ଭୁବନେଶ୍ୱର,୪-୧୦: ସରକାର ପିଆଜ ରପ୍ତାନିକୁ ନିଷେଧ ଏବଂ ମହଜୁଦ ଉପରେ ସୀମା ଲଗାଇବା ପରେ ଏହାର ଦର ଆସ୍ତେ ଆସ୍ତେ କମୁଛି। ଏହାର ପାଇକାରୀ ଦର ମହାରାଷ୍ଟ୍ରର ଲାସାଲଗାଁରେ ୩୦ ଟଙ୍କାରୁ ନିମ୍ନ ସ୍ତରକୁ ଖସିଛି। ଅପରପକ୍ଷରେ ସାରା ଦେଶରେ କିଛି ଭାଗରେ ପିଆଜର ଉଭୟ ପାଇକାରୀ ଏବଂ ଖୁଚୁରା ମୂଲ୍ୟ କମୁଥିବା ଗୁରୁବାର କେନ୍ଦ୍ର ଖାଉଟି ବ୍ୟାପାର ମନ୍ତ୍ରୀ ରାମ ବିଳାସ ପାଶ୍ୱାନ କହିଛନ୍ତି। କିଛି ଦିନ ତଳେ ଜାତୀୟ ରାଜଧାନୀ ନୂଆଦିଲ୍ଲୀ ସମେତ ଦେଶର ଆଉ କିଛି ସ୍ଥାନରେ ପିଆଜ ଦର ୬୦ରୁ ୭୦ ଟଙ୍କା ଛୁଇଁଥିଲା। ଗୁରୁବାର ପିଆଜ ଦର ୬୦ ଟଙ୍କା ତଳକୁ ଖସିଥିବା ବଜାର ଡାଟାରୁ ଜଣା ପଡିଛି।
ସେ କହିଛନ୍ତି ଯେ, ସରକାର ଉଭୟ ଚାଷୀ ଏବଂ ଲୋକଙ୍କ ସ୍ବାର୍ଥକୁ ଧ୍ୟାନରେ ରଖିଛନ୍ତି। ଖୁଚୁରା ଏବଂ ପାଇକାରୀ ବ୍ୟବସାୟୀଙ୍କ ଲାଗି ପିଆଜ ମହଜୁଦ ସୀମା ଯଥାକ୍ରମେ ୧୦୦ ଏବଂ ୫୦୦ କୁଇଣ୍ଟାଲ ଧାର୍ଯ୍ୟ କରାଯାଇଛି। ସରକାର ୫୬,୦୦୦ ଟନ୍ ବଫର ଷ୍ଟକ ମଧ୍ୟରୁ ୧୮୦୦୦ ଟନ ବଜାରକୁ ଛାଡିଛନ୍ତି। ଷ୍ଟକରେ ଏବେ ମଧ୍ୟ ବୃହତ୍ତ ପରିମାଣର ପିଆଜ ରହିଛି। ଏହି ଷ୍ଟକରୁ ରାଜ୍ୟଗୁଡିକ ସେମାନଙ୍କ ଆବଶ୍ୟତା ଅନୁସାରେ ପିଆଜ ନେବା ଲାଗି କୁହାଯାଇଛି। ଦର ନିୟନ୍ତ୍ରଣ କରିବା ଲାଗି ରାଜ୍ୟ ଯୋଗାଣକୁ ଉନ୍ନତ କରିବା ସହ କିଲୋ ପିଛା ୨୩.୯୦ ଟଙ୍କାରେ ପିଆଜ ଲୋକଙ୍କୁ ବିକ୍ରି କରିବାକୁ କୁହାଯାଇଥିବା ପାଶ୍ୱାନ ସ୍ପଷ୍ଟ କରିଛନ୍ତି।
