ଭୁବନେଶ୍ୱର,୯-୬(ବ୍ୟୁରୋ): ସିଣ୍ଡିକେଟ ବ୍ୟାଙ୍କ ବର୍ତ୍ତମାନ ଭୁବନେଶ୍ୱରରେ ୨ ଏବଂ ବ୍ରହ୍ମପୁରରେ ନୂଆ ଆଞ୍ଚଳିକ କାର୍ଯ୍ୟାଳୟ ସହ ସେବା ଯୋଗାଉଛି। ରାଜ୍ୟରେ ସହରୀକରଣ ଧାରା ଦ୍ରୁତ ହେଉଥିବାରୁ ଏହି ଧାରାକୁ ତ୍ୱରାନ୍ବିତ କରିବା ଲାଗି ବ୍ୟାଙ୍କ ବିଭିନ୍ନ ପଦକ୍ଷେପ ନେଉଛି। ରାଜ୍ୟରେ ମୋଟ ୧୦୮ ଶାଖା ସହ ବ୍ୟାଙ୍କ ସେବା ଯୋଗାଣ କରୁଛି। ଚଳିତ ବର୍ଷ ସାରା ଦେଶରେ ୨୫୦ ଶାଖା ସହ ରାଜ୍ୟରେ ୨୫ ରୁ ୩୦ ନୂଆ ଶାଖା ଖୋଲିବା ନେଇ ଯୋଜନା ରହିଥିବା ବ୍ୟାଙ୍କର ଏମ୍ଡି ତଥା ସିଇଓ ମୃତ୍ୟୁଞ୍ଜୟ ମହାପାତ୍ର ସୂଚନା ଦେଇଛନ୍ତି।
ଭୁବନେଶ୍ୱର-୨ ଆଞ୍ଚଳିକ କାର୍ଯ୍ୟାଳୟର ନିଜସ୍ବ ଅଫିସଗୃହ ଶୁଭ ଉଦଘାଟନ ଅବସରରେ ମହାପାତ୍ର କହିଛନ୍ତି ଯେ, ଭୁବନେଶ୍ୱର-୧ କାର୍ଯ୍ୟାଳୟର ମୋଟ ବ୍ୟବସାୟ ୨୫୬୬ କୋଟି ଟଙ୍କା ରହିଛି। ସେହିଭଳି ଭୁବନେଶ୍ୱର-୨ କାର୍ଯ୍ୟାଳୟ ୧୩୦୦ କୋଟି ଏବଂ ବ୍ରହ୍ମପୁର ୯୦୦ କୋଟି ଟଙ୍କାର କାରବାର ହାସଲ କରିଛି। ସାରା ଦେଶରେ ୪,୨୦୦ ଶାଖା ସହ ମୋଟ କାରବାର ୪.୯୦ ଲକ୍ଷ କୋଟି ଟଙ୍କା ଛୁଇଁଛି। ଶିଳ୍ପକୁ ଋଣ ପ୍ରଦାନ ବାଦ ହାଉସିଂ, ଏମ୍ଏସ୍ଏମ୍ଇ, ପିଏସ୍ବି ଲୋନ ୫୯ ମିନିଟ ଋଣ ଭଳି ପ୍ରଡକ୍ଟ ବ୍ୟାଙ୍କ ଏହାର ପୋର୍ଟଫୋଲିଓରେ ସାମିଲ କରିଛି। ରାଜ୍ୟରେ ଏମ୍ଏସ୍ଏମ୍ଇ ଅଭିବୃଦ୍ଧିକୁ ଧ୍ୟାନରେ ରଖି ସଂସ୍ଥାଗୁଡିକୁ ୨୦ ମିନିଟରେ ଋଣ ପ୍ରଦାନ କରିବା ନେଇ ବ୍ୟବସ୍ଥା ହୋଇଥିବା ସେ କହିଛନ୍ତି।
