କିଙ୍ଗ୍ଷ୍ଟନ,୧୩।୯: ଚଳିତ କାରିବିଅନ ଲିଗ୍ରେ ଗୁରୁବାର ଖେଳାଯାଇଥିବା ମ୍ୟାଚ୍ରେ ଓ୍ବେଷ୍ଟଇଣ୍ଡିଜ ଅଲରାଉଣ୍ଡର ଆନ୍ଧ୍ରେ ରସେଲଙ୍କ ହେଲ୍ମେଟ୍ରେ ବଲ ବାଜିଛି। ସେଣ୍ଟ ଲୁସିଆ ଜୁକ୍ସ ଦଳର ପେସର ହାର୍ଡୁସ ଭିଜୋଏନ୍ଙ୍କ ବାଉନ୍ସରକୁ ଜମାଇକା ତାଲାଓ୍ବାସ ପକ୍ଷରୁ ଖେଳୁଥିବା ରସେଲ ପୁଲ୍ ଶଟ ଖେଳିବାକୁ ଉଦ୍ୟମକରି ବିଫଳ ହୋଇଥିଲେ। ବଲ ତାଙ୍କ ଡାହାଣ କାନ ପାଖରେ ବାଜିଥିଲା। ବଲ ବାଜିବା ପରେ ସେ ଚେତା ହରାଇ ପଡ଼ିଆରେ ପଡ଼ିଯାଇଥିଲେ। ସଙ୍ଗେ ସଙ୍ଗେ ତାଙ୍କୁ ଫିଲ୍ଡର ଓ ଅନ୍ୟ ବ୍ୟାଟ୍ସମ୍ୟାନ ଘେରି ତାଙ୍କ ସହ କଥା ହେବାକୁ ଚେଷ୍ଟା କରିଥିଲେ। ମେଡିକାଲ ଟିମ୍ ଗ୍ରାଉଣ୍ଡକୁ ଆସିବା ପରେ ରସେଲ ଫିଲ୍ଡରଙ୍କ ସହାୟତାରେ ଛିଡ଼ାହେବାକୁ ସକ୍ଷମ ହୋଇଥିଲେ। କିଛି ବାଟ ଚାଲିବା ପରେ ତାଙ୍କୁ ଷ୍ଟ୍ରେଚରରେ ନିଆଯାଇଥିଲା। ତାଙ୍କୁ ସ୍କାନ୍ ପାଇଁ ମେଡିକାଲ ନିଆଯାଇଥିଲା। ରିପୋର୍ଟରେ ସବୁ ଠିକ୍ ଥିବା ଦର୍ଶାଇବା ପରେ ତାଙ୍କୁ ଦଳୀୟ ହୋଟେଲରେ ବିଶ୍ରାମ କରିବାକୁ ଦିଆଯାଇଛି। ଶନିବାର ଟ୍ରିନବାଗୋ ନାଇଟ୍ ରାଇଡର୍ସ ବିପକ୍ଷ ମ୍ୟାଚ୍ରେ ଖେଳିବେ କି ନାହିଁ, ତାହା ସ୍ପଷ୍ଟ ହୋଇନାହିଁ ବୋଲି ଅଫିସିଆଲ କହିଛନ୍ତି। ଏଭଳି ଆହତ ସମସ୍ୟାକୁ ଅନ୍ତର୍ଜାତୀୟ କ୍ରିକେଟରେ ଏବେ ଅଧିକ ଗୁରୁତ୍ୱ ଦିଆଯାଉଛି। ନିକଟରେ ମାର୍ନୁସ ଲାବାସ୍କଗ୍ନେ (ଅଷ୍ଟ୍ରେଲିଆ) ଓ ଜେର୍ମିନେ ବ୍ଲାକଉଡ୍ (ଓ୍ବେଷ୍ଟଇଣ୍ଡିଜ) ଯଥାକ୍ରମେ ଷ୍ଟିଭ ସ୍ମିଥ୍ ଓ ଡାରେନ ବ୍ରାଭୋଙ୍କ ବଦଳରେ ଟେଷ୍ଟ ମ୍ୟାଚ୍ର ଦ୍ୱିତୀୟ ଇନିଂସ ଖେଳିଥିଲେ। ଉଭୟଙ୍କ ମୁଣ୍ଡରେ ବଲ ବାଜିବା ପରେ ଆଉ ପଡ଼ିଆକୁ ଫେରି ନ ଥିଲେ। ସିପିଏଲ ମ୍ୟାଚ୍ରେ ଜାମାଇକା ଧାର୍ଯ୍ୟ ୨୦ ଓଭରରେ ୫ ଉଇକେଟ ହରାଇ ୧୭୦ ରନ୍ କରିଥିଲେ। ଜବାବରେ ୧୬.୪ ଓଭରରେ ସମାନ ସଂଖ୍ୟକ ଉଇକେଟ ହରାଇ ବିଜୟଲକ୍ଷ୍ୟ ହାସଲକରି ନେଇଥିଲା ସେଣ୍ଟ ଲୁସିଆ ଦଳ।