ଅନୁଗୋଳ ଅଫିସ, ୧୮।୧୨-ଅନୁଗୋଳ ଜିଲାରେ ଚାଲୁଥିବା ଶିଶୁ ଯତ୍ନ ଅନୁଷ୍ଠାନ, ଅଙ୍ଗନୱାଡ଼ି କେନ୍ଦ୍ର ଏବଂ ତଫସିଲଭୁକ୍ତ ଜାତି ଓ ଜନଜାତି ବିଦ୍ୟାଳୟ ଗୁଡ଼ିକରେ ରହୁଥିବା ଶିଶୁମାନଙ୍କ ସୁବିଧା ଅସୁବିଧା ସମ୍ପର୍କରେ ଅବଗତ ହେବା ପାଇଁ ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗର ସଦସ୍ୟା ଦିବ୍ୟା ଶାସ୍ବତୀ ମଙ୍ଗଳବାରଠାରୁ ୨ ଦିନିଆ ଅନୁଗୋଳ ଜିଲା ଗସ୍ତରେ ଆସିଛନ୍ତି। ପ୍ରଥମେ ସର୍କିଟ ହାଉସ ଠାରେ ବିଭାଗୀୟ କର୍ମକର୍ତ୍ତାଙ୍କ ସହ ବୈଠକ କରି ଜିଲାରେ ଚାଲୁଥିବା ୪ଟି ଶିଶୁ ଯତ୍ନ ଅନୁଷ୍ଠାନର ଠିକ୍ ପରିଚାଳନା ସମ୍ପର୍କରେ ସଦସ୍ୟା ଅବଗତ ହୋଇଥିଲେ। ଏହାପରେ ଆୟୋଗ ସଦସ୍ୟା ଅନୁଗୋଳ ସହର ଉପକଣ୍ଠରେ ଥିବା ଆଦୃତ ଶିଶୁ ସଦନ ପରିଦର୍ଶନରେ ଯାଇ ପିଲାମାନଙ୍କ ସହିତ ବାର୍ତ୍ତାଳାପ କରିବା ସହ ବିଭିନ୍ନ କାଗଜପତ୍ର ଯାଞ୍ଚ କରିଥିଲେ। ସେହିପରି ସନ୍ଧ୍ୟାରେ ସଦସ୍ୟା ଓ ଶିଶୁ ସୁରକ୍ଷା ଅଧିକାରୀଙ୍କ ଏକ ଟିମ୍ ପାଲଲହଡ଼ା ବ୍ଲକ ଖମାରରେ ଥିବା କସ୍ତୁରିବା ଗାନ୍ଧୀ ବାଳିକା ବିଦ୍ୟାଳୟକୁ ଯାଇଥିଲେ।