ବାହାନଗା, ୪ା୩ – ପ୍ଲାଷ୍ଟିକ ମୁକ୍ତ, ପଲିଥିନ ମୁକ୍ତ ପରିବେଶ ଗଢିବା ଆମ ପାଇଁ ଏବେ ଚ୍ୟାଲେଞ୍ଜ ହୋଇପଡିଛି। ହେଲେ ବାଲେଶ୍ୱର ଜିଲା ବାହାନଗା ବ୍ଲକ ଗୋପାଳପୁର ପଞ୍ଚାୟତରେ ଥବା ସ୍ବଚ୍ଛ ଭାରତ ଅଭିଯାନ ସଙ୍ଗଠନ ଏହି ଚ୍ୟାଲେଞ୍ଜକୁ ମୁକାବିଲା କରିବାକୁ ଆଗେଇ ଆସିଛନ୍ତି। ପ୍ରତ୍ୟେକ ରବିବାର ସକାଳ ସାଢେ ୬ଟାରୁ ସାଢେ ୮ଟା ସଙ୍ଗଠନର ସଦସ୍ୟମାନେ ୨ଘଣ୍ଟା ସଫେଇ କାର୍ଯ୍ୟରେ ନିୟୋଜିତ କରି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ୨୦୧୪ ମସିହା ଅକ୍ଟୋବର ୨ ତାରିଖରୁ ଜନ୍ମ ହୋଇଥିବା ଏହି ସଙ୍ଗଠନ ୫ ବର୍ଷ ମଧ୍ୟରେ ରାଜ୍ୟର ବିଭିନ୍ନ ସ୍ଥାନ ବୁଲି ୧୦ କୁଇଣ୍ଟାଲ ପ୍ଲାଷ୍ଟିକ ସଂଗ୍ରହ କରିଛନ୍ତି। ଏହି ସଙ୍ଗଠନରେ ୧୦୦ ଜଣ ମହିଳା ପୁରୁଷ ଅଛନ୍ତି। ସେମାନେ ବଜାର, ରାସ୍ତାଘାଟ, ବିଦ୍ୟାଳୟ, ଶିକ୍ଷାନୁଷ୍ଠାନ ସମେତ ବିଭିନ୍ନ ଶୈବପୀଠ, ଜିଲା ଓ ଜିଲା ବାହାର ପର୍ଯ୍ୟଟନସ୍ଥଳୀଗୁଡିକରେ ସଫେଇ କରି ବେଶ୍ ପ୍ରଂଶସା ସାଉଣ୍ଟିଛନ୍ତି। ସୁସ୍ଥ ସମାଜ ଗଠନ କରିବା ତଥା ପ୍ଲାଷ୍ଟିକମୁକ୍ତ ଭାରତ ଗଠନ କରିବା ସଙ୍ଗଠନର ମୁଖ୍ୟ ଉଦ୍ଦେଶ୍ୟ। ତେବେ ଧରିତ୍ରୀ ଦ୍ୱାରା ପ୍ଲାଷ୍ଟିକମୁକ୍ତ ଓଡିଶା ଗଠନ ପାଇଁ ଚଳାଇଥିବା ପେପର ବ୍ୟାଗ ସଚେତନତା ପ୍ରୟାସରେ ସଙ୍ଗଠନର କର୍ମକର୍ତ୍ତାମାନେ ସାମିଲ ହୋଇଛନ୍ତି। ସେମାନେ ବିଭିନ୍ନ କାର୍ଯ୍ୟକ୍ରମରେ ଲୋକମାନଙ୍କୁ ଧରିତ୍ରୀ ପେପର ବ୍ୟାଗ କରି ପ୍ରଦର୍ଶିତ କରି ଲୋକମାନଙ୍କୁ ପଲିଥିନ୍ ବ୍ୟବହାର ବନ୍ଦ କରି ପେପରବ୍ୟାଗ ମାଧ୍ୟମରେ ନିଜର ଆବଶ୍ୟକ ପୂରଣ କରିବା ପାଇଁ ସଚେତନ କରୁଛନ୍ତି। ଏଭଳି ଉଦ୍ୟମ ଲାଗି ୨୦୧୭ରେ ରାଜ୍ୟ ସରକାର ସଙ୍ଗଠନକୁ ଭୁବନେଶ୍ୱରଠାରେ ପୁରସ୍କୃତ କରିବା ସହିତ ସମ୍ମାନିତ ମଧ୍ୟ କରିଥିଲେ। ସେହିପରି ୨୦୧୮ରେ ବାଲେଶ୍ୱର ଜିଲାପାଳ, ୨୦୧୯ରେ ରାଜ୍ୟପାଳ ଓ କେନ୍ଦ୍ରମନ୍ତ୍ରୀ ସଙ୍ଗଠନକୁ ସମ୍ମାନିତ କରିଥିଲେ। ପୂର୍ବରୁ ସଫେଇ ସମୟରେ ଅଳିଆ ଆବର୍ଜନାଗୁଡିକୁ ଗୋଟାଇ ପୋଡି ଦିଆଯାଉଥିବା ବେଳେ ତାହା ବାୟୁ ପ୍ରଦୂଷଣ ହେଉଥିବାରୁ ସରକାର ପ୍ଲାଷ୍ଟିକଗୁଡିକୁ ନ ପୋଡି ସରକାରଙ୍କୁ ବିକ୍ରି କରିବା ପାଇଁ ଘୋଷଣା କରିବାଠାରୁ ସେମାନେ ବସ୍ତାରେ ଗଚ୍ଛିତ କରି ରଖିଛନ୍ତି। ଗଚ୍ଛିତ ପ୍ଲାଷ୍ଟିକ ଏବେ ୧୦କୁଇଣ୍ଟାଲରୁ ଅଧିକ ହେଲାଣି ା ସେଗୁଡିକୁ ପିଡବ୍ଲ୍ୟୁଡି ବିଭାଗ ଦ୍ୱାରା ସରକାରକୁ ହସ୍ତାନ୍ତର କରିବା ପାଇଁ ଲକ୍ଷ୍ୟ ରଖାଯାଇଛି ା ସଙ୍ଗଠନର ଆବାହକ ସୁଦର୍ଶନ ମହାପାତ୍ର କୁହନ୍ତି, ସ୍ବଚ୍ଛତା ନିମନ୍ତେ ଏହା ଆମର ସାମାନ୍ୟ ଅବଦାନ। ଧରିତ୍ରୀ ଖବରକାଗଜ ଯେପରି ପ୍ଲାଷ୍ଟିକମୁକ୍ତ ନିମନ୍ତେ ପେପର ବ୍ୟାଗ ତିଆରି ପ୍ରତିଯୋଗିତା କରି ଲୋକମାନଙ୍କୁ ସଚେତନ କରିଛି ତାହା ସ୍ବାଗତଯୋଗ୍ୟ ପଦକ୍ଷେପ। ଆମ କର୍ମକର୍ତ୍ତାମାନେ ପଲିଥିନ ବ୍ୟବହାର ନ କରି ଧରିତ୍ରୀର ଆହ୍ବାନକୁ ଲୋକମାନଙ୍କ ପାଖରେ ପହଞ୍ଚାଇ ସଚେତନ କରାଉଛନ୍ତି।
ରିପୋର୍ଟ-ଅରୂପ ଦାସ