ରସୁଲପୁର,୧୧।୧୦(ଡି.ଏନ୍.ଏ.)- ରସୁଲପୁର ବ୍ଲକକୁ ଗୁରୁବାର ଅପରାହ୍ନରେ ପଞ୍ଚାୟତିରାଜ ବିଭାଗର ଅତିରିକ୍ତ ସଚିବ ସତ୍ୟନାରାୟଣ ଦାଶ ଗସ୍ତରେ ଆସି ଫେରି ଯାଇଛନ୍ତି। ସେ ବ୍ଲକର ବିଭିନ୍ନ ଉନ୍ନୟନମୂଳକ କାର୍ଯ୍ୟକୁ ସମୀକ୍ଷା କରିବା ସହ ବିଭିନ୍ନ ନଥିପତ୍ର ଯାଞ୍ଚ କରିଥିଲେ। ଏହି ଅବସରରେ ସେ ବ୍ଲକର ମୁଗୁପାଳ, ନରସିଂହପୁର, ରାଜେନ୍ଦ୍ରପୁର ପଞ୍ଚାୟତକୁ ପରିଦର୍ଶନରେ ଯାଇଥିଲେ। ବିଶେଷକରି ପଞ୍ଚାୟତର ପାନୀୟଜଳ ପ୍ରକଳ୍ପ, ସ୍ବଚ୍ଛତା ମିଶନ କାର୍ଯ୍ୟକାରୀତାର ସ୍ଥିତି ପରଖିଥିଲେ। ଏନେଇ ବିଭାଗୀୟ ଅଧିକାରୀଙ୍କ ସହ ମଧ୍ୟ ଆଲୋଚନା କରି ସମସ୍ୟା ସମ୍ପର୍କରେ ପଚାରି ବୁଝିଥିଲେ। ସରକାରଙ୍କ ଘୋଷଣା ମୁତାବକ ପ୍ରତ୍ୟେକ ମାସରେ ସଚିବମାନେ ଜିଲାଗସ୍ତରେ ଆସି ଗାଁକୁ ଯିବେ। ତୃଣମୂଳସ୍ତରରେ ହୋଇଥିବା ଉନ୍ନୟନକାର୍ଯ୍ୟର ସ୍ଥିତି ସମ୍ପର୍କରେ ସମୀକ୍ଷା କରିବେ। ଏହିକ୍ରମରେ ସଂସ୍କୃତି ଓ ପର୍ଯ୍ୟଟନ ସଚିବ ମୋନା ଶର୍ମା, ପୂର୍ବତନ ଯୋଗାଣ ସଚିବ ବୀର ବିକ୍ରମ ଯାଦବ, ବୟନ ଶିଳ୍ପ ସଚିବ ଶୋଭାଶର୍ମା ପ୍ରମୁଖ ପୂର୍ବରୁ ଏହି ବ୍ଲକ ଗସ୍ତରରେ ଆସି ଜାତୀୟ ରାଜପଥ ପାର୍ଶ୍ୱସ୍ଥ ପଞ୍ଚାୟତ ପରିଦର୍ଶନ କରି ଫେରି ଯାଇଛନ୍ତି। ଗୁରୁବାର ଗସ୍ତରେ ଆସିଥିବା ଅତିରିକ୍ତ ସଚିବ ଦାଶ ପୁରୁଣା ଦୋଷକୁ ଦୋହରାଇବାକୁ ଭୁଲି ନାହାନ୍ତି। ସେ ମଧ୍ୟ ତାଙ୍କ ଗସ୍ତ କାଳରେ ରାଜପଥ ପାର୍ଶ୍ୱସ୍ଥ ପଞ୍ଚାୟତର ଉନ୍ନୟନ କାର୍ଯ୍ୟକୁ ସମୀକ୍ଷା କରିବାରେ ସାମିଲ କରିଥିବା ଘଟଣାରୁ ଏହା ସ୍ପଷ୍ଟ ହୋଇଛି। ବିଭାଗୀୟ ସଚିବ ଓ ଉଚ୍ଚ ପଦସ୍ଥ ଅଧିକାରୀମାନେ ବ୍ଲକର ଅପହଞ୍ଚ ପଞ୍ଚାୟତ ଭାବରେ ଜଣାଶୁଣା ବ୍ରହ୍ମବରଦା, ବନ୍ଧଡିହ, ଲକ୍ଷ୍ମୀନଗର, ଟିକରପଡା, ଶ୍ରୀବନ୍ତପୁର ଆଦି ପଞ୍ଚାୟତରେ ସଚିବମାନଙ୍କ ପାଦ ପଡୁନାହିଁ। ଫଳରେ ବ୍ଲକର ବାସ୍ତବ ବିକାଶ ଚିତ୍ର ସରକାରଙ୍କ ଦୃଷ୍ଟି ଆଢୁଆଳରେ ରହିଯାଉଛି। ଏବେ ବି ସେ ସବୁ ପଞ୍ଚାୟତରେ ଉନ୍ନୟନ କାର୍ଯ୍ୟକୁ ନେଇ ପ୍ରଶ୍ନବାଚୀ ରହିଛି। ତେବେ ବ୍ଲକ ଆଖପାଖ ଅଞ୍ଚଳର କେତେକ ସଫଳ ପଞ୍ଚାୟତର ରିପୋର୍ଟକାର୍ଡକୁ ନେଇ ବ୍ଲକର ସାମଗ୍ରିକ ବିକାଶର ରିପୋର୍ଟ ଭାବରେ ଗ୍ରହଣ କରାଯିବା ଘଟଣାକୁ ବୁଦ୍ଧିଜୀବୀଙ୍କ ମହଲରେ ନାପସନ୍ଦ କରାଯାଇଛି। ଅତିରିକ୍ତ ସଚିବ ଦାଶଙ୍କ ସହ ଜିଲା ପଞ୍ଚାୟତ ଅଧିକାରୀ ଅଶୋକ କୁମାର ସେଠୀ, ରସୁଲପୁର ବିଡିଓ ଉମାକାନ୍ତ ପରିଡା, ଏବିଡିଓ ଅସିତ୍ କୁମାର ପାତ୍ର, ଗ୍ରାମ୍ୟପାନୀୟ ଜଳଯୋଗାଣ ସହକାରୀ ଯନ୍ତ୍ରୀ ଚିତ୍ତରଞ୍ଜନ ସାହୁ, ଗ୍ରାମପଞ୍ଚାୟତ ଅଧିକାରିଣୀ ଦିବ୍ୟକାନ୍ତି ମିଶ୍ର, ବ୍ଲକ ସହକାରୀ ଯନ୍ତ୍ରୀ ଯତିନ୍ଦ୍ର ମୋହନ ସ୍ବାଇଁ, ଯନ୍ତ୍ରୀ ଅନିତା ପ୍ରଧାନ, ସ୍ମୃତିରେଖା ଧଡ଼ା ପ୍ରମୁଖ ଯୋଗଦେଇଥିଲେ। ଅତିରିକ୍ତ ସଚିବ ଦାଶ ପୂର୍ବାହ୍ନରେ ଭଦ୍ରକ ଜିଲା ଭଣ୍ଡାରୀପୋଖରୀ ବ୍ଲକକୁ ପରିଦର୍ଶନରେ ଯାଇଥିଲେ। ଉକ୍ତ ବ୍ଲକରେ ସେ ପାନୀୟ ଜଳ ପ୍ରକଳ୍ପ, ପାଇଖାନା, ପୋଖରୀ ପୁନଃରୁଦ୍ଧାର, ସୌରଚାଳିତ ପାଣି ପ୍ରକଳ୍ପ, ବିଦ୍ୟାଳୟ ଗୃହ ନିର୍ମାଣ ଆଦିକୁ ବୁଲି ଦେଖିଥିଲେ।