ଜୟପୁର,୩୦ା୩(ନି.ପ୍ର.): ଭାଇରସ୍କୁ ନେଇ ସୃଷ୍ଟି ହୋଇଥିବା ପରିସ୍ଥିତିର ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ସରକାର ତତ୍ପରତା ପ୍ରକାଶ କରିଛନ୍ତି। ସେହିପରି ସଂକ୍ରମଣକୁ ରୋକିବା ପାଇଁ ସବୁ ସ୍ତରରେ ଉଦ୍ୟମ ଚଳାଇଛନ୍ତି ରାଜ୍ୟ ସରକାର। ତେବେ ବାହାର ରାଜ୍ୟ ଓ ବିଦେଶରୁ ଅସୁଥିବା ଲୋକଙ୍କୁ ନେଇ ଚିନ୍ତା ବଢ଼ିଛି। ମାର୍ଚ୍ଚ ୨୯ ସୁଦ୍ଧା ରାଜ୍ୟ ବାହାରୁ ଓ ବିଦେଶରୁ ୩ହଜାର ୭ଶହ ଜଣ କୋରାପୁଟ ଜିଲାକୁ ଫେରିଛନ୍ତି। ଏମାନଙ୍କ ମଧ୍ୟରୁ ଚିହ୍ନଟ ସନ୍ଦିିଗ୍ଧ ମାନଙ୍କୁ ୧୪ ଦିନ ସଙ୍ଗରୋଧରେ ରଖି ଚିକିତ୍ସା ବ୍ୟବସ୍ଥା କରାଯାଇଛି । ଏମାନେ ଆନ୍ଧ୍ର ପ୍ରଦେଶ, ତୋଲଙ୍ଗାନା, ବାଙ୍ଗାଲୋର୍, ଦିଲ୍ଲୀ, ହାଇଦ୍ରାବାଦ, ଚେନ୍ନାଇ, ପୁଣେ, ମଧ୍ୟପ୍ରଦେଶ, ଆଣ୍ଡାମାନ୍, କର୍ନାଟକ ଏବଂ ନେପାଳରୁ ଫେରିଥିବା ଜଣାପଡ଼ିଛି । ଏଥିପାଇଁ ଜିଲାର କୋରାପୁଟ ସହରରେ ୬ଟି, ଜୟପୁରରେ ୩, କୋଟପାଡରେ ୩, ସୁନାବେଡ଼ାରେ ୬ ସଙ୍ଗରୋଧ କେନ୍ଦ୍ର ଖୋଲାଯାଇଛି ।ସେହିପରି କୋରାପୁଟ ଜିଲାର ୨୪୦ ପଞ୍ଚାୟତ, ୧ ପୌରାଞ୍ଚଳ ଏବଂ ୩ ଏନ୍ଏସିର ବିଭିନ୍ନ ବିଦ୍ୟାଳୟ ଓ ପଞ୍ଚାୟତ କାର୍ଯ୍ୟାଳୟରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଖୋଲାଯାଇଛି । ୨୪୪ ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରରେ ୧୫,୧୧୫ ବେଡ୍ର ବ୍ୟବସ୍ଥା କରାଯାଇଥିବାବେଳେ ବେଡ୍ଗୁଡ଼ିକ ମଧ୍ୟରେ ୧ ମିଟର ଦୂରତା ରଖାଯାଇଛି। କରୋନା ସନ୍ଦେହରେ ଡାକ୍ତରଖାନା ଆସୁଥିବା ଜିଲାର ବିଭିନ୍ନ ଅଞ୍ଚଳର ଲୋକଙ୍କୁ ଏଠାରେ ରଖି ଚିକିତ୍ସା କରାଯିବା ପାଇଁ ବ୍ୟବସ୍ଥା ହୋଇଛି। ଏଥିସହ ଭୂତାଣୁ ସଂକ୍ରମଣରୁ ସୁରକ୍ଷା ପାଇଁ ମଧ୍ୟ ଗୁରୁତ୍ୱ ଦିଆଯାଇଛି। ସ୍ବାସ୍ଥ୍ୟକେନ୍ଦ୍ର ଓ ସଙ୍ଗରୋଧ କେନ୍ଦ୍ରରେ ଇନଭର୍ଟର, ବିଦ୍ୟୁତ୍, ପାନୀୟ ଜଳ ଏବଂ ଔଷଧ ଆଦିର ସୁବିଧା ରହିଛି। ତେବେ ବାହାର ରାଜ୍ୟରୁ ବହୁ ଲୋକ ଆଜି କୋରାପୁଟ ଜିଲାରେ ରହିଥିବାବେଳେ ଏମାନଙ୍କୁ ଖୋଜି ବାହାର କରିବା ପାଇଁ ପ୍ରଶାସନକୁ ନାକେଦମ ହେବାକୁ ପଡ଼ୁଛି । ଅନ୍ୟ ରାଜ୍ୟରୁ ଫେରିବା ପରେ ଏମାନେ ପ୍ରଶାସନକୁ ନ ଜଣାଇ ଚୁପ୍ ରହୁଛନ୍ତି। ତେଣୁ ଏମାନଙ୍କୁ ଖୋଜି ବାହାର କରିବା ଜରୁରୀ ବୋଲି ବୁଦ୍ଧିଜୀବୀଙ୍କ ମଧ୍ୟରେ ମତପ୍ରକାଶ ପାଇଛି।