ନୂଆପଡା ଅଫିସ,୨୦ା୮: ସ୍ବର୍ଗତ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ୭୫ତମ ଜୟନ୍ତୀ ଉତ୍ସବରେ ଜିଲା କଂଗ୍ରେସ ତରଫରୁ ବିଭିନ୍ନ କାର୍ଯ୍ୟକ୍ରମ କରାଯାଇଛି। ସ୍ଥାନୀୟ ହରିପୁର ଗାଁରେ ଆୟୋଜିତ କାର୍ଯ୍ୟକ୍ରମରେ ଜିଲା ସଭାପତି ଘାସିରାମ ମାଝି ଅଧ୍ୟକ୍ଷତା କରିଥିବା ବେଳେ ରାଜ୍ୟ କାର୍ଯ୍ୟକାରିଣୀ ସଦସ୍ୟ ହାଲ୍ଲା ସିଂ, ଜଗଦିଶ ସାହୁ, ଗୋଡଫୁଲା ସରପଞ୍ଚ ହରି ମାଝି, ମୋତି ରାୱଲ, ରବୀନ୍ଦ୍ର ମଙ୍ଗରାଜ ପ୍ରମୁଖ ଯୋଗଦେଇଥିଲେ। ଏହି ଅବସରରେ ବକ୍ତାମାନେ ସ୍ବର୍ଗତ ପ୍ରଧାନମନ୍ତ୍ରୀଙ୍କ ଜୀବନାଦର୍ଶରେ ଅନୁପ୍ରାଣିତ ହୋଇ କାମ କରିବାକୁ କହିଥିଲେ। ଦ୍ୱିତୀୟ ପର୍ଯ୍ୟାୟରେ ସଭାପତିଙ୍କ ନେତୃତ୍ୱରେ ସମସ୍ତ କର୍ମକର୍ତ୍ତା ଗାଁ ଚତୁଃପାର୍ଶ୍ୱରେ ଚାରାରୋପଣ କରିଥିଲେ। ଏଥିରେ ଅନ୍ୟମାନଙ୍କ ମଧ୍ୟରେ କଂଗ୍ରେସ ସେବାଦଳ ପ୍ରମୁଖ ଜଗଦିଶ ସାହୁ, ଲମ୍ବୋଦର ମାଝି, କୈବଲ ମାଝି, ନିର୍ମଳ ହଂସ, କିର୍ତ୍ତନ ମାଝି, ସିର୍ତନ ମାଝି, ସିଦନ ସାହୁ ପ୍ରମୁଖ ଯୋଗଦେଇଥିଲେ। ଜିଲା ଯୁବ କଂଗ୍ରେସ ସଭାପତି ସୌରଭ ଚନ୍ଦ୍ରକାରଙ୍କ ନେତୃତ୍ୱରେ ନଗର ଯୁବ କଂଗ୍ରେସ ସଭାପତି ଗୋଲି ତିୱାରୀ, ପଙ୍କଜ ଜାଲ, ଜଗନ୍ନାଥ ନାଏକ, ଈଶ୍ୱର ମହାରାଜ, ଭୀମ ୟାଦବ ପ୍ରମୁଖ ରୋଗୀମାନଙ୍କୁ ଫଳ ବଣ୍ଟନ କରିଥିଲେ । ଜିଲାର ଖରିଆରରୋଡ ହସ୍ପିଟାଲରେ ରୋଗୀ ସେବା କରିବା ସହ ସଫେଇ କାର୍ଯ୍ୟ କରାଯାଇଥିଲା।