ଅନୁଗୋଳ ଅଫିସ, ୧୫।୧ – ରାଜ୍ୟ ଅର୍ଥ ଓ ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ ମଙ୍ଗଳବାର ଅନୁଗୋଳ ଗସ୍ତରେ ଆସି ସର୍କିଟ ହାଉସ ଠାରେ ଜିଲା ଅବକାରୀ ବିଭାଗର ରାଜସ୍ବ ସଂଗ୍ରହ ଓ ମଲ୍ଟି ଡିସିପ୍ଲିନାରୀ ସ୍କ୍ବାଡ୍ର ନିୟମିତ ଚଢ଼ାଉ ସମ୍ପର୍କରେ ସମୀକ୍ଷା କରିଥିଲେ। ଏହି ବୈଠକରେ ତାଳଚେର ବିଧାୟକ ବ୍ରଜକିଶୋର ପ୍ରଧାନ, ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ଓ ପାଲଲହଡ଼ା ବିଧାୟକ ମୁକେଶ କୁମାର ପାଲ ପ୍ରମୁଖ ଯୋଗଦେଇଥିଲେ। ମଦ ବିକ୍ରି କରି ରାଜସ୍ବ ସଂଗ୍ରହ ସରକାରଙ୍କ ଲକ୍ଷ୍ୟ ନୁହେଁ, କିଛି ବ୍ୟକ୍ତି ମଦ୍ୟପାନକୁ ଅଭ୍ୟାସଗତ ଭାବେ କରୁଥିବାରୁ ସେମାନଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି ଅବକାରୀ ସାଙ୍କେତିକ ଚିହ୍ନଥିବା ମଦ ବିକ୍ରି କରାଯାଉଛି ବୋଲି ମନ୍ତ୍ରୀ ପ୍ରକାଶ କରିଥିଲେ। ତେବେ ଅବକାରୀ ବିଭାଗ ବିପୁଳ ପରିମାଣର ଗଞ୍ଜେଇ ଗଛ ନଷ୍ଟ କରୁଥିବା ବେଳେ କେତେ ଲୋକଙ୍କ ନାମରେ ମାମଲା କରିଛି ତାହାର ତଥ୍ୟ ମନ୍ତ୍ରୀଙ୍କୁ ପ୍ରଦାନ କରାଯାଇ ନ ଥିଲା।
ଏହି ଅବସରରେ ମନ୍ତ୍ରୀ କହିଥିଲେ ଯେ, ଅବକାରୀ ବିଭାଗର ଉକ୍ତ ଚିହ୍ନକୁ ଯେଉଁମାନେ ଜାଲିଆତ କରି ଅପମିଶ୍ରିତ ମଦ ବିକ୍ରି କରୁଛନ୍ତି ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉଛି। ପୋଲିସ, ଅବକାରୀ, ଡ୍ରଗ୍ସ ଓ ବନ ବିଭାଗକୁ ନେଇ ଗଠିତ ମଲ୍ଟି ଡିସିପ୍ଲିନାରୀ ସ୍କ୍ବାଡ୍ ନିୟମିତ ଚଢ଼ାଉ ଜାରି ରଖିବାକୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ସାମ୍ପ୍ରତିକ ପରିସ୍ଥିତିରେ ଯୁବବର୍ଗ ଦ୍ୱାରା ବହୁଳ ଭାବେ ବ୍ୟବହାର ହେଉଥିବା କଫ୍ ସିରପ୍ ଓ ଡଗ୍ସକୁ ନେଇ ମନ୍ତ୍ରୀ ଉଦ୍ବେଗ ପ୍ରକାଶ କରିଥିଲେ। ଜିଲାରେ ସ୍କ୍ବାଡ୍ ଦ୍ୱାରା ନିୟମିତ ଚଢ଼ାଉ କରି ରଖିବା ସହ ଯେଉଁମାନେ ଏହି କାର୍ଯ୍ୟରେ ସଫଳତା ହାସଲ କରିବେ ସେମାନଙ୍କୁ ପୁରସ୍କୃତ କରାଯିବ ବୋଲି ମନ୍ତ୍ରୀ ପ୍ରକାଶ କରିଥିଲେ। ତେବେ ଚୋରା ମଦ, ଡ୍ରଗ୍ସ କାରବାର ଉପରେ ଚଢ଼ାଉ ଓ ଗଞ୍ଜେଇ ଗଛ ନଷ୍ଟ କ୍ଷେତ୍ରରେ ସ୍କ୍ବାଡ୍ ସଫଳତାରେ ମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ। ମହୁଲ ଫୁଲକୁ ଦେଶୀ ମଦ ପ୍ରସ୍ତୁତିରେ ବ୍ୟବହାର କରିବା ସହ ଅନ୍ୟ ରାସାୟନିକ ପଦାର୍ଥ ବ୍ୟବହାର କରୁଥିବା ବ୍ୟକ୍ତିଙ୍କ ପ୍ରତି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ବୈଠକରେ ଉପସ୍ଥିତ ଅବକାରୀ କମିଶନର ଅଞ୍ଜନ କୁମାର ମାନିକ ଅବାଧ ଓ ଅପମିଶ୍ରତ ମଦ କାରବାରକୁ କଡ଼ାକଡ଼ି ଯାଞ୍ଚ କରିବାକୁ ପରାମର୍ଶ ଦେଇଥିଲେ। ବେଆଇନ ଗଞ୍ଜେଇ ଚାଷ ଡ୍ରୋନ କ୍ୟାମେରା ଯୋଗେ ନଷ୍ଟ କରାଯିବ ବୋଲି ସେ ପ୍ରକାଶ କରିଥିଲେ। ସହରର ବିଭିନ୍ନ ଦୋକାନରେ ଉପଲବ୍ଧ ହେଉଥିବା ନିଶାଯୁକ୍ତ କଫ ସିରପ ଉପରେ ସତର୍କ ଦୃଷ୍ଟି ରଖିବା ସହ ବିକ୍ରେତାମାନଙ୍କୁ ନିୟମିତ ତଥ୍ୟ ମାଗିବାକୁ ପରାମର୍ଶ ଦେଇଥିଲେ। ମଦ ଦୋକାନ ନ ଥିବା ଅଞ୍ଚଳରେ ସର୍ଭେ କରି ନୂତନ ଦୋକାନ ପାଇଁ ବିଜ୍ଞାପନ ଦେବାକୁ ମନ୍ତ୍ରୀ ପରାମର୍ଶ ଦେଇଥିଲେ। ଜିଲାପାଳ ମନୋଜ କୁମାର ମହାନ୍ତି ନିୟମିତ ଜିଲାସ୍ତରୀୟ ବୈଠକ କରାଯାଇ ଏହାର ସମୀକ୍ଷା କରାଯାଉଛି ବୋଲି ମନ୍ତ୍ରୀଙ୍କୁ ଅବଗତ କରିଥିଲେ। ଜିଲା ଆରକ୍ଷୀ ଅଧୀକ୍ଷକ ଜଗମୋହନ ମୀନା ଚଢ଼ାଉ ସମ୍ପର୍କରେ ସୂଚନା ଦେଇଥିଲେ। ମାଲକାନଗିରିରେ ଥିବାବେଳେ ଏ କ୍ଷେତ୍ରରେ ମିଳିଥିବା ସଫଳତାକୁ ଦୋହରାଇବା ପାଇଁ ମନ୍ତ୍ରୀ ଏସ୍ପିଙ୍କୁ ପରାମର୍ଶ ଦେଇଥିଲେ। ମଦ ବିକୁଥିବା ବ୍ୟକ୍ତି ବୋତଲ ଉପରେ ଥିବା ଅବକାରୀ ଛାପା ସହ ଏହା ଅସଲି କିମ୍ବା ନକଲି ଜାଣିବା ପାଇଁ ଖୁବ୍ଶୀଘ୍ର ଏକ ଆପ୍ ପ୍ରଚଳନ କରାଯିବ ବୋଲି କମିଶନର ପ୍ରକାଶ କରିଥିଲେ। ଏହି ବୈଠକରେ ଅବକାରୀ ବିଭାଗ ଉପକମିଶନର ରାମଚନ୍ଦ୍ର ପାଲଟାଙ୍କ ସମେତ ଅବକାରୀ ବିଭାଗର କର୍ମକର୍ତ୍ତାମାନେ ଯୋଗଦେଇଥିଲେ। ପରେ ମନ୍ତ୍ରୀ ରନ୍ତଲେଇ ଠାରେ ଥିବା ଓଡ଼ିଶା ରାଜ୍ୟ