ବ୍ୟାଙ୍କର ଡିଜିଟାଲ ପଦକ୍ଷେପ ଉପରେ ସୂଚନା ଦେଇ ସେ କହିଛନ୍ତି, ବ୍ୟାଙ୍କ ଡିଜିଟାଲ ବ୍ୟାଙ୍କିଙ୍ଗ ଭିତ୍ତିଭୂମିରେ ବାର୍ଷିକ ପ୍ରାୟ ୭୦୦ କୋଟି ଟଙ୍କା ଖର୍ଚ୍ଚ କରୁଛି। ସେହିଭଳି ପାର୍ଟନରଙ୍କ ସହ ମିଳିତ ହୋଇ ଏହା ସମ୍ପ୍ରସାରଣ ଧାରା ଜାରି ରଖିଛି। ବ୍ୟାଙ୍କର ମୋଟ ନେଣଦେଣର ୨୮% ଏବେ ଡିଜିଟାଲ ମାଧ୍ୟମରେ ହେଉଛି। ଆଗାମୀ ୨ ବର୍ଷରେ ଏହା ୪୫%କୁ ବଢିବା ନେଇ ସେ ମହାପାତ୍ର ଆଶା ରଖିଛନ୍ତି। ସେହିଭଳି ରାଜ୍ୟରେ ପ୍ରଫେସନାଲଙ୍କ ଅଭିବୃଦ୍ଧି ଅନ୍ୟ ରାଜ୍ୟ ତୁଳନାରେ ୧୦ରୁ ୧୮% ଅଧିକ। ପରିବର୍ତ୍ତିତ ସ୍ଥିତିରେ ଗ୍ରାହକଙ୍କୁ ସେବା ଯୋଗାଣ ଏବଂ ରାଜ୍ୟରେ କୃଷି ଭିତ୍ତିକ ଅର୍ଥନୀତିକୁ ପ୍ରୋତ୍ସାହିତ କରାଯାଉଥିବା ସେ ପ୍ରକାଶ କରିଛନ୍ତି।
ଚଳିତ ବର୍ଷ ୫୦୦ରୁ ୧୦୦୦ କୋଟି ଟଙ୍କା ଲାଭ ହାସଲ କରିବା ନେଇ ଆଶାବାଦୀ ଥିବା ମହାପାତ୍ର କହିଛନ୍ତି। ସେ ଆହୁରୀ ମଧ୍ୟ କହିଛନ୍ତି ଯେ, ରାଜ୍ୟରେ ବ୍ୟାଙ୍କର ନେଟ୍ ଏନ୍ପିଏ ୫.୯% ଏବଂ ଗ୍ରସ୍ ଏନ୍ପିଏ ୧୦.୯% ରହିଛି। ୨୦୨୦ ମାର୍ଚ୍ଚ ସୁଦ୍ଧା ବ୍ୟାଙ୍କର ନେଟ୍ ଏନ୍ପିଏ ୫.୪%ରେ ପହଞ୍ଚିବ। ନୂଆ ୨୫ ରିଜିଅନ ଖୋଲିବା ଦ୍ୱାରା ଏହା ବର୍ତ୍ତମାନ ମୋଟ ୯୫ରେ ପହଞ୍ଚିଛି। ଗତ ୨ ତ୍ରୈମାସରେ ବ୍ୟାଙ୍କ ଟର୍ନ ଆରାଉଣ୍ଡ କରିଥିବା ବେଳେ ଡିସେମ୍ବର ତ୍ରୈମାସରେ ବ୍ୟାଙ୍କ ୧୦୮ କୋଟି ଏବଂ ମାର୍ଚ୍ଚ ତ୍ରୈମାସରେ ଏହା ୧୨୮ କୋଟି ଟଙ୍କା ଲାଭ କରିଛି। ମାତ୍ର ଗତ ଆର୍ଥତ୍କ ବର୍ଷରେ ବ୍ୟାଙ୍କ ୨୪୭୮ କୋଟି ଟଙ୍କା କ୍ଷତି ସହିଛି। ସେହିଭଳି ବ୍ୟାଙ୍କ ୧୦ରୁ ୧୫ ବେସିସ ପଏଣ୍ଟ ସୁଧହାର ହ୍ରାସ କରିବା ନେଇ ସେ ଆଶା ରଖିଛନ୍ତି। ଅଗ୍ରାଧିକାର କ୍ଷେତ୍ରକୁ ଋଣ ପ୍ରଦାନ, ଫନୀ ପ୍ରଭାବିତ ଅଞ୍ଚଳଗୁଡିକରେ ଋଣ ପୁନର୍ଗଠନ,ରିଲିଫ ଭଳି କାର୍ଯ୍ୟରେ ବ୍ୟାଙ୍କ ନିଜର ଯୋଗଦାନ ରଖିଥିବା ମହାପାତ୍ର ସୂଚନା ଦେଇଛନ୍ତି।