ବାରିପଦା ଅଫିସ,୨୬ା୮- ମୟୂରଭଞ୍ଜ ଜିଲାର କଳାବାଡିଆ-ବାଙ୍ଗିରିପୋଷି, ଯଶୀପୁର- ଚମ୍ପୁଆ, ଆନନ୍ଦପୁର-ଠାକୁରମୁଣ୍ଡା – ଉଦଳା – ବାରିପଦା, ନୀଳଗିରି – କପ୍ତିପଦା – ବାରିପଦା ଏବଂ ଭଦ୍ରକ – ଆନନ୍ଦପୁର -କରଞ୍ଜିିଆ – ସିଙ୍ଗଡା ରାଜ୍ୟ ରାଜପଥକୁ ଜାତୀୟ ରାଜପଥରେ ପରିବର୍ତ୍ତନ କରିବା ପାଇଁ ରାଜ୍ୟ ସଭା ସଦସ୍ୟା ସରୋଜିନୀ ହେମ୍ବ୍ରମ ଉଦ୍ୟମ ଆରମ୍ଭ କରିଛନ୍ତି। ଏହି ରାଜପଥଗୁଡିକୁ ୪ ଥାକିଆ କରିବା ପାଇଁ ସେ ପୂର୍ବରୁ ବିଭାଗୀୟ କେନ୍ଦ୍ରମନ୍ତ୍ରୀ ନୀତୀନ ଗଡକରୀଙ୍କୁ ପ୍ରସ୍ତାବ ଦେବା ସହିତ ଆଲୋଚନା କରିଥିଲେ। ରାଜ୍ୟ ରାଜପଥଗୁଡ଼ିକୁ ଜାତୀୟ ରାଜପଥରେ ପରିବର୍ତ୍ତନ କରିବା ପାଇଁ ଡିପିଆର ପ୍ରସ୍ତୁତ ନିମନ୍ତେ ଅନୁରୋଧ କରିଥିଲେ। ଏହି କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ଲକ୍ଷ୍ମୀପୋଷି ସ୍ଥିତ ସୁବର୍ଣ୍ଣରେଖା ଜଳସେଚନ ଡାକବଙ୍ଗଳାରେ ଜାତୀୟ ରାଜପଥ, ଏନଏଚଏଆଇ ପି.ଡି. ନାଗେଶ୍ୱର ରାଓ, ଆଇରନ ଟ୍ରାଏଙ୍ଗେଲ ଲିମିଟେଡ ପି.ଡି. ଇଂ.ମୋହନ କୁମାର ମିଶ୍ର, ଏଲଏଣ୍ଡଟି ପ୍ରୋଜେକ୍ଟ ମ୍ୟାନେଜର ମାନବ ପଣ୍ଡା ଏବଂ ପୂର୍ତ୍ତ ବିଭାଗ ଅବସରପ୍ରାପ୍ତ ଅଧୀକ୍ଷଣ ଯନ୍ତ୍ରୀ ଇଂ. ପୀତବାସ ସେଠୀଙ୍କ ମଧ୍ୟରେ ଡିପିଆର ପ୍ରସ୍ତୁତ ଏବଂ ମୟୂରଭଞ୍ଜ ଜିଲାରେ କାର୍ଯ୍ୟକାରୀ ହେଉଥିବା ଜାତୀୟ ରାଜପଥ ୪ ଥାକିଆ କାର୍ଯ୍ୟ ବିଷୟରେ ସେ ଆଲୋଚନା କରିଛନ୍ତି। ଜାତୀୟ ରାଜପଥ କାର୍ଯ୍ୟ ଜୋରସୋରରେ ଚାଲିଛି ଏବଂ ସବୁ କାର୍ଯ୍ୟ ଯଥାଶୀଘ୍ର ଶେଷ ହେବ ବୋଲି ଜାତୀୟ ରାଜପଥ ଅଧିକାରୀମାନେ ରାଜ୍ୟ ସଭା ସଦସ୍ୟାଙ୍କୁ ପ୍ରତିଶ୍ରୁତି ଦେଇଥିଲେ ା ଜାତୀୟ ରାଜପଥର ଉଭୟ ପାର୍ଶ୍ୱରେ ଫୁଲ ଗଛ ଲଗାଇବା ସହିତ ଫ୍ଲାଏଓଭର ବ୍ରିଜର ଊଭୟ ପାର୍ଶ୍ୱରେ ମୟୂରଭଞ୍ଜର ଐତିହ୍ୟ କଳାକୃତିରେ ସୌନ୍ଦର୍ଯ୍ୟକରଣ କରିବା ପାଇଁ ସରୋଜିନୀ ଜାତୀୟ ରାଜପଥ ଅଧିକାରୀଙ୍କୁ ପ୍ରସ୍ତାବ ଦେଇଥିଲେ। ଦ୍ୱାରଶୁଣି ଘାଟି ରାସ୍ତାର ପ୍ରଶସ୍ତୀକରଣ ପାଇଁ ମଧ୍ୟ ଅଧିକାରୀମାନଙ୍କ ସହ ଆଲୋଚନା କରିଥିଲେ। ରାଜ୍ୟ ସରକାରଙ୍କ ଅଧିକାରୀ ଏବଂ ବିଭାଗମାନଙ୍କ ପାଖରେ କୌଣସି କାର୍ଯ୍ୟ ଅଟକି ରହିଲେ ସେ କାର୍ଯ୍ୟକୁ ତ୍ୱରାନ୍ବିତ କରିବେ ବୋଲି ପ୍ରତିଶ୍ରୁତି ଦେଇଥିଲେ।