ନୟାଗଡ଼ ଅଫିସ,୨୨ା୫-ନୟାଗଡ଼ ଟାଉନ ପୋଲିସ ସୋମବାର ଜଣେ ରାଜପଥ ଲୁଟେରାଙ୍କୁ ଗିରଫ କରିଛି। ଗିରଫ ଲୁଟେରା ହେଲେ ପୁରୁଣା ଘଡ଼ୁଆଳ ଗ୍ରାମର ଅମୂଲ୍ୟ ମଲ୍ଲିକ (୨୨) ଓରଫ ରାଜା। ମଙ୍ଗଳବାର ଏକ ଖବରଦାତା ସମ୍ମିଳନୀରେ ଏହି ସୂଚନା ଦେଇଛନ୍ତି ନୟାଗଡ଼ ଏସ୍ଡ଼ିପିଓ ନିରଞ୍ଜନ ପାଢୀ।
ମିଳିଥିବା ସୂଚନା ଅନୁସାରେ, ରାଜା ଶରଣକୁଳ ଥାନା ଅସୁରଢ଼ିପା ଗ୍ରାମର ତାଙ୍କ ମାମୁ ବିଭୂତି ମଲ୍ଲିକ, ଅନ୍ୟ ଦୁଇ ସହଯୋଗୀ ବିଭୂତି ଭୂଷଣ ବିଶ୍ୱାଳ ଓ ବବୁଲ ବିଶ୍ୱାଳଙ୍କ ସହିତ ମିଶି ଜାତୀୟ ଓ ରାଜ୍ୟ ରାଜପଥରେ ଲୁଟ୍ କରନ୍ତି। ସମ୍ପୃକ୍ତ ଲୁଟେରାମାନେ ଜିଲା ଦେଇ ଯାଇଥିବା ଜାତୀୟ ରାଜପଥ-୫୭ ଓ ରାଜ୍ୟ ରାଜପଥ-୨୧ରେ ଯାତ୍ରୀଙ୍କ ଠାରୁ ଲୁଟ୍ପାଟ କରନ୍ତି। ପୂର୍ବରୁ ୩ ଜଣଙ୍କୁୁ ଦଶପଲ୍ଲା ପୋଲିସ ଗିରଫ କରିଥିବା ବେଳେ ରାଜା ଫେରାର୍ ଥିଲେ। ୩ ଜଣଙ୍କୁ ପଚରାଉଚରା କରିବା ପରେ ରାଜା ଗ୍ୟାଙ୍ଗ୍ର ମାଷ୍ଟରମାଇଣ୍ଡ ବୋଲି ପୋଲିସ ଜାଣିବାକୁ ପାଇଥିଲା। ପରେ ପୋଲିସ ସୋମବାର ରାଜାଙ୍କ ଗ୍ରାମ ପୁରୁଣା ଘଡ଼ୁଆଳରେ ଚଢ଼ାଉ କରି ତାକୁ ଗିରଫ କରିଥିଲା। ତାଙ୍କଠାରୁ ଦୁଇଟି ଖଣ୍ଡା ଓ ଗୋଟିଏ ପଲସର ବାଇକ୍ ଜବତ କରିଥିଲା। ରାଜାଙ୍କ ନାମରେ ଓଡ଼ଗାଁ ଥାନାରେ ୩ଟି ମାମଲା ଥିବା ବେଳେ ଶରଣକୁଳ ଥାନାରେ ଗୋଟିଏ ଓ ନୟାଗଡ଼ ଥାନାରେ ଗୋଟିଏ ମାମଲା ରହିଛି। ଗତ ୨୫ ଫେବୃୟାରୀରେ ଏକ ଫାଇନାନ୍ସ କମ୍ପାନୀର କର୍ମଚାରୀ ଯୁଧିଷ୍ଠିର ଛୁଆଳସିଂ ଟଙ୍କା ନେଇ ଯାଉଥିବା ବେଳେ ରାଜା ଗ୍ୟାଙ୍ଗ ତାଙ୍କୁ ବାଡ଼ୋଇବା ସହିତ ତାଙ୍କ ଠାରୁ ୧୬,୬୮୦ ଟଙ୍କା ନେଇ ଫେରାର ହୋଇ ଯାଇଥିଲେ। ଏ ନେଇ ନୟାଗଡ଼ ଥାନାରେ ୩୦/୧୯ରେ ମାମଲା ରୁଜୁ କରାଯାଇଥିଲା। ଟାଉନ ପୋଲିସ ଏହି ଘଟଣାର ତଦନ୍ତ କରି ରାଜା ଏଥିରେ ସମ୍ପୃକ୍ତ ଥିବା ଜାଣିବାକୁ ପାଇଥିଲା। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଟାଉନ ଥାନା ଅଧିକାରୀ ଜୟଦୀପ ମହାନ୍ତି ପ୍ରମୁଖ ଉପସ୍ଥିତ ଥିଲେ।