ଭଟଲି,୨୦।୧୨ (ଡି.ଏନ୍.ଏ.)-ଆଏଜ୍କାଲିର ଜୀବନ୍ ଶଇଲିରେ ଆମେ ଯେଯାହାର କାମେ ବାଇ ରହୁଛୁଁ। ସଖାଲୁ ଉଠ୍ଲା ଖଟୁ ରାତିଥି ଖଟ୍କେ ଯିବାର ତକ୍ ଆମେ ସଭେ ଛୁଆପିଲାକୁଟୁମ, ବେପାରବନିଜ ଚିନ୍ତାରେ ରହୁଛୁଁ। ହେଲେ ଗୁରୁବାର ସଖାଲୁ ବରଗଡ଼-ଭଟଲି ରାସ୍ତାରେ ଏନ୍ତା ଝନେ ଯୁବକ ସଂଗେ ଭେଟ୍ ହେଇଥିଲା ଯେ, ରାଏଜର ହିତ୍ ଲାଗି ରାଏଜର ୩୧୪ଟା ବ୍ଲକକେ ପଦଯାତ୍ରାଥି ବାହାରିଛନ୍। ଇଆଡ଼େ ଶିତୁଆ ସକାଲ, ଲୋକ୍ ଖଟ୍ ନାଇଁ ଛାଡ଼ିଥିଲାବେଲେ ସେ ପହଁତିଆରୁ ଚାଲବାର ଆରମ୍ କରୁଛନ୍। ସେ ଯୁବକ ଝନକ ହେଉଛନ୍ ଜଗତସିଂହପୁର ଜିଲା ବାଲିକୁଦା ବ୍ଲକ ଅଧୀନ ଭଗବାନସିନ୍ଧୋଳ ଗଁାର ସତ୍ୟବ୍ରତ ଦାଶ(୨୮)। ତାକର କହିବାର ହିସାବେ ସେ ଗଲା ଜୁଲାଇ ମାସର ୧୦ ତାରିଖରୁ ଯାଜପୁର ଜିଲା ବଡ଼ଚଣା ବ୍ଲକରୁ ନିଜର ପଦଯାତ୍ରା ଆରମ୍ କରିଛନ୍। ସେ ଆଏଜ୍ତକ ୧୬୨ ଦିନ୍ରେ ୧୧୫ଟା ବ୍ଲକର ବିଡିଓକୁଁ ଭେଟି ରାଷ୍ଟ୍ରପତିକଁର ଉଦେଶ୍ରେ ଓଡ଼ିଶାକେ ସ୍ବତନ୍ତ୍ର ରାଜ୍ୟ ପାହ୍ୟା, ମହାନଦୀ ଜଲ ବିବାଦର ତୁରିତ୍ ସମାଧାନ ଆର ପୋଲାଭରମ ପ୍ରକଳ୍ପକେ ପୂରା ବଁଦ୍ କରବାର ଦାବିରେ ଦାବିପତର ଦେଉଛନ୍। ଇ ହିସାବେ ସତ୍ୟବ୍ରତ ଗୁରୁବାର ଭଟଲି ବିଡିଓ ଧୀରେନ୍ଦ୍ର କୁମାର ସେଠୀକୁଁ ଭେଟି ଦାବିପତର ଦେଇଛନ୍। ତାକର ଇ ମହତ୍ ଉଦେଶ ଆର ପଦଯାତ୍ରାକେ ସମରଥନ କରି ଜନସାଧାରନ ସମେତ ଭଟଲି ସାମ୍ବାଦିକ ସଂଘ, ମାରଓ୍ବାଡି ୟୁବାମଞ୍ଚ, ଶ୍ୟାମ ବିହାରୀ ମନ୍ଦିର କରମ୍କରତା ଆର ଭିନେ ଭିନେ ଅନୁଷ୍ଠାନ ତରଫୁ ସମରଧିତ୍ କରାଯାଇଥିଲା। ସତ୍ୟବ୍ରତ ଇ ପଦଯାତ୍ରାକେ ନିଜର ବ୍ଲକ ବାଲିକୁଦାରେ ଶେଷ କରବେ ବଲି କହିଛନ୍।