ପିଆଜ ଉପରେ ରପ୍ତାନୀ କଟକଣା ଏବଂ ମହଜୁଦ ସୀମା ଉପରେ ଲାଗୁ ହେବା ପରେ ଏସିଆର ସର୍ବବୃହତ୍ତ ପିଆଜ ବଜାର ମହାରାଷ୍ଟ୍ରର ଲାସାଲଗାଉଁରେ ଉପଲବ୍ଧତା ସ୍ଥିତି ସୁଧୁରିଛି। ପିଆଜର ପାଇକାରୀ ମୂଲ୍ୟ ୫୧ ଟଙ୍କାରୁ ଖସି ୩୦ ଟଙ୍କା ତଳକୁ ଆସିଥିବା ନ୍ୟାଶନାଲ ହର୍ଟିକଲଚର ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ଫାଉଣ୍ଡେଶନ (ଏନ୍ଏଚ୍ ଆର୍ଡିଏଫ୍) ସୂଚନା ଦେଇଛି। ଏଠାରେ ଶୁକ୍ରବାର ପିଆଜର ମୋଡାଲ ପାଇକାରୀ ମୂଲ୍ୟ ୨୬ ଟଙ୍କା ରହିଛି। ସେହିଭଳି ମୂଲ୍ୟ ସର୍ବୋଚ୍ଚ ମୂଲ୍ୟ ୩୦.୩୨ ଟଙ୍କା ଥିବା ବେଳେ ଅନ୍ୟୁନ ୧୫ ଟଙ୍କାକୁ ଖସୁଥିବା ଦେଖାଯାଉଛି। ଲାସାଲଗାଉଁ ମଣ୍ଡି ସାରା ଦେଶ ଲାଗି ପିଆଜର ମୂଲ୍ୟ ଧାରା ନିର୍ଦ୍ଧାରଣ କରୁଥିବା ବେଳେ ଏଠାରେ ଦର ହ୍ରାସ ବୃଦ୍ଧି ହେଲେ ଏହାର ପ୍ରଭାବ ସାରା ଦେଶରେ ଦେଖାଯାଇଥାଏ।
ପିଆଜ ଉତ୍ପାଦନକାରୀ ରାଜ୍ୟଗୁଡିକରେ ଅଗଷ୍ଟ ମାସରେ ବନ୍ୟା ଯୋଗୁ ଯୋଗାଣ ପ୍ରଭାବିତ ହୋଇଛି। ଏହାବାଦ ଖରିଫ ଚାଷ ଉପରେ ଏହାର ପ୍ରଭାବ ପଡିଛି। ବର୍ତ୍ତମାନ ଗତବର୍ଷର ରବି ଋତୁର ଗଛିତ ପିଆଜ ବ୍ୟବହାର ହେଉଛି। ଚଳିତ ବର୍ଷର ଖରିଫ ଫସଲ ନଭେମ୍ବର ପରେ ବଜାରକୁ ଆସିବ। ପିଆଜର ଦରବୃଦ୍ଧି ସାଧାରଣ ଲୋକଙ୍କ ଉପରେ ଗଭୀର ପ୍ରଭାବ ପକାଉଥିବାରୁ ରିଟେଲ ବଜାର ଦରକୁ ନିୟନ୍ତ୍ରଣ ଲାଗି ସରକାର ପଦକ୍ଷେପ ନେଉଛନ୍ତି ମାତ୍ର ଏହା ସତ୍ତ୍ୱେ ଏବେ ଏହା ମଧ୍ୟ ଉଚ୍ଚରେ ରହିଛି। ନୂଆଦିଲ୍ଲୀରେ ଲୋକଙ୍କୁ ଶସ୍ତାରେ ପିଆଜ ଯୋଗାଇବା ଲାଗି ରାଷ୍ଟ୍ରାୟତ୍ତ ମଦର ଡେରୀ ଏବଂ ଏନ୍ସିସିଏଫ୍ ୨୩.୯୦ ଟଙ୍କାରେ ପିଆଜ ଯୋଗାଉଛନ୍ତି।