କରାଯାଇ ଘଟଣାର ତଦନ୍ତ ଚାଲିଛି। ରବିବାର ସାକ୍ଷୀଙ୍କ ବୟାନ ନେବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ବୋଲି ଆଇଆଇସି ସାହୁ କହିଛନ୍ତି।
