ଭୁବନେଶ୍ୱର, ୧୦।୭ (ସ୍ପୋଟର୍ସ ବ୍ୟୁରୋ)- ଅଷ୍ଟ୍ରେଲିଆର ଆପିଆଠାରେ ମଙ୍ଗଳବାରଠାରୁ ଆରମ୍ଭ ହୋଇଥିବା ରାଜ୍ୟଗୋଷ୍ଠୀ ଭାରୋତ୍ତୋଳନ ଚାମ୍ପିୟନଶିପ୍ (ୟୁଥ୍, ଜୁନିୟର ଓ ସିନିୟର)ର ପ୍ରଥମ ଦିବସରେ ଓଡ଼ିଆ ପ୍ରତିଯୋଗୀଙ୍କ ଚମକ ଦେଖିବାକୁ ମିଳିଛି। ଭାରତୀୟ ଦଳ ପକ୍ଷରୁ ପ୍ରତିନିଧିତ୍ୱ କରୁଥିବା ଓଡ଼ିଶାର ୩ ଖେଳାଳି ୩ ସ୍ବର୍ଣ୍ଣ ଓ ଗୋଟିଏ ରୌପ୍ୟ ସହ ମୋଟ୍ ୪ ପଦକ ପ୍ରଥମ ଦିନରେ ଜିତିଛନ୍ତି। ୩ ସ୍ବର୍ଣ୍ଣ ପଦକ ମଧ୍ୟରୁ ଭକ୍ତରାମ ଦେସ୍ତି ୨ ଓ ଝିଲ୍ଲୀ ଦଳବେହେରା ଗୋଟିଏ ପାଇଥିଲେ। ସେହିଭଳି ସ୍ନେହା ସୋରେନଙ୍କୁ ରୌପ୍ୟ ପଦକରେ ସନ୍ତୁଷ୍ଟ ହେବାକୁ ପଡ଼ିଥିଲା। ମୋଟ୍ ଉପରେ ଭାରତୀୟ ଦଳ କିନ୍ତୁ ମଙ୍ଗଳବାର ୮ ସ୍ବର୍ଣ୍ଣ, ୩ ରୌପ୍ୟ ଓ ୨ ବ୍ରୋଞ୍ଜ ସହ ମୋଟ୍ ୧୩ ପଦକ ହାସଲ କରିଛି।
ଝିଲ୍ଲୀ ଦଳ ବେହେରା ସିନିୟର ମହିଳା ୪୫ କିଗ୍ରା ବର୍ଗରେ ୧୫୪ କିଗ୍ରା ଭାର ଉଠାଇ ପ୍ରଥମ ସ୍ଥାନ ଲାଭ କରିଥିଲେ। ସେ ସ୍ନାଚରେ ୭୦ ଓ କ୍ଲିନ ଆଣ୍ଡ୍ ଜର୍କରେ ୯୪ କିଗ୍ରା ଉଠାଇଥିଲେ। ସେହିଭଳି ଜୁନିୟର ଓ ୟୁଥ୍ ପୁରୁଷ ବିଭାଗର ୪୯ କିଗ୍ରା ବିଭାଗରେ ଭକ୍ତରାମ ମୋଟ୍ ୧୮୫ (ସ୍ନାଚରେ ୭୭+କ୍ଲିନ୍ ଆଣ୍ଡ୍ ଜର୍କରେ ୧୦୮) କିଗ୍ରା ଭାର ଉଠାଇ ୨ ସ୍ବର୍ଣ୍ଣ ପଦକ ହାସଲ କରିଥିଲେ। ଜୁନିୟର ମହିଳା ବିଭାଗର ୫୫ କିଗ୍ରା ବର୍ଗରେ ସ୍ନେହା ମୋଟ୍ ୧୬୯ (୭୩+୯୬) କିଗ୍ରା ସହ ପୋଡିୟମର ୨ୟ ସ୍ଥାନରେ ରହି ରୌପ୍ୟ ପଦକ ଜିତିଛନ୍ତି।
କି, ଏହି ପ୍ରତିଯୋଗିତାରୁ ୨୦୨୦ ଟୋକିଓ ଅଲିମ୍ପିକ୍ସ ନିମନ୍ତେ ଯୋଗ୍ୟତା ଅର୍ଜନ ପାଇଁ ଖେଳାଳି ଚୟନ ହେବ। କିନ୍ତୁ ଝିଲ୍ଲୀ ଅଂଶଗ୍ରହଣ କରୁଥିବା ସିନିୟର ମହିଳା ୪୫ କିଗ୍ରା ଓଜନ ବର୍ଗଟି ଅଲିମ୍ପିକ୍ସରେ ନ ଥିବାରୁ ତାଙ୍କୁ ନିରାଶ ହେବାକୁ ପଡ଼ିଛି। ଓଡ଼ିଆ ଭାରୋତ୍ତୋଳନକାରୀଙ୍କ ଏହି ସଫଳତା ଲାଗି ଚାରିଆଡ଼ୁ ସେମାନଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ରାଜ୍ୟ ସଂଘର ଉପସଭାପତି ଲକ୍ଷ୍ମୀ ନାରାୟଣ ରାଉତ, ଡ. ହରିପ୍ରସାଦ ପଟ୍ଟନାୟକ, ମନୋରଞ୍ଜନ ଦାସ, କୁମୁଦ ଚନ୍ଦ୍ର ସାହୁ, ଯୁଗ୍ମ ସମ୍ପାଦକ ରମେଶ ଚନ୍ଦ୍ର ପାଢ଼ୀ, ରବି ପ୍ରତିହାରୀ, ଜାନକୀ ବଲ୍ଲଭ ମିଶ୍ର, କୋଷାଧ୍ୟକ୍ଷ ଯଜ୍ଞ ନାରାୟଣ ନନ୍ଦ, ସଦସ୍ୟ ଗାଗାରିନ ନାୟକ, ଦୁର୍ଗାମାଧବ ନାୟକ, ଚନ୍ଦ୍ରଶେଖର ସାହୁ, କାର୍ଯ୍ୟକାରୀ ସଭାପତି ନୀଳମଣି ସାହୁ, ସମ୍ପାଦକ ନାରାୟଣ ସାହୁ ଓ ସଭାପତି ଇଂ. ଚିତ୍ତରଞ୍ଜନ ସ୍ବାଇଁ ଖେଳାଳିମାନଙ୍କୁ ଶୁଭେଚ୍ଛା ଜଣାଇବା ସହ ସେମାନଙ୍କ ଉତ୍ତୋରତ୍ତର
