ଅନୁଗୋଳ ଅଫିସ, ୨୦।୮
ରାଜ୍ୟସ୍ତରୀୟ ଲୋକ ମହୋତ୍ସବ ପାଇଁ ଅନୁଗୋଳ ଜିଲାର ବିଭିନ୍ନ ବ୍ଲକର କଳାକାରମାନଙ୍କ ଉପସ୍ଥିତିରେ ସୋମବାର କଣିହାଁ ବ୍ଲକ ଟାକୁଆ ଗ୍ରାମସ୍ଥିତ ଶିବ ମନ୍ଦିର ପରିସରରେ ଏକ ପ୍ରସ୍ତୁତି ବୈଠକ ବସିଥିଲା। ରାଜ୍ୟସ୍ତରୀୟ ସାଂସ୍କୃତିକ ଅନୁଷ୍ଠାନର ଅନୁଗୋଳ ଜିଲା ସଭାପତି ତଥା କଣିହଁା ବ୍ଲକ କଳାସଂସ୍କୃତି ସଂଘ ଉପସଭାପତି ଓ ଜିଲା ସଂସ୍କୃତି ପରିଷଦର ସଦସ୍ୟ ନବଘନ ସାମଲଙ୍କ ତତ୍ତ୍ବାବଧାନରେ ଅନୁଷ୍ଠିତ ଏହି ବୈଠକରେ ପୋକତୁଙ୍ଗା ଗ୍ରାମର ଗାୟକ ଚୂଡ଼ାମଣି ସୁରେଶ ଚନ୍ଦ୍ର ସାହୁ ସଭାପତିତ୍ୱ କରିଥିଲେ। ଏଥିରେ କଳାକାରମାନେ ଭୋଗୁଥିବା ବିଭିନ୍ନ ସମସ୍ୟା ଉପରେ ଆଲୋଚନା କରାଯାଇଥିଲା। କଳାକାରଙ୍କୁ ସରକାର ଅବହେଳା କରିଚାଲିଥିବା ଏବଂ ସେମାନଙ୍କ ଉନ୍ନତି ଦିଗରେ ଆବଶ୍ୟକ ପଦକ୍ଷେପ ନିଆଯାଉ ନ ଥିବା ଅଭିଯୋଗ ହୋଇଥିଲା। କଳାକାରଙ୍କ ପାଇଁ କୌଣସି ଆନୁଷଙ୍ଗିକ ବ୍ୟବସ୍ଥା କରାଯାଉ ନ ଥିବାବେଳେ ମୁଖ୍ୟମନ୍ତ୍ରୀ ଘୋଷଣା କରିଥିବା ୫୦ ହଜାର ଟଙ୍କା ସହାୟତା ରାଶି ପାଇଁ ଆଜି ପର୍ଯ୍ୟନ୍ତ କଳାକାର ଚୟନ ମଧ୍ୟ ହୋଇ ନ ଥିବା ବୈଠକରେ ଅଭିଯୋଗ କରାଯାଇଥିଲା। ଏଥିସହ ଜିଲାରେ ଏହି ମହୋତ୍ସବ ଆୟୋଜନ କରିବାକୁ ପ୍ରସ୍ତାବ ଆଗତ ହୋଇଥିଲା। ଏହି ଅବସରରେ ‘ରୁମୁକୁଝୁମାନା’ ସଙ୍ଗଠନର ବ୍ଲକ ଓ ଜିଲା ପଦାଧିକାରୀ ମନୋନୀତ ହୋଇଥିଲେ। ଅନୁଗୋଳ ବ୍ଲକ ପାଇଁ ସୁରେଶ ଚନ୍ଦ୍ର ସାହୁ (ପୋକତୁଙ୍ଗା), ଛେଣ୍ଡିପଦା ବ୍ଲକ ପାଇଁ ବିଦ୍ୟାଧର ନାଥ (ଭୁବନପୁର), ତାଳଚେର ପାଇଁ ସବିତା ସିଂ(ତାଳଚେର), ବଅଁରପାଳ ପାଇଁ ସମିତା ମହାନ୍ତି(ବୁଢ଼ାପଙ୍କ), କଣିହଁା ପାଇଁ ବିପିନି ବିହାରୀ ପଟ୍ଟନାୟକ(ପୋଡ଼ାଗଡ଼), ପାଲଲହଡ଼ା ପାଇଁ ଧ୍ରୁବଚରଣ ସାହୁ(ରୋହିଲା) ଓ ଜିଲା ମହିଳା କଳାକାର ସାମ୍ମୁଖ୍ୟ ପାଇଁ ଜିଲା ସଭାନେତ୍ରୀ ଶାନ୍ତିଲତା ଦାଶ, ସମ୍ପାଦିକା ସବିତା ସିଂ, ଉପସଭାପତି ଭାବେ ସମିତା ମହାନ୍ତିଙ୍କୁ ମନୋନୀତ କରାଯାଇଛି। ଅନ୍ୟ ୨ଟି ବ୍ଲକ ପଦାଧିକାରୀ ଚୟନ ପାଇଁ ପରବର୍ତ୍ତୀ ବୈଠକରେ ନିଷ୍ପତ୍ତି ନିଆଯିବ ବୋଲଇ ଜଣାଯାଇଛି।