ମାଲକାନଗିରି,୧ା୪(ଡି.ଏନ୍.ଏ.): ରାଜ୍ୟରେ ମଙ୍ଗଳବାର କରୋନା ଭାଇରସ୍ରେ ପୀଡ଼ିତ ଚତୁର୍ଥ ରୋଗୀ ଚିହ୍ନଟ ପରେ ମାଲକାନଗିରି ଜିଲାରେ ଏହାର ପ୍ରଭାବ ପଡ଼ିଛି। କାରଣ ଜିଲାରୁ ଅଧିକାଂଶ ଶ୍ରମିକ ରାଜ୍ୟ ବାହାରୁ ଘରମୁହାଁ ହୋଇଛନ୍ତି। ଏମାନଙ୍କୁ ଚିହ୍ନଟ, ଡାକ୍ତରୀ ପରୀକ୍ଷା ସହ ୧୪ଦିନ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ପ୍ରଶାସନ ଜିଲାରେ ଯୁଦ୍ଧକାଳୀନ ଭିତିରେ କାର୍ଯ୍ୟ କରୁଛି। ମାଲକାନଗିରି ପୌରପରିଷଦ ଅଧୀନରେ ପୁରୁଣା ଜିଲା ସ୍ବାସ୍ଥ୍ୟକେନ୍ଦ୍ରରେ ୧୦୦ ଶଯ୍ୟା, ବିଇଡି ମହାବିଦ୍ୟାଳୟରେ ୨୫୦ ଶଯ୍ୟା, ଆଇଟିଆଇ ବିଦ୍ୟାଳୟରେ ୧୦୦ ଶଯ୍ୟା, ପଲିଟେକ୍ନିକ୍ ମହାବିଦ୍ୟାଳୟରେ ୧୦୦ ଶଯ୍ୟା, କଲ୍ୟାଣ ମଣ୍ଡପରେ ୧୦୦ ଶଯ୍ୟା, ଏକଲବ୍ୟ ବିଦ୍ୟାଳୟରେ ୧୦୦ ଶଯ୍ୟା ଏହିପରି ଜିଲା ସଦର ମହକୁମାରେ ମୋଟ୍ ୭୫୦ ଶଯ୍ୟା ପ୍ରସ୍ତୁତ କରାଯାଇଛି। ପ୍ରତିକେନ୍ଦ୍ରରେ ମଧ୍ୟାହ୍ନ ଓ ରାତ୍ରି କାଳୀନ ଭୋଜନ ପାଇଁ ସମସ୍ତ ବ୍ୟବସ୍ଥା ହୋଇଥିବା ମାଲକାନଗିରି ପୌର ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଏମ୍. ନୀଳକଣ୍ଠ ନାଇଡୁ ପ୍ରକାଶ କରିଛନ୍ତି।