ଢେଙ୍କାନାଳ ଅଫିସ, ୮।୫ – ଢେଙ୍କାନାଳ କପିଳାସ ପ୍ରାଣୀ ଉଦ୍ୟାନର ଏଲିଫ୍ୟାଣ୍ଟ ରେସ୍କ୍ୟୁ ସେଣ୍ଟରରେ ଥିବା ନରହନ୍ତା ଦନ୍ତା ‘ରାକେଶ’ର ସ୍ବାସ୍ଥ୍ୟାବସ୍ଥା ବିଗିଡ଼ିବାରେ ଲାଗିଛି। ସଂକ୍ରମଣ ହାତୀର ପିଛା ଛାଡୁନି। ବାମଗୋଡ଼ରେ ହୋଇଥିବା ଘା’ ପୁଣିଥରେ ସଂକ୍ରମିତ ହୋଇ ଗୁରୁତର ଆକାର ଧାରଣ କରିଥିବାରୁ ଚିନ୍ତାରେ ପଡ଼ିଛି ବନ ବିଭାଗ। ଏ ନେଇ ଡିଏଫ୍ଓ ବିମଳ ପ୍ରସନ୍ନ ଆଚାର୍ଯ୍ୟ କୁହନ୍ତି, ‘ରାକେଶ’ର ପଛ ବାମଗୋଡ଼ରେ ସଂକ୍ରମଣ ହୋଇଛି। ହାତୀଟି ସୁସ୍ଥ ଥିଲା। ପୁଣି ଘା’ ସଂକ୍ରମିତ ହୋଇଥିବାରୁ ଏହାର ଚିକିତ୍ସା ଲାଗି ପଦକ୍ଷେପ ନିଆଯାଉଥିବା ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ତାଳଚେର ଅଞ୍ଚଳରେ ଆତଙ୍କ ସୃଷ୍ଟି କରିବା ପରେ ଦନ୍ତାକୁ ଟ୍ରାଙ୍କୁଲାଇଜ୍ କରି କପିଳାସ ଚିଡ଼ିଆଖାନାକୁ ଅଣାଯାଇଥିଲା। ସେଠାରେ ହାତୀକୁ ଏକ ଖୋଲା ମଣ୍ଡପରେ ଗୋଡ଼ରେ ଶିକୁଳି ବାନ୍ଧି ରଖାଯାଇଛି। ପୂର୍ବରୁ ହାତୀ ଗୋଡ଼ରେ ଘା’ ହୋଇଥିଲା। ଭୁବନେଶ୍ୱର ଓୟୁଏଟିରୁ ପ୍ରାଣୀ ବିଶେଷଜ୍ଞମାନେ ଆସି ଚିକିତ୍ସା କରିବାପରେ ସେ ସୁସ୍ଥ ହୋଇଥିଲା। ଏହାପରେ ମେରୁହାଡ଼ ଦୁଇପାର୍ଶ୍ୱରେ ଘା’ ହୋଇଥିଲା। ଏହି ଘା’ ନ ଶୁଖୁଣୁ ଶିକୁଳି ବନ୍ଧା ଯାଇଥିବା ପଛ ବାମ ଗୋଡ଼ରେ ଘା’ ସଂକ୍ରମିତ ହୋଇଥିବା ଜଣାପଡ଼ିଛି।