ରାଓ୍ବଲପିଣ୍ଡି, ୧୨।୧୨: ଦଶନ୍ଧିପରେ ପାକିସ୍ତାନକୁ ଫେରିଥିବା ଟେଷ୍ଟ କ୍ରିକେଟ ବର୍ଷାଦ୍ୱାରା ବାଧାପ୍ରାପ୍ତ ହୋଇଛି। ପ୍ରଥମ ଦିବସରେ ୬୮.୧ ଓଭର ଖେଳ ହୋଇଥିବାବେଳେ ଗୁରୁବାର ଦ୍ୱିତୀୟ ଦିବସରେ ମାତ୍ର ୧୮.୨ ଓଭର ଖେଳ ସମ୍ଭବ ହୋଇଛି। ଦ୍ୱିତୀୟ ଦିବସ ଷ୍ଟମ୍ପ୍ସ ପ୍ରତ୍ୟାହୃତ ହେବା ବେଳକୁ ଶ୍ରୀଲଙ୍କା ପ୍ରଥମ ଇନିଂସରେ ୬ ଉଇକେଟ ହରାଇ ୨୬୩ ରନ ସଂଗ୍ରହ କରିଛି।
ବୁଧବାର ପ୍ରଥମ ଦିବସ ଶେଷ ବେଳକୁ ଶ୍ରୀଲଙ୍କା ୫ ଉଇକେଟ ହରାଇ ୨୦୨ ରନ କରିଥିଲା। ଅର୍ଥାତ୍ ଦ୍ୱିତୀୟ ଦିବସରେ ଦଳ ଆଉ ୬୧ ରନ ଯୋଗ କରି ଗୋଟିଏ ଉଇକେଟ ହରାଇଛି। ପୂର୍ବଦିନ ୧୧ ରନରେ ଅପରାଜିତ ଥିବା ନିରୋଶାନ ଡିକ୍ଓ୍ବେଲା ଦ୍ୱିତୀୟ ଦିବସରେ ଆଉ ୨୨ ରନ ଯୋଗକରି ଆଉଟ ହୋଇଛନ୍ତି। ସେ ୬୩ ବଲ୍ରୁ ୪ ଚୌକା ସହାୟତାରେ ୩୩ ରନ କରିଥିବାବେଳେ ଶାହିନ ଆଫ୍ରିଦୀଙ୍କ ବଲ୍ରେ ବାବର ଆଜମ୍ଙ୍କୁ କ୍ୟାଚ ଦେଇ ପ୍ୟାଭିଲିୟନ ଫେରିଛନ୍ତି। ଡିକ୍ଓ୍ବେଲା ଆଉଟ ହେବାପରେ ଆଉ ମାତ୍ର ୨ ଓଭର ଖେଳ ସମ୍ଭବ ହୋଇଥିଲା। ସେତେବେଳକୁ ଧନଞ୍ଜୟ ଡି’ସିଲ୍ଭା କ୍ୟାରିୟରର ୬ଷ୍ଠ ଅର୍ଦ୍ଧଶତକ ହାସଲ କରି ଅପରାଜିତ ରହିଥିଲେ। ବର୍ଷା ଯୋଗୁ ଖେଳ ବନ୍ଦ ରହିବା ବେଳକୁ ଧନଞ୍ଜୟ ୭୨(୧୩୧ ବଲ, ୭ ଚୌକା) ଓ ଦିଲରୁଓ୍ବାନ ପେରେରା ୨ ରନ କରିଥିଲେ।
ଶ୍ରୀଲଙ୍କା ପ୍ରଥମ ଇନିଂସ: ୨୬୩/୬(ଧନଞ୍ଜୟ-୭୨*, ଦିମୁଥ କରୁଣାରନେତ୍-୫୯, ଓଶାଡା ଫର୍ନାଣ୍ଡୋ-୪୦, ଡିକ୍ଓ୍ବେଲା-୩୩, ଆଞ୍ଜେଲୋ ମାଥ୍ୟୁସ-୩୧, ଶାହିନ ଆଫ୍ରିଦୀ-୨/୪୭, ନସିମ ଶାହ-୨/୭୫, ଉସମାନ ଶିନ୍ଓ୍ବାରି-୧/୫୪, ମହମ୍ମଦ ଆବାସ-୧/୫୬)।
