ଭୁବନେଶ୍ୱର, ୧୯।୯(ବ୍ୟୁରୋ): ଭୁବନେଶ୍ୱରରେ ବୁଲା କୁକୁରଙ୍କ ଉତ୍ପାତ ବଢ଼ି ଚାଲିଛି। ଏଥିଯୋଗୁ ଦୁର୍ଘଟଣା ଘଟୁଥିବାବେଳେ ବହୁ ଲୋକ କୁକୁର କାମୁଡ଼ାର ଶିକାର ହେଉଛନ୍ତି। ସେମାନଙ୍କ ବଂଶବୃଦ୍ଧି ଉପରେ ରୋକ୍ ଲଗାଇବା ସହ ସହରବାସୀଙ୍କୁ ଏଭଳି ବିପଦରୁ ରକ୍ଷାକରିବା ପାଇଁ ବିଏମ୍ସି ପକ୍ଷରୁ କୁକୁର ବନ୍ଧ୍ୟାକରଣ କରାଯାଉଛି। ଏଥିପାଇଁ ଗତ ସୋମବାରଠାରୁ କୁକୁର ଧରା କାର୍ଯ୍ୟ ଆରମ୍ଭ ହୋଇଛି। ୩ଦିନରେ ୪୫ ବୁଲା କୁକୁରଙ୍କୁ ଧରାଯାଇଥିବାବେଳେ ୧୪ଟିର ବନ୍ଧ୍ୟାକରଣ ସରିଛି। ବିଏମ୍ସି ଡେପୁଟି କମିଶନର ଶ୍ୟାମସୁନ୍ଦର ସେଠୀ କହିଛନ୍ତି, ପ୍ରାଣୀ ଜନ୍ମ ନିୟନ୍ତ୍ରଣ (ଏବିସି) ଯୋଜନାରେ ପ୍ରାୟ ୨୫ ହଜାର କୁକୁରଙ୍କ ବନ୍ଧ୍ୟାକରଣ କରାଯିବ। ସେଢେ ୩ବର୍ଷ ତଥା ୪୪ ମାସ ମଧ୍ୟରେ ଏହି ବନ୍ଧ୍ୟାକରଣ ସରିବ। ଅପରେଶନ ସହ ଖାଦ୍ୟପେୟ, ଗାଡ଼ି ଖର୍ଚ୍ଚ ଆଦି ବାବଦକୁ ପ୍ରତି କୁକୁର ପାଇଁ ପାଖାପାଖି ୫ଶହ ଟଙ୍କା ଧାର୍ଯ୍ୟ କରାଯାଇଥିବାବେଳେ ଏଥିପାଇଁ ବାର୍ଷିକ ୩୬ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ସେ କହିଛନ୍ତି।
ସେ କହିଛନ୍ତି, ୨୦୧୫ର ଗଣନାନୁଯାୟୀ ଭୁବନେଶ୍ୱରରେ ୪୬ ହଜାର ବୁଲା କୁକୁର ଥିଲେ। ୨୦୦୮ରୁ ହୋଇଥିବା ଏବିସି କାର୍ଯ୍ୟକ୍ରମରେ ୨୧ ହଜାର ୬ ଶହ କୁକୁରଙ୍କ ବନ୍ଧ୍ୟାକରଣ କରାଯାଇଥିଲା। ପୂର୍ବରୁ ବନ୍ଧ୍ୟାକରଣ ହୋଇ ନ ଥିବା ୨୪ହଜାର ୪ଶହ କୁକୁର ଓ ଗତ ୪ବର୍ଷ ମଧ୍ୟରେ ସହରରେ ଏହି ସଂଖ୍ୟା ଆଉ ୬ଶହ ବଢ଼ିଥିବା ଜଣାପଡିଛି। ଏ ସମସ୍ତ ବୁଲା କୁକୁରଙ୍କ ବାକରଣ କରିବାକୁ ବିଏମ୍ସି ଲକ୍ଷ୍ୟ ରଖିଛି ବୋଲି ସେ କହିଛନ୍ତି।
ଦୁଇଟି ଟିମ୍ ପକ୍ଷରୁ ପ୍ରତି କାର୍ଯ୍ୟଦିବସର ଭୋର୍ ୫ଟାରୁ ବୁଲା କୁକୁର ଧରା ଅଭିଯାନ ଚାଲୁଛି। ପ୍ରତି ଟିମ୍ରେ ଜଣେ ଡାକ୍ତର, ଦୁଇଜଣ ଧରାଳି, ଜଣେ ସହାୟକ ଓ ଜଣେ ଡ୍ରାଇଭର୍ ରହିଛନ୍ତି। ଦିନକୁ ୩୦, ମାସକୁ ୬୦୦ ଓ ବର୍ଷକୁ ୭ହଜାର ୨ଶହ କୁକୁରଙ୍କୁ ଧରିିବାକୁ ଯୋଜନା ରହିଛି। ପରେ ଶହୀଦନଗରସ୍ଥିତ ଶ୍ବାନଗୃହରେ ରଖି ପର୍ଯ୍ୟାୟକ୍ରମେ ଅସ୍ତ୍ରୋପଚାର କରାଯିବ। ଅସ୍ତ୍ରୋପଚାର ପରେ ଆଉ ୫ଦିନ ଚିକିତ୍ସା ପରେ ଛାଡ଼ି ଦିଆଯିବ। ଶ୍ବାନଗୃହରେ କୁକୁରଙ୍କୁ ଖେଚୁଡି ଓ ଡାଲି ଖାଇବାକୁ ଦିଆଯିବ। ଜଳାନ୍ତକ ରୋଗ ନ ହେବା ପାଇଁ ଛାଡ଼ିବା ପୂର୍ବରୁ କୁକୁରଙ୍କୁ ଆଣ୍ଟି ରାବିସ୍ ଟିକା ଦିଆଯିବ।