ଏଡିନବର୍ଗ,୩୦।୯: ଜରୁରୀ ପରିସ୍ଥିତିରେ ବିମାନର ଅବତରଣ କରାଯିବା କଥା ଶୁଣିଥିବେ। ହେଲେ କେବେ ଶୁଣିଛନ୍ତି କି, ଏକ ଝିଙ୍କ ପାଇଁ ବିମାନର ଉଡ଼ାଣ ବନ୍ଦ କରିଦିଆଯାଇଥିବା । କଥାଟି ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏଭଳି ଘଟଣା ଦେଖିବାକୁ ମିଳିଛି ସ୍କଟ୍ଲାଣ୍ଡ ସହରରେ। ସୂଚନାଯୋଗ୍ୟ, ଷ୍ଟୋରନୋଓ୍ବେରୁ ଇନଭରନେସ୍କୁ ଯିବା ପାଇଁ ଉଡାଣ ଭରିବାର କିଛି ସମୟ ପୂର୍ବରୁ ପାଇଲଟ ବିମାନକୁ ଅଟକାଇ ଦେଇଥିଲେ। କାରଣ ଥିଲା ଗୋଟିଏ ଝିଙ୍କ। ଝିଙ୍କଟି ରନଓ୍ବେରେ ଥିବା ଦେଖି ପାଇଲଟ ବିମାନକୁ ଅଟକାଇ ସେ ରାସ୍ତା ପାର ହେବା ପର୍ଯ୍ୟନ୍ତ ଅପେକ୍ଷା କରିଥିଲେ। ଅନ୍ୟପଟେ ବିମାନ ଅଟକିବା ଦେଖି ଯାତ୍ରୀମାନେ ଭୟଭୀତ ହୋଇପଡ଼ିଥିଲେ। ବିମାନରେ ଯାନ୍ତ୍ରିକ ତ୍ରୁଟି ଯୋଗୁ ବୋଧହୁଏ ପାଇଲଟ ଜରୁରୀ ଅବତରଣ କରିଛନ୍ତି ବୋଲି ଭାବିଥିଲେ। ତେବେ ରନଓ୍ବେରେ ଝିଙ୍କ ଯାଉଥିବାରୁ ଆମେ ଅପେକ୍ଷା କରିଛୁ ବୋଲି ରେଡିଓରେ ପାଇଲଟଙ୍କ ଘୋଷଣା ଶୁଣିବା ପରେ ଆଶ୍ଚର୍ଯ୍ୟ ହୋଇପଡ଼ିଥିଲେ ଯାତ୍ରୀ। ଏଥିପାଇଁ ବିମାନଟି ୨ମିନିଟ୍ ବିଳମ୍ବରେ ଉଡିଥିବା ଜଣାପଡ଼ିଛି।
