ପଟ୍ଟାଙ୍ଗି,୨୬ା୧୨(ଡି.ଏନ୍.ଏ.): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଗାଲିଗାବଡାର ଗ୍ରାମ ନିକଟସ୍ଥ ରଥିବାଲି ପର୍ଯ୍ୟଟନସ୍ଥଳୀରେ ପର୍ଯ୍ୟଟକଙ୍କ ସୁରକ୍ଷା ବ୍ୟବସ୍ଥାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ଗୋଟିଏ ଦିନ ତଳେ କଳାହାଣ୍ଡିର ଜଣେ ପର୍ଯ୍ୟଟକ ଫଟୋ ଉଠାଉଥିବା ବେଳେ ଖସିପଡ଼ି ତାଙ୍କର ମୃତ୍ୟୁ ହେବା ପରେ ଏହି ପ୍ରଶ୍ନ ଉଠିଛି।
ଏଠାରେ ପ୍ରତି ବର୍ଷ ଡିସେମ୍ବରରୁ ଫେବୃଆରୀ ଯାଏ ପର୍ଯ୍ୟଟକଙ୍କ ଭିଡ଼ ଜମେ। ଗତ ତିନି ବର୍ଷ ମଧ୍ୟରେ ଅନେକ ପର୍ଯ୍ୟଟକ ବୁଲିବାକୁ ଆସି ଫଟୋ ନେବାବେଳେ ଗୋଡ଼ ଖସି ଆହତ ହୋଇଛନ୍ତି। ୨୦୧୭ ଡିସେମ୍ବରରେ ଜୟପୁର ଅଞ୍ଚଳର ଜଣେ ଆଇନଜୀବୀ ବୁଲିବାକୁ ଆସିଥିବା ବେଳେ ଗୋଡ଼ ଖସି ସେ ଗୁରୁତର ହୋଇଥିଲେ। ୨୦୧୮ରେ ଗାଙ୍ଗମା’ ଯାତ୍ରାକୁ ଆସିଥିବା ମୀନା ବଜାରର ଜଣେ ଯୁବକ ରଥିବାଲିରେ ଫଟୋ ନେବାବେଳେ ୧୫ ଫୁଟ ତଳକୁ ଖସିପଡ଼ି ଆହତ ହୋଇଥିଲେ। ବ୍ଲକ କୃଷି ବିଭାଗର ଜଣେ କର୍ମଚାରୀ ସେହି ବର୍ଷ ଏଠାକୁ ପରିବାର ସହ ଆସିଥିବା ବେଳେ ତାଙ୍କ ଗୋଡ଼ ଖସି ସେ ବର୍ତ୍ତମାନ ଚାଲିପାରୁ ନାହାନ୍ତି। ୨୦୧୯ ବର୍ଷ ଶେଷଆଡ଼କୁ କଳାହାଣ୍ଡିର କଲେଜ ଛାତ୍ର ଜଣକ ଏଠାରେ ଖସିପଡ଼ି ପରେ ତାଙ୍କର ମୃତ୍ୟୁ ହେବା ପର୍ଯ୍ୟଟକଙ୍କୁ ଆଶଙ୍କା ଭିତରକୁ ଠେଲିଦେଇଛି। ତେଣୁ ପର୍ଯ୍ୟଟକଙ୍କ ସୁରକ୍ଷା ପାଇଁ ପ୍ରଶାସନ ଦୃଷ୍ଟି ଦେବା ଜରୁରୀ ବୋଲି ପୂର୍ବତନ ବ୍ଲକ ଅଧ୍ୟକ୍ଷ ନୃସିଂହନାଥ ବେହେରା କହିଛନ୍ତି। ବ୍ଲକରେ ଥିବା ପେଦାପାଡୁ ଗୁମ୍ଫା, ଦେଓମାଳି, ହନୁମାନ ମନ୍ଦିର ଓ ଅମ୍ପାବାଲି ପଞ୍ଚାୟତ ସାପ୍ରାଇଗୁଡ଼ା ନିକଟସ୍ଥ ଜଳପ୍ରପାତର ଉନ୍ନତି ସହ ପର୍ଯ୍ୟଟକଙ୍କ ସୁରକ୍ଷା ବ୍ୟବସ୍ଥା ପାଇଁ ସେ ଦାବି କରିଛନ୍ତି। ଏ ନେଇ ଜିଲା ପର୍ଯ୍ୟଟନ ଅଧିକାରୀ ସୁରେନ୍ଦ୍ର ଲିମା କହିଛନ୍ତି, ରଥିବାଲିର ବିଭିନ୍ନ ସ୍ଥାନରେ ପର୍ଯ୍ୟଟକଙ୍କ ସୁରକ୍ଷା ପାଇଁ ସତର୍କ ସୂଚନା ସମ୍ବଳିତ ସାଇନବୋର୍ଡ଼ ଲଗାଯିବ। ଉକ୍ତ ପର୍ଯ୍ୟଟନ ସ୍ଥଳୀର ରକ୍ଷଣାବେକ୍ଷଣ ପାଇଁ ନୂଆଗାଁ ପଞ୍ଚାୟତକୁ ସମ୍ପୂର୍ଣ୍ଣ ଦାୟିତ୍ୱ ଦିଆଯାଇଥିବା ବେଳେ ପର୍ଯ୍ୟଟନ ବିଭାଗ ମଧ୍ୟ ଆନୁସଙ୍ଗିକ ପଦକ୍ଷେପ ନେବ। ବ୍ଲକର ଅନ୍ୟ ପର୍ଯ୍ୟଟନସ୍ଥଳୀର ଉନ୍ନତି ପାଇଁ ଜିଲାପାଳ ଓ ରାଜ୍ୟ ସରକାରଙ୍କୁ ଅବଗତ କରାଯିବ।