କୋଲକାତା,୪।୭: ଅଭିନେତ୍ରୀରୁ ଏମ୍ପି ହୋଇଥିବା ନୁସରତ ଜହାଁ ଏବେ ପୁଣି ଆସିଛନ୍ତି ଚର୍ଚ୍ଚାକୁ। ଗୁରୁବାର ଶ୍ରୀଗୁଣ୍ଡିଚା ଅବସରରେ ସେ କୋଲକତାରେ ଆୟୋଜିତ ରଥଯାତ୍ରା ଉତ୍ସବରେ ମୁଖ୍ୟ ଅତିଥି ହୋଇଛନ୍ତି। କେବଳ ସେତିକି ନୁହେଁ ମଥାରେ ସିନ୍ଦୁର ପିନ୍ଧି ଓଢଣା ଦେଇ ସେ ଜଗନ୍ନାଥଙ୍କ ଆଳତି ମଧ୍ୟ କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜିଙ୍କ ଉପସ୍ଥିତିରେ ସେ ରଥ ମଧ୍ୟ ଟାଣିଛନ୍ତି। ତେବେ ମମତା ମୁସଲମାନଙ୍କ ସହ ଇଦ୍ରେ ସାମିଲ ହେଉଥିବା ବେଳେ ନୁସରତ ରଥଯାତ୍ରାରେ ସାମିଲ ହେବାରେ କିଛି ଅସୁବିଧା ନାହିଁ ବୋଲି ସେ କହିଛନ୍ତି। କାରଣ ମନରେ ଭକ୍ତି ଥିଲେ ଈଶ୍ୱର ଅଲଗା ନୁହେଁ ବୋଲି ସେ ଖବରଦାତାଙ୍କୁ କହିଛନ୍ତି। ସୂଚନାଯୋଗ୍ୟ, ନିକଟରେ ନୁସରତ ନିଖିଲ ଜୈନଙ୍କୁ ବିବାହ କରିଥିବା ବେଳେ ହାତରେ ଚୁଡି, ମଥାରେ ସିନ୍ଦୁର ଓ ଗଳାରେ ମଙ୍ଗଳସୂତ୍ର ପିନ୍ଧି ଶପଥ ଗ୍ରହଣ ଉତ୍ସବରେ ସଂସଦ ପହଞ୍ଚିଥିବାରୁ ତାଙ୍କର ଏହି ବେଶଭୂଷାକୁ ନେଇ ଫତଓ୍ବା ଜାରି କରାଯାଇଥିଲା। ଯାହାର କଡା ଯବାବ ରଖିଥିଲେ ନୁସରତ।