ବଣାଇ, ୨୬।୧୨(ସ୍ବ.ପ୍ର.)-ଓଡ଼ିଶା ଅଲମ୍ପିକ ସ୍ବୀକୃତିପ୍ରାପ୍ତ ଓଡ଼ିଶା ମୁଏଥାଇ ୟୁନିୟନ ଏବଂ ଆର୍ଟସ ଟେମ୍ପୁଲର ୯ମ ରାଜ୍ୟସ୍ତରୀୟ ପ୍ରତିଯୋଗିତା ଗତ ୨୩ ଓ ୨୪ ତାରିଖରେ ଅନୁଷ୍ଠିତ ହୋଇଯାଇଛି। ବୌଦ୍ଧ ଜିଲାର ଗୁରୁ ଭିକାରୀ ନାୟକ କଳାମଣ୍ଡପଠାରେ ଅନୁଷ୍ଠିତ ଏହି ପ୍ରତିଯୋଗିତାରେ ରାଜ୍ୟର ୨୧ ଜିଲାରୁ ୧୭୫ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଆର୍ଟସ ଟେମ୍ପୁଲ ସୁନ୍ଦରଗଡ଼ ଜିଲାର ବଣାଇଁ ଉପଖଣ୍ଡ କେନାଭେଟା ଗ୍ରାମରୁ ପ୍ରଶିକ୍ଷକ ସଞ୍ଜୟ କୁମାର କିଷାନଙ୍କ ତତ୍ତ୍ୱାବଧାନରେ ୨୮ଜଣ ପ୍ରତିଯୋଗୀ ସୁନ୍ଦରଗଡ଼ ଜିଲା ତରଫରୁ ପ୍ରତିନିଧିତ୍ୱ କରିଥିଲେ। ୧୧ସ୍ବର୍ଣ୍ଣ ପଦକ, ୧୦ ରୌପ୍ୟ ପଦକ ଓ ୬ ବ୍ରୋଞ୍ଚ ପଦକ ସହ ଶୀର୍ଷ ସ୍ଥାନ ଅଧିକାର କରି ପ୍ରତିଯୋଗିତାରେ ଦଳଗତ ଚାମ୍ପିୟନ ହେବାର ଗୌରବ ଲାଭ କରିଛନ୍ତି। ଏହି ପ୍ରତିଯୋଗିତାରେ ଚନ୍ଦ୍ରଶେଖର ରାଉତ, ହେମନ୍ତ ନାଏକ, ଅରୁଣ କମାର ବେହେରା, ମାନଭଞ୍ଜନ ବେଟି, ଆକାଶ ଜେନା, ରବୀନ୍ଦ୍ର ଧରୁଆ, ଜିତେନ୍ଦ୍ର କୁମାର ବେହେରା, ଅସ୍ମିତା କିଷାନ, ସସ୍ମିତା ନାଏକ, ବର୍ଷା ପ୍ରିୟଦର୍ଶନୀ କିଷାନ, ସୁଶ୍ରୀ ସମୀକ୍ଷା ସାହୁ, ନିଜ ବୟସ ଓ ଓଜନ ବର୍ଗରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ସେହିଭଳି ଅଭିନବ ବେହେରା, ରଞ୍ଜନ କିଷାନ, ତ୍ରିଲୋଚନ ବେହେରା, ତନ୍ମୟ ପ୍ରଧାନ, ଝସକେତନ ଭୋଇ, ଅଶୋକ କିସାନ, ଅନିଲ କୁମାର ସାହୁ, ଜଗତପତି ସାହୁ, ଲକିରାମ ମୁଣ୍ଡା, ପରମେଶ୍ୱର କିଷାନ ରୌପ୍ୟ ପଦକ ହାସଲ କରିଥିବା ବେଳେ ମନୋଜ ରଣା, ଲିଙ୍ଗରାଜ ନାଏକ, ରୋମିଓ ରଞ୍ଜନ ରାଉତ, ସିଦ୍ଧାନ୍ତ ଚାର୍ଦ୍ଦିଆ, ହୃଷୀକେଶ କିସାନ, ପ୍ରତୀକ କୁମାର ରାଉତ ବ୍ରୋଞ୍ଜ ପଦକ ହାସଲ କରି ସୁନ୍ଦରଗଡ଼ ଜିଲା ପାଇଁ ଗୌରବ ଆଣି ଦେଇଛନ୍ତି। ସ୍ବର୍ଣ୍ଣ ପଦକ ହାସଲ କରିଥିବା ପ୍ରତିଯୋଗୀ ଜାତୀୟ ସ୍ତରରେ ହେବାକୁ ଥିବା ପ୍ରତିଯୋଗିତା ପାଇଁ ମନୋନୀତ ହୋଇଥିବାରୁ ବଣାଇ ଅଞ୍ଚଳର ବୁଦ୍ଧିଜୀବୀ ଓ ଅଭିଭାବକ ମହଲରେ ଖୁସିର ଲହରୀ ଖେଳି ଯିବା ସହିତ ପ୍ରତିଯୋଗୀଙ୍କୁ ସ୍ବାଗତ ଜଣାଇଛନ୍ତି।
