କୁଳିଅଣା,୨୫ା୫(ଡି.ଏନ୍.ଏ.)-ମୟୂରଭଞ୍ଜ ଜିଲା କୁଳିଅଣା ବ୍ଲକ ଡୁମୁରିଡିହା ପଞ୍ଚାୟତର ଚାଷୀମାନେ ଚାଷ ଜମିକୁ ଜଳ ଯୋଗାଣ ଦାବିରେ ସ୍ଥାନୀୟ ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟରେ ଗୁରୁବାର ତାଲା ପକାଇ ଆନ୍ଦୋଳନ କରିଥିଲେ। ପୂର୍ବାହ୍ନ ୧୦ଟାରୁ ଦିନ ୧ଟା ପର୍ଯ୍ୟନ୍ତ ଏହି ଆନ୍ଦୋଳନ ଚାଲିଥିଲା। ଖବରପାଇ ସୁବର୍ଣ୍ଣରେଖା ଜଳସେଚନ ପ୍ରକଳ୍ପର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀମାନଙ୍କୁ ବୁଝାସୁଝା କରିବା ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
କୁଳିଅଣା ବ୍ଲକ ଅନ୍ତର୍ଗତ ହଳଦିଆ ଡ୍ୟାମରୁ ସ୍ଥାନୀୟ ଡୁମୁରିଆ ପଞ୍ଚାୟତର ଚାଷ ଜମିକୁ ପାଣି ଯୋଗାଇ ଦିଆଯାଇଥାଏ। ହଳଦିଆ ଡ୍ୟାମ ପୁନଃନିର୍ମାଣ କାର୍ଯ୍ୟ ୨୦୧୧ ନଭେମ୍ବର ମାସରୁ ଆରମ୍ଭ ହୋଇ ୨୦୧୮ ମାର୍ଚ୍ଚରେ ଶେଷ ହେବା କଥା। ମାତ୍ର ଏହା ଅଦ୍ୟାବଧି ସମ୍ପୂର୍ଣ୍ଣ ହୋଇ ପାରି ନାହିଁ। ଏହି କାର୍ଯ୍ୟ ୨୦୨୦ ଜୁୁନ ମାସ ସୁଦ୍ଧା ଶେଷ ହେବାର ଯୋଜନା ଥିବା ଡ୍ୟାମ ସହକାରୀ ଯନ୍ତ୍ରୀ ଚନ୍ଦ୍ର ଶେଖର ରାଉତ କହିଛନ୍ତି। ସେହିପରି ୨୦୨୦ ମାର୍ଚ୍ଚ ସୁଦ୍ଧା ହଳଦିଆ ଡ୍ୟାମ ପାଣି ପଞ୍ଚାୟତ ଗଠନ ସରିବ ବୋଲି ବେତନଟୀ ଡିଭିଜନ ସହକାରୀ ଯନ୍ତ୍ରୀ ମାନସ ରଞ୍ଜନ ମଣ୍ଡଳ ଓ ଗୌରାଙ୍ଗ ଚରଣ ହୁଇ ପ୍ରକାଶ କରିଛନ୍ତି। ଅନାବୃଷ୍ଟି ପାଇଁ ଚାଷୀଙ୍କ ମଧ୍ୟରେ ଭାଳେଣି ପଡ଼ିଥିବା ବେଳେ ଛାତ୍ରୀଛାତ୍ରମାନଙ୍କ ଜାତି ତଥା ଅନ୍ୟାନ୍ୟ ସାର୍ଟିଫିକେଟ ପାଇଁ ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟରେ ଜୋର ଜବରଦସ୍ତ ଖଜଣା ଆଦାୟକୁ ମଧ୍ୟ ଚାଷୀମାନେ ବିରୋଧ କରିଥିଲେ। ୨୦୧୯-୨୦ ରାଜସ୍ବ ବର୍ଷ ପାଇଁ ଖଜଣା ଆଦାୟ ସରିଥିବାରୁ ଚାଷ ଜମିକୁ ଜଳ ଯୋଗାଇ ଦେବାକୁ ଦାବି କରାଯାଇଥିଲା। ଭାଗିରଥୀ ସୋରେନ, ବିରାମ ମୁର୍ମୁ, ଲକ୍ଷ୍ମୀଧର ମୁର୍ମୁ, ବାଇଧର ବାସ୍କେ, ମୁନ୍ନା ସୋରେନ, ରମେଶ ମୁର୍ମୁ, ଶ୍ରୀମତ ମାର୍ଣ୍ଣି, ଦୀନବନ୍ଧୁ ମୁର୍ମୁ ପ୍ରମୁଖ ଏହି ଆନ୍ଦୋଳନର ନେତୃତ୍ୱ ନେଇଥିଲେ।