ଚିଟ୍ଟାଗଙ୍ଗ, ୫ା୯ (ଏଏଫ୍ପି)- ବ୍ୟାଟ୍ସମ୍ୟାନ ରହମତ ଶାହ ଆଫଗାନିସ୍ତାନର ପ୍ରଥମ କ୍ରିକେଟର ଭାବେ ଏକ ଟେଷ୍ଟ ଶତକ ହାସଲ କରିଛନ୍ତି। ଏଠାରେ ଗୁରୁବାର ବାଂଲାଦେଶ ବିପକ୍ଷରେ ଆରମ୍ଭ ହୋଇଥିବା ଏକମାତ୍ର ଟେଷ୍ଟ ମ୍ୟାଚରେ ସେ ଏହି ସଫଳତା ହାସଲ କରିଛନ୍ତି। ଶାହ ୧୦୨ରନ କରିଥିବାବେଳେ ଚତୁର୍ଥ ଉଇକେଟରେ ଅସଘର ଆଫଗାନଙ୍କ ସହିତ ୧୨୦ ରନର ଗୁରୁତ୍ୱପୂର୍ଣ୍ଣ ଭାଗୀଦାରି କରିଛନ୍ତି। ଘରୋଇ ଦଳର ସ୍ପିନ ଆକ୍ରମଣ ଏହି ଦୁଇ ବ୍ୟାଟ୍ସମ୍ୟାନଙ୍କ ଉପରେ ପ୍ରଭାବ ଜାହିରି କରିପାରି ନ ଥିଲା। ସ୍ଥାନୀୟ ଜହୁର ଅହମ୍ମଦ ଚୌଧୁରୀ ଷ୍ଟାଡିୟମରେ ଚାଲିଥିବା ଏହି ମ୍ୟାଚରେ ଆଫଗାନିସ୍ତାନ ଷ୍ଟମ୍ପ୍ସ ଅପସାରଣ ବେଳକୁ ୫ ଉଇକେଟ ବିନିମୟରେ ୨୭୧ ରନ କରିଛି। ଷ୍ଟମ୍ପ୍ସ ଅପସାରଣ ବେଳକୁ ଅସଘର ୮୮ ଏବଂ ଅଫ୍ସାର ଜାଜାଇ ୩୫ରନ କରି ଅପରାଜିତ ରହିଛନ୍ତି। ଉଭୟେ ଫାଇନାଲ ସେସନରେ ଅପରାଜିତ ୭୪ ରନ ଯୋଗ କରିସାରିଛନ୍ତି। ଟସ୍ ଜିତି ପ୍ରଥମେ ବ୍ୟାଟିଂ ନେଇଥିବା ଆଫଗାନିସ୍ତାନ ଏକଦା ୭୭ ରନରେ ୩ ଉଇକେଟ ହରାଇ ସଂକଟରେ ପଡ଼ିଥିଲା। ଶାହ ଏବଂ ଆଫଗାନ ଲଢୁଆ ବ୍ୟାଟିଂ କରି ଦଳକୁ ସଂକଟରୁ ଉଦ୍ଧାର କରିଥିଲେ। ବାଂଲାଦେଶ ପକ୍ଷରୁ ତାଇଜୁଲ ଇସ୍ଲାମ ଏବଂ ନଇମ୍ ହସନ ଦୁଇଟି ଲେଖାଏଁ ଉଇକେଟ ଅକ୍ତିଆର କରିଛନ୍ତି। ସୂଚନାଯୋଗ୍ୟ, ଆଫଗାନିସ୍ତାନ ଚଳିତ ବର୍ଷ ପ୍ରାରମ୍ଭରେ ଆୟର୍ଲାଣ୍ଡ ବିପକ୍ଷରେ ଏହାର ପ୍ରଥମ ଟେଷ୍ଟ ବିଜୟ ସଫଳତା ହାସଲ କରିଥିଲା। ଏହି ମ୍ୟାଚରେ ଶାହା ପ୍ରଥମ ଇନିଂସରେ ୯୮ ରନ ସେମତ ଦୁଇଟି ଅର୍ଦ୍ଧ ଶତକ ହାସଲ କରିଥିଲେ। ଆଫଗାନିସ୍ତାନ ଦଳ ତରଫରୁ ଇବ୍ରାହିମ ଜାଦ୍ରାନ, କ୍ୱାଇସ୍ ଅହମ୍ମଦ ଏବଂ ଜାହିର ଖାଁ ପ୍ରଥମ ଟେଷ୍ଟ ପଦାର୍ପଣ କରିଛନ୍ତି। ୨୦ ବର୍ଷ ୩୫୦ ଦିନ ବୟସରେ ରଶିଦ ଖାଁ ସର୍ବକନିଷ୍ଠ ଟେଷ୍ଟ ଅଧିନାୟକ ଟସ୍ ପକାଇବା ଗୌରବ ଅର୍ଜନ କରିଛନ୍ତି। ପୂର୍ବରୁ ଏହି ରେକର୍ଡର ଅଧିକାରୀ ହୋଇଥିଲେ ଜିମ୍ବାଓ୍ବେର ଟାଟେଣ୍ଡା ଟାଇବୁ। ସେ ରଶିଦଙ୍କଠାରୁ ମାତ୍ର ୮ ଦିନ ଅଧିକ ବୟସରେ ପ୍ରଥମ ଟେଷ୍ଟ ଅଧିନାୟକ ଦାୟିତ୍ୱ ତୁଲାଇଥିଲେ।
ସଂକ୍ଷିପ୍ତ ସ୍କୋର
ଆଫଗାନିସ୍ତାନ ପ୍ରଥମ ଇନିଂସ: ୨୭୧/୫ (ରହମତ ଶାହ-୧୦୨, ଅସଘର ଆଫଗାନ-୮୮*, ନଇମ୍ ହସନ-୨/୪୩, ତାଇଜୁଲ ଇସ୍ଲାମ-୨/୭୩)।