ଭୁବନେଶ୍ୱର,୧୦ା୮(ବ୍ୟୁରୋ): ଏକଦା ବଳକା ବିଦ୍ୟୁତ୍ ରାଜ୍ୟ ବୋଲି ଡିିଣ୍ଡିମ ପିଟୁଥିବା ଓଡ଼ିଶା ଏବେ ଉତ୍କଟ ବିଦ୍ୟୁତ୍ ସଙ୍କଟର ସମ୍ମୁଖୀନ ହୋଇଛି। ପରିସ୍ଥିତି ଏପରି ହେଲାଣି ଯେ, ବାହାର ରାଜ୍ୟକୁ ବିଦ୍ୟୁତ୍ ବିକ୍ରି କରୁଥିବା ଓଡ଼ିଶା ଏବେ ଆନ୍ତଃରାଜ୍ୟ ଉତ୍ପାଦନ କେନ୍ଦ୍ରରୁ ବିଦ୍ୟୁତ୍ କିଣିବାକୁ ବାଧ୍ୟ ହେଉଛି।
ରାଜ୍ୟରେ ଚାହିଦା ଏବଂ ଉତ୍ପାଦନ ମଧ୍ୟରେ ତାରତମ୍ୟକୁ ଦୂର କରିବାକୁ ଯାଇ ରାଜ୍ୟ ସରକାର ଗୁରୁବାର ୪ ମିଲିୟନ ୟୁନିଟ ବିଦ୍ୟୁତ କିଣିଥିବା ଷ୍ଟେଟ ଲୋଡ୍ ଡେସ୍ପାଚ୍ ସେଣ୍ଟରରୁ ପ୍ରାପ୍ତ ସୂଚନାରୁ ଜଣାପଡିଛି। ଆନ୍ତଃରାଜ୍ୟ ଉତ୍ପାଦନ କେନ୍ଦ୍ରରୁ ରାଜ୍ୟ ସରକାର ଗୁରୁବାର ସୁଦ୍ଧା ୫୫.୮୩ ମିଲିୟନ ୟୁନିଟ ବିଦ୍ୟୁତ୍ କିଣିପାରିବେ। ତେବେ ଏହା ଗୁରୁବାର ସୁଦ୍ଧା ୫୧.୭୧ ମିଲିୟନ ୟୁନିଟ ନେଇସାରିଛି। ତଥାପି ଏହା ୭୧.୮୪ ମିଲିୟନ ୟୁନିଟ ଚାହିଦାଠାରୁ ବହୁ ଦୂରରେ ରହିଛି। ଅନେକ ସ୍ଥାନରେ ବିଦ୍ୟୁତ୍ ଯୋଗାଣ ସମ୍ଭବ ହୋଇପାରୁନାହିଁ। ତେବେ ବିଦ୍ୟୁତ୍ ସଙ୍କଟ ସୃଷ୍ଟି ହେବାର ବହୁ କାରଣ ରହିଛି। ରାଜ୍ୟରେ ୧୧,୭୦୯ ମେଗାଓ୍ବାଟ୍ ବିଦ୍ୟୁତ୍ ଉତ୍ପାଦନ କ୍ଷମତା ରହିଛି। ତେବେ ଷ୍ଟେର୍ଲାଇଟରେ ଆଦୌ ବିଦ୍ୟୁତ୍ ଉତ୍ପାଦନ ହେଉନାହିଁ। ଏପରି କି ତାଳଚେର ଶକ୍ତି କେନ୍ଦ୍ରରେ କ୍ଷମତାଠାରୁ କମ୍ ବିଦ୍ୟୁତ୍ ଉତ୍ପାଦନ ହେଉଛି। ରାଜ୍ୟର ବିଭିନ୍ନ ଶକ୍ତିକେନ୍ଦ୍ରରୁ ପ୍ରାୟ ପିକ୍ ଆଓ୍ବାରରେ ୧୧୪୦ ମେଗାଓ୍ବାଟ ଓ ଅଣପିକ୍ ଆଓ୍ବାରରେ ୮୭୯ ମେଗାଓ୍ବାଟ ବିଜୁଳି ଉତ୍ପାଦନ କରାଯାଉଛି। ଫଳରେ ଜଳବିଦ୍ୟୁତ କେନ୍ଦ୍ରଗୁଡ଼ିକ ଏହାର କ୍ଷମତାର ପୂର୍ଣ୍ଣ ଉପଯୋଗ କରି ପାରୁନାହାନ୍ତି। ସେହିପରି ପିକ୍ ଆଓ୍ବାର ଓ ଅଣପିକ୍ ଆଓ୍ବାରରେ ଇନ୍ଦ୍ରାବତୀ ଏବଂ ଚିପିଲିମାରେ ଆଦୌ ବିଦ୍ୟୁତ୍ ଉତ୍ପାଦନ ହେଉନାହିଁ।