ପୁରୀ ଅଫିସ,୨୨।୬: ଚଳିତବର୍ଷ ବଡ଼ଦାଣ୍ଡରେ ଗଡ଼ିବନି ମହାପ୍ରଭୁଙ୍କ ରଥ। ମହାମାରୀ କରୋନା ସଂକ୍ରମଣକୁ ଦୃଷ୍ଟିରେ ରଖି ରଥଯାତ୍ରା ବନ୍ଦ ରଖିବା ଲାଗି ଶୁକ୍ରବାର ସୁପ୍ରିମ୍କୋର୍ଟ ରାୟ ଦେଇଥିଲେ। ଏହି ରାୟ ପରେ ବିଭିନ୍ନ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିବା ବେଳେ ଏହାକୁ ନେଇ ଉଦ୍ବେଗ ପ୍ରକାଶ କରିଛନ୍ତି ଗୋବର୍ଦ୍ଧନ ମଠର ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ। ରଥଯାତ୍ରା ବନ୍ଦ ପାଇଁ ପ୍ରାୟୋଜିତ ଯୋଜନା ହୋଇଥିବା ସେ କହିଛନ୍ତି। ରବିବାର ଏକ ଭିଡିିଓ ବାର୍ତ୍ତାରେ ଜଗଦ୍ଗୁରୁ କହିଛନ୍ତି, ରାୟର ପୁନର୍ବିଚାର ପାଇଁ ଯଦି ସୁପ୍ରିମ୍କୋର୍ଟ ଚାହିଁଥାନ୍ତେ ତେବେ ୨୦ ତାରିଖରେ ସ୍ବେଚ୍ଛାକୃତ ଭାବେ ଆବେଦନକୁ ଗ୍ରହଣ କରିପାରିଥାନ୍ତେ। ବର୍ତ୍ତମାନ ଅବକାଶକାଳୀନ ଛୁଟି ଥିଲେ ମଧ୍ୟ ବିଶେଷ ପରିସ୍ଥିତିରେ ନ୍ୟାୟାଳୟ ଖୋଲିଥାଏ। ମଙ୍ଗଳବାର ରଥଯାତ୍ରା। ମଝିରେ ମାତ୍ର ଗୋଟିଏ ଦିନ ସୋମବାର ରହିଛି। ତେଣୁ ରଥଯାତ୍ରା ବନ୍ଦ ପାଇଁ ସୁନିୟୋଜିତ ଯୋଜନା ହୋଇଥିବା ଯେ କେହି ଭାବିବାକୁ ବାଧ୍ୟ ହେବେ। ଗ୍ରୀଷ୍ମ ଅବକାଶ ଠିକ୍ ପୂର୍ବରୁ ଏଭଳି ରାୟ ଦିଆଯିବା ଏହାକୁ ସ୍ପଷ୍ଟ କରୁଛି ବୋଲି ଜଗଦ୍ଗୁରୁ ଶଙ୍କରାଚାର୍ଯ୍ୟ ପ୍ରକାଶ କରିଛନ୍ତି।