ଅନୁଗୋଳ ଅଫିସ୍, ୪।୩- ରାଜାଘର ସୁନାମାଳ କହି ଏକ ପିତଳ ହାରକୁ ୪ ଲକ୍ଷ ଟଙ୍କାରେ ବିକ୍ରି କରିବା ପରେ ଖସି ପଳାଉଥିବା ନାଗପୁର ଶୀତଲୱାଡ଼ା ଅଞ୍ଚଳର ଶତ୍ରୁ ମୋହନ ପ୍ରଜାପତି(୩୩)ଙ୍କୁ ମଙ୍ଗଳବାର ଅନୁଗୋଳ ପୋଲିସ ଗିରଫ କରିଛି। ସମସ୍ତ ଟଙ୍କା ଜବତ କରିବା ସହ ପୋଲିସ ତାଙ୍କୁ କୋର୍ଟଚାଲାଣ କରିଛି। ଏହି ଘଟଣା ଅନୁଗୋଳ ସହରରେ ଚର୍ଚ୍ଚାର ବିଷୟ ହୋଇଛି।
ପ୍ରକାଶ ଯେ, ଅନୁଗୋଳ ସହର ଉପକଣ୍ଠ ଜାମୁନାଳି ଅଞ୍ଚଳର ନିର୍ମଳ ପଟ୍ଟନାୟକଙ୍କୁ ରାଜାଘର ସୁନାମାଳ ବିକ୍ରି କରିବାକୁ ଶତ୍ରୁମୋହନ ନାଗପୁରରୁ ଅନୁଗୋଳ ଆସିଥିଲେ। ହାର ବିକ୍ରି କରିବା ପରେ ନଗଦ ୪ ଲକ୍ଷ ଟଙ୍କା ନେଇ ସେ ଘଟଣାସ୍ଥଳରୁ ପଳାଇ ଯାଇଥିଲେ। ଏକ ସୁନା ଦୋକାନରେ ହାର ପରୀକ୍ଷା କରି ତାହା ପିତଳ ବୋଲି ଜାଣିବା ପରେ ନିର୍ମଳଙ୍କ ପାଦତଳୁ ଯେପରି ମାଟି ଖସି ଯାଇଥିଲା। ସେ ତୁରନ୍ତ ଅନୁଗୋଳ ଥାନାକୁ ଆସି ଠକେଇ ସମ୍ପର୍କରେ ଲିଖିତ ଅଭିଯୋଗ କରିଥିଲେ। ପୋଲିସ ବିଭିନ୍ନ ସ୍ଥାନରେ ଖୋଜାଖୋଜି କରି ଅନୁଗୋଳ ବସ୍ଷ୍ଟାଣ୍ଡରୁ ଅଭିଯୁକ୍ତ ଶତ୍ରୁମୋହନକୁ ଠାବ କରିଥିଲା। ତାଙ୍କୁ ଥାନାକୁ ଆଣି ପଚରା ଉଚରା କରିବାରୁ ସେ ଠକେଇ ନେଇ ସ୍ବୀକାର କରିଥିବା ପୋଲିସ ସୂଚନା ଦେଇଛି।