ବୋଲଗଡ,୨।୧୧(ଡି.ଏନ.ଏ.): ଖୋର୍ଦ୍ଧା ଜିଲା ବୋଲଗଡ ଥାନା ସୀମାନ୍ତରେ ଥିବା ବିଜୁପୁର ଗେଟ୍ ନିକଟ ୫୭ନଂ ଜାତୀୟ ରାଜପଥରେ ଶୁକ୍ରବାର ଅପରାହ୍ନରେ ପୁଅ ସହ ବାଇକରେ ଯାଉଥିବା ଜଣେ ମହିଳାଙ୍କ ଠାରୁ ଦୁର୍ବୃତ୍ତମାନେ ଭ୍ୟାନିଟ ଛଡାଇ ନେଇଛନ୍ତି। ଉକ୍ତ ଭ୍ୟାନିଟ୍ରେ ୧୦ହଜାର ଟଙ୍କା ଏବଂ ଏକ ସୁନାଚେନ ରହିଥିଲା। ୩ଜଣ ଦୁର୍ବୃତ୍ତ ଏକ ପଲସର ଯୋଗେ ଆସି ଲୁଟ୍ କରିଥିଲେ। ଘଟଣା ପରେ ମହିଳାଙ୍କ ପୁଅ ସାହସର ସହିତ ଦୁର୍ବୃତ୍ତଙ୍କ ପିଛା କରି ସେମାନଙ୍କୁ ଗାଡିରୁ ଗଳାଇ ଦେଇଥିଲେ। ପରେ ସ୍ଥାନୀୟ ଲୋକେ ଜଣେ ଦୁର୍ବୃତ୍ତଙ୍କୁ କାବୁ କରିି ପୋଲିସ ଜିମା ଦେଇଥିଲେ। ତାଙ୍କୁ ଥାନାରେ ଅଟକ ରଖାଯାଇଛି।
ଆଇଆଇସି ସେଖ୍ ଆକବର ଅଲ୍ଲୀଙ୍କ ସୂତ୍ରରୁ ପ୍ରକାଶ ଯେ, ସ୍ଥାନୀୟ ଥାନା ଫିରିଫିରା ଗ୍ରାମର ଆଦିତ୍ୟ ସ୍ବାଇଁ ଓ ତାଙ୍କ ମା’ ସଂଯୁକ୍ତା ନୟାଗଡରୁ ନିଜ ଗ୍ରାମ ବୋଲଗଡ ଅଭିମୁଖେ ୫୭ନଂ ଜାତୀୟ ରାଜପଥରେ ଫେରୁଥିଲେ । ବିଜୁପୁର ଠାରେ ଏକ ପଲସରରେ ଆସି ୩ଜଣ ଦୁର୍ବୃତ୍ତ ହଠାତ ସଂଯୁକ୍ତା ଧରିଥିବା ଭ୍ୟାନିଟଣକୁ ଛଡାଇ ନେଇ ଫେରାର ହୋଇଯାଇଥିଲେ । ଆଦିତ୍ୟ ସାହସର ସହିତ ଦୁର୍ବୃତ୍ତମାନଙ୍କର ପିଛା କରି ବୋଲଗଡ ନିକଟ ରେଲୱେ ଲେଭଲ କ୍ରସିଂ ଠାରେ ସେମାନଙ୍କ ବାଇକକୁ ଏକ ଶକ୍ତ ଗୋଇଠା ମାରିଥିଲେ । ଫଳରେ ଦୁର୍ବୃତ୍ତମାନେ ତଳେ ଖସି ପଡିଥିଲେ ଓ ଗାଡି ଛାଡି ଦୌଡି ପଳାଇଥିଲେ। ଏହା ଜାଣି ସ୍ଥାନୀୟ ଲୋକେ ଦୁର୍ବୃତ୍ତମାନଙ୍କୁ ଖୋଜାଖୋଜି କରିଥିଲେ । ସଂପୁର ଗ୍ରାମ ନିକଟରେ ଜଣେ ଯୁବକଙ୍କୁ ଧରି ପୋଲିସକୁ ହସ୍ତାନ୍ତର କରିଛନ୍ତି। ଯୁବକ ଜଣକ ଥାନାରେ ଅଟକ ଅଛନ୍ତି। ପୋଲିସ ଦୁର୍ବୃତ୍ତମାନେ ଛାଡିଯାଇଥିବା ବାଇକଟିକୁ ଜବତ କରିଥିବା ବେଳେ ଦୁର୍ବୃତ୍ତମାନେ ସୁନାଚେନ ଏବଂ ଟଙ୍କା ବ୍ୟାଗଟିକୁ ନେଇ ପଳାଇଛନ୍ତି। ଏ ସଂକ୍ରାନ୍ତରେ ପୋଲିସ ନଂ ୧୧୩/୧୯ରେ ମାମଲା ରୁଜୁ କରିବା ସହିତ ଘଟଣାର ତଦନ୍ତ ଚଳାଇଛି ।