ଲଣ୍ଡନ,୧୪।୮(ପି.ଟି.)- ଭାରତ ଓହରିଯିବାର ଧମକ ଦେବା ସତ୍ତ୍ୱେ ମଧ୍ୟ ଶୁଟିଂ ରାଜ୍ୟଗୋଷ୍ଠୀ କ୍ରୀଡ଼ାରେ ସାମିଲ ହେବ ନାହିଁ ବୋଲି କ୍ରୀଡ଼ା ଫେଡେରେଶନ (ସିଜିଏଫ୍) ମୁଖ୍ୟ ଲୋଇସ୍ ମାର୍ଟିନ ସ୍ପଷ୍ଟ କରିଛନ୍ତି। ୨୦୨୨ରେ ବର୍ମିଂହାମ୍ରେ ଆୟୋଜନ ହେବାକୁ ଥିବା ରାଜ୍ୟଗୋଷ୍ଠୀ କ୍ରୀଡ଼ାରେ ଶୁଟିଂକୁ ବାଦ୍ ଦିଆଯାଇଛି। ୧୯୭୪ ପରେ ପ୍ରଥମଥର ପାଇଁ ଶୁଟିଂକୁ ଏହି ମେଗା ଇଭେଣ୍ଟରୁ ବାଦ୍ ଦିଆଯାଇଛି। ଶୁଟିଂ ଏହି କ୍ରୀଡ଼ାରେ ଏକ ବାଧ୍ୟତାମୂଳକ ଇଭେଣ୍ଟ ନୁହଁ ଓ ଶୁଟିଂ ପାଇଁ ଆମ ପାଖରେ ସ୍ଥାନ ନାହିଁ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଭାରତ ରାଜ୍ୟଗୋଷ୍ଠୀ କ୍ରୀଡ଼ାରେ ଶୁଟିଂରେ ସବୁବେଳେ ଭଲ ପ୍ରଦର୍ଶନ କରିଥାଏ। ଗୋଲ୍ଡକୋଷ୍ଟରେ ଅନୁଷ୍ଠିତ ଗତ ସଂସ୍କରଣରେ ଭାରତ ଶୁଟିଂରେର ୧୬ଟି ପଦକ ହାସଲ କରିଥିଲା। ଶୁଟିଂକୁ ବାଦ୍ ଦିଆଯାଇଥିବାରୁ ଭାରତ ୨୦୨୨ ଗେମ୍ସରୁ ଓହରିଯିବାକୁ ଧମକ ଦେଇଛି। ଏ ସଂକ୍ରାନ୍ତରେ ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ମୁଖ୍ୟ ନରିନ୍ଦର ବାତ୍ରା କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ଅନୁମତି ଲୋଡିଛନ୍ତି।
ଶୁଟିଂକୁ ବାଦ୍ ଦିଆଯିବା ନିଷ୍ପତ୍ତି କ୍ରୀଡ଼ା ସମ୍ବିଧାନର ଉଲ୍ଲଂଘନ ନୁହଁ। ଶୁଟିଂ ସବୁବେଳେ ଏକ ଇଚ୍ଛାଧୀନ ଇଭେଣ୍ଟ ହିସାବରେ ରାଜ୍ୟଗୋଷ୍ଠୀ କ୍ରୀଡ଼ାରେ ସାମିଲ ହୋଇଥାଏ। ଭାରତ ଏହା ହୃଦୟଙ୍ଗମ କରିବା ଉଚିତ ବୋଲି ବର୍ମିଂହାମ ୨୦୨୨ ରାଜ୍ୟଗୋଷ୍ଠୀ କ୍ରୀଡ଼ା ମୁଖ୍ୟ କାର୍ଯ୍ୟନିର୍ବାହୀ ଇଆନ ରେଡ୍ ସ୍ପଷ୍ଟ କରିଛନ୍ତି। ଅନ୍ୟପଟେ ଗନ୍ ଇଣ୍ଡଷ୍ଟ୍ରୀ ୟୁନିୟନ ମଧ୍ୟ ଏହି ନିଷ୍ପତ୍ତି ବିରୋଧରେ ଅସନ୍ତୋଷ ଜାହିର କରିଛି। ଶୁଟିଂକୁ ବାଦ୍ ଦିଆଯାଇଥିବାରୁ ଭାରତ ଭଳି ଅଷ୍ଟ୍ରେଲିଆ ମଧ୍ୟ ରାଜ୍ୟଗୋଷ୍ଠୀ କ୍ରୀଡ଼ା ବର୍ଜନ କରୁ ବୋଲି ଏହି ୟୁନିୟନ ଅନୁରୋଧ କରିଛି।