ବିରିଡ଼ି,୨୨।୭(ଡି.ଏନ.ଏ): ରାଜ୍ୟ ସରକାରଙ୍କ ମଦ ପ୍ରସାର ନୀତିକୁ ବିରୋଧ କରି ସଚେତନତା ଅଭିଯାନ ଆରମ୍ଭ କରିଛି ମିଳିତ ଓଡ଼ିଶା ନିଶା ନିବାରଣ ଅଭିଯାନର ଯୁବ ଶାଖା ମଦମୁକ୍ତି ବାହିନୀ। ରବିବାର ମଦମୁକ୍ତି ବାହିନୀର କର୍ମକର୍ତ୍ତାମାନେ ବିରିଡ଼ି ବ୍ଲକ ୨୨ ମୌଜାର ବାଗଲପୁରଠାରେ ଥିବା ମହାନ ସ୍ବାଧୀନତା ସଂଗ୍ରାମୀ ସ୍ବର୍ଗତ ଗୌରାଙ୍ଗ ଚରଣ ଦାସଙ୍କ ପ୍ରତିମୂର୍ତ୍ତି ନିକଟରେ ଏକ ସଚେତନତା ସଭା କରିଛନ୍ତି। ଏଥିରେ ମିଳିତ ଓଡ଼ିଶା ନିଶା ନିବାରଣ ଅଭିଯାନର କେନ୍ଦ୍ରୀୟ କମିଟି ସଦସ୍ୟ ପ୍ରିୟନାଥ ଆଚାର୍ଯ୍ୟ ଓ ମଦ ମୁକ୍ତି ବାହିନୀର କଟକ ଜିଲା ଆବାହକ ଲଲାଟେନ୍ଦୁ ପାତ୍ରଙ୍କ ସମେତ ଲକ୍ଷ୍ମୀନାରାୟଣ ଆଚାର୍ଯ୍ୟ, ସଞ୍ଜୟ କୁମାର ରାଉତ, ଅସିତ ରାଉତ, ଦିଲୀପ ରାଉତ, ପଙ୍କଜ ପୃଷ୍ଟି, ଦିଲୀପ ସାହୁ, ଦିଲୀପ ମଲ୍ଲିକ, ରମଣ ମୁଦୁଲି, ମନୋଜ ବେହେରା, ସୁରେନ୍ଦ୍ର ମହାପାତ୍ର ଓ ବସନ୍ତ ମଲ୍ଲିକ ପ୍ରମୁଖ ଯୋଗ ଦେଇଥିଲେ। ସେମାନେ ସରକାରଙ୍କ ମଦ ପ୍ରସାର ନୀତି ବିରୋଧରେ ବିଭିନ୍ନ ପ୍ଲାକାର୍ଡ ଧରି ଗ୍ରାମ ପରିକ୍ରମା କରିଥିଲେ। ପ୍ରଥମେ ପ୍ରଭାତ ଫେରି କରାଯାଇଥିଲା। ମଦ ପ୍ରସାର ଫଳରେ ବହୁ ନୀରିହ ଜୀବନ ହାନି ଘଟୁଛି। ଅନେକ ପରିବାର ସର୍ବଶ୍ୱାନ୍ତ ହେଉଛନ୍ତି। ଏଣୁ ଲୋକମାନଙ୍କୁ ସଚେତନ କରିବା ସହ ମଦ ବିରୋଧରେ ଆନ୍ଦୋଳନ କରିବାକୁ ଆହ୍ବାନ ଦିଆଯାଇଥିଲା।
