ଚେନ୍ନାଇ,୨୭।୪: ଭାରତର ବର୍ତ୍ତମାନର ରାଜନୈତିକ ପୃଷ୍ଠଭୂମି ସମଗ୍ର ପୃଥିବୀ ଭଳି ସମାନ। ତେବେ ଭାରତର ରାଜନୈତିକ ସ୍ଥିତି ଖରାପ ନାହିଁ ବୋଲି ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ରଘୁରାମ ରାଜନ କହିଛନ୍ତି। ରାଜନୀତି ପ୍ରତି ତାଙ୍କର ରୁଚି ନାହିଁ ଏକାଡେମିକ କାର୍ଯ୍ୟରେ ସେ ବେଶ୍ ସନ୍ତୁଷ୍ଟ। ରାଜନୀତିରେ ପ୍ରବେଶ କଲେ ସ୍ତ୍ରୀ ରାଧିକା ତାଙ୍କୁ ଛାଡ଼ିଦେବେ ବୋଲି ହସି ହସି ରାଜନ ଏହା କହିଛନ୍ତି। ସମ୍ପ୍ରତି ରାଜନ ସିକାଗୋ ବିଶ୍ୱବିଦ୍ୟାଳୟର ବୁଥ୍ ସ୍କୁଲ୍ ଅଫ୍ ବିଜନେସ୍ରେ ପ୍ରଫେସର ଭାବେ କାର୍ଯ୍ୟ କରୁଛନ୍ତି। ତାଙ୍କର ଆବଶ୍ୟକତା ଲୋଡ଼ାଗଲେ ଭାରତ ପାଇଁ କାମ କରିବାକୁ ସଦା ପ୍ରସ୍ତୁତ। କେନ୍ଦ୍ରରେ କଂଗ୍ରେସ ସରକାର ଗଠନ ହେଲେ ତାଙ୍କୁ ଅର୍ଥମନ୍ତ୍ରୀ କରାଯିବା ନେଇ କେତେକ ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ମାତ୍ର ଏ ସମ୍ପର୍କରେ ରାଜନ କହିଛନ୍ତି ଯେ, ସେ ଏଭଳି ଚିନ୍ତା କରି ନାହାଁନ୍ତି। ସେ ନିଜ ପସନ୍ଦର କାମରେ ବେଶ୍ ଖୁସି ଅଛନ୍ତି।